Nlôñ u u nkal le: “Ibale u ntehe ba ntééñga hiyeyeba hi mut i homa u yéne, tole ba nkôdi mbagi sép, [ba kôdi ki] telepsép, hala a hélés bañ we. Inyule mut ngomin nunu a yé isi énél i ngomin nkeñi numpe, yak bo iba ba gwé bape ba nloo bo tel.”​—Ñañal 5:8, MN.

Litehge li bôt ba binam, nlôñ u u mpôdôl bôt ba gwé kunde i ngii bôt bape. U héya hala, nlôñ u u niiga ki bés ngim jam inyu Yéhôva, li li nlédés bés li tinak ki bés makénd.

Kaat Ñañal 5:8 i mpôdôl ñane nu a ntééñga hiyeyeba, a nkôde ki telepsép. Ñane nu a nlama bé hôya le, i nla ba le ñane numpe nu a nloo nye, tole nu a gwé kunde i i nloo yé a ntehe i yom a mboñ. Ñ, bape ba nla ba ba nlel nye tel. Ngoo le, biane bi bôt ba binam gwobisôna bi nla kôde telepsép kayéle i bôt ba yé isi yap ba nok ndutu ngandak.

Ndi to ibale mam ma nene wee ma ga héñha bé, di nla ba nkwoog nkaa le Yéhôva a ‘ntehe yak i mam bangomin bakeñi’ ba mboñ. Ha ngéda i, di nla bat Nyambe mahôla, di bééga ki nye mbegee yés. (Tjémbi 55:23; Filipi 4:6, 7) Di nyi le “mis ma Yéhôva ma nhiôm mu nkoñ ’isi wonsôna i unda lipémba jé inyu bet miñem nwap mi yé peles bisu gwé.”​—2 Miñañ 16:9.

Jon Ñañal 5:8 a nhôñlaha bés ngim jam di nlama yi inyu bangomin; hiki wada wap a gwé mut a nloo nye kunde. Jam li nlôôha nseñ li yé le, nlôñ unu u nhôla bés i nok le Yéhôva a kéhi i ngii baane bobasôna, ñ, a yé Ñane ngiinda yosôna. A ntéé Man wé Yésu Kristô le a énél kiki Kiñe Ane yé. Nyambe nu ngui yosôna bo Man wé, ba ntehe mam momasô ni bôt bobasô, ba téé ki sép i nya i yôni.