1, 2. Mambe mambadga di mbadba ngéda di ñañ bibañga bi Yésu bi nlébna i kaat Matéô 24:14?

TOO bôt ba neebe bés, too ba nkolba bés, ndék i yé i mpééna le Mbôgi Yéhôva i nyiba loñge inyu nson wap u likalô. I nla nene yak le ni ma boma bôt i likalô ba ba nkal le, to ibale ba ngwés bé biniigana gwés, ba nti bés lipém inyu nson wés. Kiki di nyi, Yésu a bi legel le ñañ nlam u Ane u ga añlana ikété nkoñ isi wonsôna. (Matéô 24:14) Ndi kii i nyis bés le, nson di mboñ, u nyônôs mbañ i Yésu? Baa hala a yé bikatba i hoñol le ndik bés bon di mboñ i bôlô i?

² Ngandak bibase i nhoñol le ba añal ñañ nlam. Ndi, biliya gwap bi mbéna sugul i mbôgi i ngim bôt, i ti mésa i ndap mitin, i nkuu biliñge liñge, i internet. Bape ba nkatba le ba mboñ mam inyu hôla bôt, tole ba nsima biliya gwap inyu oñ bidokta ni bisuklu. Ndi i mam ba nkatba le ba mboñ bi yé tañ laa ibale di nhégha gwo ni oda i Yésu a bi ti banigil bé?

3. Inoñnaga ni kaat Matéô 28:19, 20, mambe mam ma-na banigil ba Yésu ba nlama boñ?

 ³ Baa banigil ba Yésu ba bé lama bem le bôt bon ba loo i boni? Heni! Mbus bitugne gwé, Yésu a bi kal bibôgôl bi banigil bé le: “Jon kenana, yilhana biloñ gwobisôna banigil, ni sôblege bo . . . , ni niigaga bo i tééda mam momasôna me bi kal bé.” (Matéô 28:19, 20) Jon mam ma-na ma mbéda. Di nlama yilha bôt banigil, di sôble bo, di niiga ki bo. Ndi jam li bisu di nlama boñ li yé le kii? Yésu a kal le: “Kenana”! Inoñnaga ni i oda i, nkobol bibuk bi Bibel wada a toñol le: “I ‘ke’ i yé bôlô i hiki kristen, too a nyoñ njel ’isi too a nyoñ njel tuye.”​—Matéô 10:7; Lukas 10:3.

4. Kii i mbéda inyu yila “balop bôt”?

⁴ Baa Yésu a bé sômblak ndik pôdôl biliya bi hiki wada ikété banigil bé? Tole baa a bé sômblak le ba ba ntjegek inyu añal ñañ nlam? Kiki mut wada a bé bé le a ke i añal ñañ nlam ikété “biloñ gwobisôna,” nson u u bé lama bat le banigil ba Yésu ba ba ntjegek kiki ntôñ. Jon Yésu a bé sômbôl kal ngéda a bi naña bo i yila “balop bôt.” (Añ Matéô 4:18-22, MN) U ntén nlop Yésu a bé pôdôl hana u ta bé u nlop tjobi wada nu a nleñ hileñga ni jéle, a bemek le hiobi hi gwéla. Maselna ni hala, a bé pôdôl ligwéélak li mbunja inyu lop​—bôlô i ngui i i bé bat le ngandak bôt i gwañna biliya.​—Lukas 5:1-11.

5. Mambe mambadga ma-na ma nlama kôs ndimbhe, ni inyuki?

⁵ Inyu yi bonjee ba ñañal ñañ nlam u u nyônôs mbañ i Yésu i len ini, di nlama timbhe mana mambadga ma-na:

• Umbe ñwin di nlama añal?

• Kii i nlama tinde bés i boñ u nson u?

• Manjel mambe ma nlama gwéélana?

• Bôlô i añal ñañ nlam i bé lama keñep ipam limbe likala, i bé lama ki nom umbe ntandaa ngéda?

Mandimbhe ma mambadga ma, ma ga hôla ndik bé bés i yimbe bonjee ba mboñ u nson u ntohol niñ i bôt, ndi y’a lédés ki makidik més i ke ni bisu i sal wo.​—1 Timôtéô 4:16.

6. Inyuki di nla ba nkwoog nkaa le Mbôgi Yéhôva yon i ñañal ñwin Yésu a bi kal le di añal?

⁶ Añ Lukas 4:43. Yésu a bi añal “miñañ minlam mi Ane,” a bé bem ki le banigil bé ba mboñ nlélém. Bambe bôt ba ñañal ñwin u ikété “biloñ gwobisôna”? Nkaa u ta bé​—ndik Mbôgi Yéhôva. Yak ngim bakolba bés ba nek bé jam li. Kiki hihéga, Pada wada nu a bi sal ikété ngandak biloñ a bi kal Mbôgi Yéhôva wada le: A bi hiôm ikété ngandak biloñ, a bat Mbôgi Yéhôva i hiki loñ mu le, umbe ñwin ba bé añal. Imbe ndimbhe a bé kôs? Pada a kal le: “Bobasô ba bé lôôha jôñôp i ti nlélém ndimbhe: ‘Ñañ nlam u Ane.’” Nonok yaga i ba ditégéé di bôt, Mbôgi Yéhôva i bé pot ikété adna, kiki i mbéda inyu bañga bikristen. (1 Korintô 1:10) Ni ki le, ba bé tiimba i ñwin u yé ikété Nkum Ntat u ñañal Ane Yéhôva. U mbamble u, u nla kuha ikété 254 dilémb, u mpam ki bebee le 59 didun hiki sôñ. Yon i mboñ le ikété mimbamble nwominsôna, won u nlôôha ba ntjamak ni nkoñ isi wonsôna.

7. Lelaa di nyi le baéga ba bibase bi ndôk bikristen ba ñañal bé ñwin Yésu a bat banigil bé le ba añal?

⁷ Baéga ba bibase bi ndôk bikristen ba ñañal bé Ane Djob. Ibale ba mpôdôl  Ane, ngandak i nyoñ yo kiki ngim yom ikété ñem u kristen. (Lukas 17:21) Ba nhôla bé bôt i nok le Ane Djob i yé ngim énél i ngii i i gwé Yésu Kristô kiki Kiñe, yon y’a mélés mandutu ma bôt ba binam, i héya ki béba yosôna hana isi. (Masoola 19:11-21) Maselna ni hala, bi base bi, bi nhoñol ndik Yésu i mangéda ma Kristak ni Pasa. Ba nene kiki bo le ba nyi bé kii Yésu a ga boñ ngéda a ga ba Ñane mondo nu hisi. Kiki ba nyi bé i ñwin ba lam-ga añal, baa hala a nlama ki hélés bés le ba nyi bé kii i nlama tinde bo i sal nson u?

8. Mambe mahoñol mabe ma nla tinde mut i nson u likalô?

⁸ Kii i nlama tinde bés i añal ñañ nlam? I nlama bé ba inyu bok moni, to inyu oñ mandap makeñi. Yésu a kal banigil bé le: “Ni nkôs yañga, tina yañga.” (Matéô 10:8) Bañga i Djob i nlama bé nuñlana. (2 Korintô 2:17, MN, buk i si lipep) I bet ba ñañal ñañ nlam ba nlama bé yéñ i ôt nseñ i bôlô ba nsal. (Añ Minson mi baôma 20:33-35.) Tolakii biniigana bi Yésu bi bé nôga loñge, ngandak bibase i nlôôs ngéda yap yosôna inyu boñ njañgi, tole inyu bana bigwel moo. Bi nlama saa baéga base, ni ngandak bôt ipe i nsal inyu base. I ma pam ngandak ngélé le baéga bibase bi ndôk bikristen bi bok lingwañ.​—Masoola 17:4, 5.

9. Lelaa Mbôgi Yéhôva i ñunda le ba nsal nson u likalô ni mahoñol malam?

⁹ Kii di nla kal inyu Mbôgi Yéhôva ni jam li njañgi? Makébla ma njômbi ñem mon ma nit nson wap. (2 Korintô 9:7) Njañgi yo ki yo i mbôña bé i Mandap map ma Ane tole i makoda map ma ndôn. Ndik inyu ñwii u ntip tagbe, Mbôgi Yéhôva i bi tégbaha bebee le didun ndi didun diba di ngeñ i añal ñañ nlam ni i tégbaha 9 didun di gwigil bi Bibel hiki sôñ. Jam li hélha li yé le, u héya le ba nkôs bé nsaa inyu bôlô yap, ba yé ki maséé i gwélél moni nwap inyu nit nson u. Mu kiki a bé podok inyu nson u Mbôgi Yéhôva, nwan mam wada a kal le: “Bôlô yap i bisu u yé i añal ni i niiga. . . . Ba gwé bé baéga base ba nsaa. I jam li, li mboñ le moni mi téédana.” Mambe mahoñol ma ntinde ni bés i boñ i bôlô i? Di kalak i sem kwep le, di mboñ bôlô i ni ñem wés wonsô, inyule di ngwés Yéhôva, di gwéhék ki mut wés libôk. Mahoñol ba gwé i ti bomede ni ngôñ ñem, i nyônôs mbañ di nléba i kaat Tjémbi 110:3. (Añ.)

10. Mambe manjel Yésu ni banigil bé ba bi gwélél inyu añal ñañ nlam?

¹⁰ Mambe manjel Yésu ni banigil bé ba bi gwélél inyu añal ñañ nlam? Ba bé ke i boma bôt to hee homa ba bé le ba ada bo​—i mbamba ni i mandap ma bôt. Nson u likalô u nkobla ki le di yéñ bôt ba ba kôli ni ñañ nlam mandap ni mandap. (Matéô 10:11; Lukas 8:1; Minson mi baôma 5:42; 20:20) Ntén likalô u ba bé boñok ikété oda, i bé unda le ba bé bé batodol bôt.

11, 12. Inyu pôdôl jam li añal ñañ nlam, mambe maselna ma yé ipôla biliya bi ndôk bikristen ni biliya bi Mbôgi Yéhôva?

¹¹ Baa bibase bi ndôk bikristen bi ntéé likalô kiki Yésu a bi boñ? Libim li ngéda, bôt ba bibase ba ntjôô likalô i moo ma baéga bibase ba ba nsaa.  Ndi, ilole ba ba “balop bôt,” i nene le baéga bibase bi ndôk bikristen ba ntehe ndik nseñ i tééda “tjobi (bôt)” ba gwé behee. I yé mbale le, ngim baéga ba bibase ba nla boñ biliya i tinde bôt bap i boñ ngim ntén likalô. Kiki hihéga, i bibôdle bi ñwii 2001, ñénél ikeñi i Lôk Pada le Pape Jean Paul II a kal i léta yada le: “Ibôdôl ñwii ndi ñwii, me yé me mbéna naña bé i añal ñañ nlam. Me mboñ ki hala nano . . . Di nlama bana nlélém makénd Paul a bééna, nu a bi lond le: ‘Ngoo ni me ibale me ñañal bé me miñañ minlam.’” A kee ni bisu i kal le “ba nla bé tjôô nson u ngim bôt ba tôbôtôbô, ndi i nlama ba mbegee i bôt bobasô ikété Litén li Djob.” Ndi lelaa ngandak bôt i bi timbhe nsébla unu?

¹² Kii di nla kal inyu Mbôgi Yéhôva? Ndik botama bon ba ñañal le Yésu a ñane kiki Kiñe ibôdôl i ñwii 1914. Kiki Yésu a bi niiga, ba ndiihe nson u likalô ngandak. (Markô 13:10) Kaat yada ni hop ngisi le Pillars of Faith—American Congregations and Their Partners a nkal le: “Inyu Mbôgi Yéhôva, jam li bisu li yé i téé likalô.” Mu kiki a nsima bibañga bi Mbôgi Yéhôva wada, i nwet kaat nu a nkônde le: “Ngéda ba mboma bôt njal i gwé, bôt le binyuu bi ntééñga, tole i bet ba nkon, ba noode hôla bo, . . . ndi ba nhôya bé le jam li bisu li yé le, ba niiga bo le lisuk li nkoñ isi li gwé ni moo, ni le i yé nseñ le ba kôhna tohi.” Mbôgi Yéhôva i nke ni bisu i añal ñwin u, i gwéélak manjel ma Yésu ni banigil bé ba bé gwélél.

13. Bôlô i añal ñañ nlam i bé lama keñep ipam limbe likala?

¹³ Yésu a bi toñol lelaa bôlô i likalô i bé lama keñep ngéda a kal le ñañ nlam unu w’a añlana ni “nkoñ isi wonsôna.” (Matéô 24:14) Banigil ba bi kôs oda i yilha bôt ba “biloñ gwobisôna banigil.” (Matéô 28:19, 20) Hala a nkobla le ñañ nlam u nlama añlana ni nkon isi wonsôna.

14, 15. Kii i ñunda le Mbôgi Yéhôva yon i nyônôs mbañ i Yésu i mpôdôl bikeñi bi likalô? (Béñge bititii i bibôdle.)

¹⁴ Inyu tehe lelaa Mbôgi Yéhôva i nyônôs mbañ i Yésu inyu bikeñi bi nson wap u ñañ nlam, di nwan ngim minsoñgi. I Amérika, baéga bi ngandak mintén mi bibase ba yé bebee le 600 000. Ndi Mbôgi Yéhôva i yé bebee le 1 200 000. Ikété nkoñ isi wonsôna, bipada bi Katôlika Rômana bi nloo 400 000. Nano, di béñge nsoñgi u Mbôgi Yéhôva ba ba nyoñ ngaba i nson u ñañ nlam u Ane. Ikété nkoñ isi wonsôna, bebee le didun juem di batéé likalô ba nti bomede i añal ñañ nlam ikété 240 biloñ. Kinjee  hélha nson i yé séla, inyu lipém ni bibégés bi Yéhôva!​—Tjémbi 34:2; 51:17.

¹⁵ Bés Mbôgi Yéhôva, di gwé ngôñ i añle bôt bobasôna ñañ nlam ilole lisuk li nlo. Inyu njom i nyen, di nyiba kiki bôt ba bisu inyu bôlô i ngobol ni pémés bikaat bi ntoñol Bibel. Ibabé i saa, di ma kap didun di bikaat, mimbamble, bon ba bikaat, ni mapep ma nsébla inyu makoda ma ndôn ni ma Mbigda nyemb Yésu. Di ma pémés ngandak mintén mi bikaat ikété iloo 700 dilémb. Di ma pémés ki iloo 200 didun di ngobol i Bibel ba nsébél le Les Saintes Écritures. Traduction du monde nouveau ikété iloo 130 dilémb. Ndik i ñwii u ntagbe, di ntila bebee le didun ndi didun di-na ni pes di bikaat bi ntoñol Bibel. Ngembe site yés internet i nla kuha nano ikété iloo 750 dilémb. Imbe base ipe i mboñ nya bôlô i?

16. Kii nyis bés le Mbôgi Yéhôva yon i gwé mbuu Djob?

¹⁶ Baa u nson u ñañ nlam unu u ga ke ni bisu letee ni imbe ngéda? Yésu a kal le ikété nkoñ isi wonsôna, nson unu u bé lama ke ni bisu i bôña mu ntandaa ngéda dilo di nsôk di bé lama nom, “ndi to le lisuk li [bé lama] lo.” (Matéô 24:14) Imbe base ipe i nke ni bisu i añal ñañ nlam munu dilo di nsôk dini? Ngim bôt di mboma i likalô i nla kal le: “Di gwé mbuu mpubi, ndi bé ni nsal nson.” Ndi i ta bé inyule di nla kena nson u ni bisu jon di nla kal le di gwé mbuu Djob? (Minson mi baôma 1:8; 1 Pétrô 4:14) Ngim mangéda, bibase bipe bi noode sal i nlélém bôlô Mbôgi Yéhôva i nsal hiki ngéda, ndi biliya gwap bi mbéna kwo malép. Bape ba nyoñ makidik i ke biloñ bipe i sal inyu base inyu ndék ngéda. Mbus, ba témb i nlômbi niñ yap. Bape ki, ba nla yak noode ke mandap ni mandap, ndi kii ba ñañal? Ndimbhe i mbadga i, i ñunda loñge loñge le u nson Yésu a bi bôdôl, wo bé won ba yé sal.

17, 18. (a) Inyuki di nla ba nkwook nkaa le Mbôgi Yéhôva yon i añal ñañ nlam u Ane i len ini? (b) Kii i boñ le di laa ke ni bisu i añal ñañ nlam ni nkoñ isi wonsôna?

¹⁷ Jon bonjee ba ñañal toi ñañ nlam u Ane i len ini? Ibabé nkaa, di nla kal le: “Mbôgi Yéhôva!” Inyuki di nla ba nkwook nkaa hala? Inyule di ñañal ñwin Yésu a bi kal le di añal, ñañ nlam u Ane. Mu kiki di nke i boma bôt, di ngwélél yak manjel Yésu ni banigil bé ba bé gwéélak. Di mboñ ki nson wés u likalô ni mahoñol malam​—ni gwéha, ha inyu nseñ u moni bé. Nson wés u nkeñep ipam likala li mbôk ni li nsôk i nkoñ isi, u tihbaga ki bôt ba biloñ gwobisôna ni dilémb tjodisôna. Di ga ke ki ni bisu i kena nson unu ni bisu ibabé i waa, ñwii mbus ñwii, letee lisuk li lo.

¹⁸ Di yé nhelek ngéda di ntehe mam bagwélél ba Djob ba mboñ munu mangéda ma tôbôtôbô di niñil. Ndi kii i boñ le di laa añal ñañ nlam unu ni nkoñ isi wonsôna? Ñôma Paul a bi timbhe mbadga ini ikété kaat a tilna bôt ba Filipi: “Me gwé ngui i boñ mam momasôna inyu nu a nlédés me.” (Filipi 4:13) Le Tata wés nu gwéha a ke ni bisu i lédés bés mu kiki di mboñ kii yosôna di nla inyu yônôs nson wés.​—2 Timôtéô 4:5.