Bibel i yé nyonok ni bipôdôl bi bôt ba ba bééna ‘mahoñol kiki bés.’ (Yakôbô 5:17) Kiki hihéga di nla hoo nok i yom Paul a bé sômbôl kal ngéda a bi gwélél bibuk di nléba i kaat Rôma 7:21-24, MN: “I ngéda me nsômbôl boñ jam li téé sép, i jam li yé béba jon li yé ikété yem. . . . Kinje ngoo mut me yé!” I nya mahoñol i, i nlédés bés ngéda di nlama jôs bibomb gwés.

Paul a bi témb a pôdôl mahoñol mape a bééna. I kaat Galatia 2:20, a bi kal le a bé nkwoog nkaa le Yésu a bi “gwés [nye] a sem ki nyemede inyu [yé]”! Baa yak we u nôgda nlélém? Ñ, ndi hiki ngéda bé.

Ibale kiññem i nlôôha tééñga bés inyu bibéba di bi boñ behee, i nla ba bés jam li nlet i neebe le Yéhôva a ngwés bés ni le a nwéhél bés, to i tehe sesema i binoñ kiki likébla a ti inyu hiki wada wés. Baa Yésu a gwé toi ngôñ le di tehe binoñ kiki i nya likébla i? Ibale ñ, kii i nla hôla bés i tehe gwo hala? Di wan mana mambadga ima.

Ñ, Yésu a ngwés le di tehe sesema yé kiki likébla inyu hiki wada wés. Kii i nyis bés hala? Noode hégda i jam li ntagbe i kaat 23:39-43. Mut wada a péni i kék bebee ni Yésu. A neebe le a bi boñ mam mabe. I kuu a nkand i nlama ba béba ngandak, inyule ndik mintonba mi mi bi boñ bibéba bikeñi nwon ba bé péni i kék. Kiki i jam a bi boñ li bé tééñga nye, ntonba u u bi kal Yésu le: “U hoñlak me ngéda u nlo i Ane yoñ.”

Lelaa Yésu a timbhe nye? Hégda Yésu a nhiel ño inyu béñge mut nu. To hala kiki a bé nok njôghe ngandak, Yésu a nwemla, a kal mut nu le: “I len ini me nkal we maliga le, w’a ba ni me i Paradis.” Ibale Yésu a gwés, ki a bi hôñlaha ndigi i mut nu le: ‘Man mut a bi lo . . . i ti nom yé binoñ inyu ngandak bôt.’ (Matéô 20:28) Ndi baa u nyimbe le Yésu a ñunda le i sesema i, i bé yak inyu mut nu? A bi kwélés nye kiki liwanda jé, mu kii a gwélél bibuk kiki “we” ni “me.” A kal mut nu le a bé lama niñ i paradis hana ’isi.

Ibabé pééna, Yésu a bé gwés le mut nu a neebe sesema yé kiki ngim likébla inyu yé. Ibale Yésu a bi nôgda hala inyu ntonba u u bi bana bé pôla i gwélél Djob, a nlama nôgda nlélém jam inyu nsôblege kristen u u ngwélél Djob. Kii i nla hôla bés i bana i nya mahoñol i to ibale di bi boñ béba?

Kiki Yésu a bi ti Paul nson likalô, Paul a bé nkwoog nkaa le Yésu a bi wo inyu yé. Lelaa hala? A kal le: “Me nti Kristô Yésu  Nwet wés mayéga, nu a lédés me ni lipémba, lakii a añ me kikii mut a kôli bôdôl ñem, ndi a téé me ikété nson wé, to lakii me ba ñôbôsjôl ngéda bisu, me tééñgaga ntôñ, me bômlak ki wo.” (1 Timôtéô 1:12-14) Nson Paul a bi kôs u bi kwés nye nkaa le Yésu a bi kônôl nye ngoo, le a bé gwés nye, ni le a bé bôdôl nye ñem. Kiki Paul, Yésu a bi ti hiki wada wés nson. (Matéô 28:19, 20) Baa yak bés di yé nkwoog nkaa hala?

Mankéé Albert, nu a ntip témb i ntôñ mbus 34 nwii, a ntoñol le: “Me nwaa bé hoñol mam mabe me bi boñ. Ndi ngéda me yé likalô, me nôgda nlélém kiki ñôma Paul, le Yésu a bi bééga me nson. Hala a nlédés me, a hôlga ki me i bana mahoñol malam inyu yem, inyu niñ yem, ni botñem inyu dilo di nlo.”​—Tjémbi 51:5.

Allan nu a bé ntonba, a gwéhék bisañ, ilole a nigil maliga, a nkal le: “Me ngi hoñlak i mam mabe momasôna me bi boñ bôt. Ngim mangéda, hala a yé a tééñga me ngandak. Ndi me nti Yéhôva mayéga inyule a neebe le mboñ mam mabe kiki me, me añle bape miñañ minlam. Ngéda me ntehe bôt ba neebe miñañ minlam, hala a nhôñlaha me ikepam limbe likala Yéhôva a yé gwéha, a bak ki loñge. Me nôgda le a ngwélél me inyu hôla i bet ba bi boñ mam mabe kiki me.”

Ngéda di yé likalô, di nhoñol ndigi mam malam, di boñok ki mam malam. Nson u u nkwés bés nkaa le Yésu a nkônôl bés ngoo, le a ngwés bés, ni le a mbôdôl bés ñem.

Ntel ngéda unu béba nkoñ ’isi u Satan u yé ngi tjiba, miñem nwés mi ga waa bé kéés bés inyu mam mabe di bi boñ. Kii i ga hôla bés i jôs i nya mahoñol i?

Mankéé nu muda wada le Jane nu kiññem i ntééñga inyu matjañg a bi boñ ngéda a bé mañge wanda, a nkal le: “Me ngwés bibuk bini le ‘Nyambe a nloo miñem nwés.’” (1 Yôhanes 3:19, 20) Kiki Jane, yak bés di nla nôgda hogbe i yi le Yéhôva bo Yésu ba nyi le di yé bikwéha bi bôt. Di hôya bañ le, ni gwéha nyen ba bi ti binoñ, he bé inyu bôt ba yé peles, ndi inyu i bet ba ntam bibéba gwap.​—1 Timôtéô 1:15.

Di nla ba nkwoog nkaa le binoñ bi bi tiba inyu yés tôbôtôbô ngéda di nsoñda lelaa Yésu a bé tehe bikwéha bi bôt, ni i ngéda di mboñ kii yosôna di nla inyu gwel nson a bi ti bés. Ngéda u mboñ hala, u nla kal kiki Paul le: Yésu “a gwés me, a sem ki nyemede inyu yem.”