“LIBUMBUL li yé toi likeñi, ndi baboñnson ba yé ndék. Jon, soohana Nwet libumbul le a om baboñnson libumbul jé.” (Lukas 10:2) Bibuk bini Yésu a pot len 2 000 nwii, bi ntibil toñol jam li mbôña i Myanmar i len ini. Inyuki? Nyoo i loñ Myanmar, batéé likalô ba yé ndigi 4 200, ndi ba nlama añle letee ni 55 didun di bôt ñañ nlam.

Ndi “Nwet libumbul” le Yéhôva, a bi tihba miñem mi ngandak bilôk bikéé bi bôlôm ni bi bôda bi biloñ bipe, a tinde bo i lo i loñ ini, i i yé i pes likôl i Asia Nwelmbok, inyu nit nson libumbul i pes mbuu. Kii i bi tinde bo i nyodi biloñ gwap? Mambe mahôla ba bi kôs inyu ke i yén nyoo? Bimbe bisai ba bi kôs? Di wan mam ma.

Nano a yé ndék nwii le Kazuhirô, nsañal wada i loñ Yapan, a bi bôdôl kwo ti, a nimis yi, kayéle ba kena nye i dokta. Dokta jé li bi téé nye mbén le a yén nwii ima ibabé nye i luk matôa. Hala a bi lôôha tééñga Kazuhirô. A bé badba le: ‘Lelaa m’a ke ni bisu i boñ jam me ngwés​—hala wee nson wem u nsañal?’ A bi yemhe Yéhôva, a badak le a hôla nye i kena nson wé nsañal ni bisu.

Kazuhirô a ntoñol le: “Mbus sôñ yada, liwanda jem li li nsal i Myanmar li bi nok ndutu me bi kôs. A sébél me, a kal me le: ‘Nyono Myanmar, ndiyô ba nlôôha gwélél i yé matôa makeñi. Ibale u nlo nyono, w’a bana bé ngôñ i luk litôa wemede inyu kena nson nsañal ni bisu!’ Ha nyen me bat dokta jem ibale me bé le me niñ i Myanmar. Kinje hélha jam i nok nye a nkal me le: ‘Ngo ngeñ di mpôdôl, soso dokta li boña a nlôl i Myanmar, a yé yuuga loñ Yapan. M’a kwélés nye inyu yoñ. Hala a mboñ le ibale u ntémb u kwo nyoo, a’ tibil we.’ Me bi tehe i yom dokta a kal me kiki ndimbhe i Yéhôva.”

Kunda yada, Kazuhirô a bi tilna hikuu hi loñ hi Myanmar inyu kal bo le nye ni nwaa ba bé sômbôl lo i sal nyono kiki basañal. Mbus dilo ditan ndigi, hikuu hi loñ hi bi timbhe le: “Ni loo, di gwé ngôñ ni ngandak basañal!” Kazuhirô bo nwaa Mari, ba bi nuñul matôa map, ba kôhna lipep li nti bo kunde i ke, ba saa ki bitikét bi avioñ. I len ini, ba yé maséé i sal i man juu li hilémb hi moo hi Mandalay. Kazuhirô a nkal le: “Jam li, li bi lédés hémle yés ikété  mbônga di nléba i kaat Tjémbi 37:5: ‘Bii njel yoñ yak Yéhôva; bôdôl ki nye ñem, ndi a’ boñ jam.’”

I nwii 2014, Mbôgi Yéhôva i Myanmar i bi bana nsima i tégbaha likoda li ndôn li tôbôtôbô. Ngandak bôt i bi lôl biloñ bipe inyu likoda likeñi li. Wada ikété yap le Monique, nu a gwé 30 nwii ni jam, a lôlak Amérika, a nkal le: “Mbus di témb, me bi soohe inyu bat Yéhôva kii me yé le me boñ nano. Me bi kwel yak ni bagwal bem inyu mam me bé sômbôl boñ i pes mbuu. Bés bobasôna di bi tehe le me bé lama témb i Myanmar, ndi hala a bi yoñ ngéda ni ngandak masoohe ilole me mpam i yônôs njômbi i.” Monique a ntoñol inyuki.

“Yésu a ti bés makénd le, di ‘ôt ndugi ndamba.’ Jon me bi badba le: ‘Baa me yé bebee i ke? Baa m’a la niñ nyoo ibabé i gwélél ngandak ngéda inyu yéñ likala li kel?’” A bi sôk kal le: “Me bééna bé jôga li moni inyu ke nyoo ii pes ipe i nkoñ isi.” Lelaa a bé ni le a boñ inyu ke nyoo?​—Lukas 14:28.

Monique a nkal le: “Kel yada, nwet wem bôlô a bi kal le a nsômbôl tehe me. Me bé kon woñi, me hoñlak le b’a héya me i bôlô. Ndi maselna ni hala, nwet wem bôlô a bi bégés me inyu loñge yem nson. Mbus a kal me le, a nyoñ bitelbene inyu boñ le me kôs bom, moni ba bi ti me mi bé mi kôli inyu saa mam momasôna ma bé béda me!”

Monique a nsal nano Myanmar ibôdôl i sôñ Libuy li nyéé i nwii 2014. Lelaa a ntehe nson wé nsañal nyoo? A nkal le: “Me yé maséé ngandak i ba hana. Me ntégbaha gwigil bi Bibel biaa. Nnigil wem wada a gwé 67 nwii. A mbéna yéga me a nolok, a sambla yak me. Ngéda a bi nigil le jôl li Djob le Yéhôva, a bi bôô maéa. A kal le: ‘Ngélé yem bisu ini le me nok le jôl li Djob le Yéhôva. Béñge ki le, we u ngi yii mañge wanda, ndi u niiga me jam li nlôôha nseñ li me bé ngi nigil.’ Kiki ni nla hégda, yak me me bi bôô maéa. Mam me mboma hana kiki li, ma mboñ le i sal homa ngôñ i batéé likalô i yé keñi, i nhôla i bana niñ i maséé kiyaga.” Tokekii, Monique a bi kôhna nsima i ke i Suklu i baañal ñañ nlam.

Yom ipe i bi tinde lôk kéé ihogi i lo i Myanmar i bé ñañ u nson u loñ i ikété Kaat nwii 2013. Sita yada le Li nu a gwé iloo 30 nwii, a niñ i pes likôl i Asia Nwelmbok. A  bééna bôlô i bé yoñ nye ngéda yosôna, ndi i kaat nwii i, i bi tinde nye i tehe lelaa a bé le a boñ inyu ke nit nson i loñ Myanmar. A nkal le: “I nwii 2014, ngéda me bé likoda li ndôn li tôbôtôbô i Yangon, me bi boma babiina ba ba bi ke nyoo i nit man juu li batéé likalô li li bé tééne bon ba Kina likalô i loñ Myanmar. Jon kiki me mpot hop u Kina, me bi yoñ makidik i ke nit man juu nu. Me ni sita yada le Monique, di bi nôgla inyu ke sal i tison Mandalay. Yéhôva a bi sayap biliya gwés, kayéle di léba bôlô malét i pes ngéda i nlélém suklu, di léba ki ndap ha bebee. Tolakii lék i yé nayak, ni le ndék mam ipe i ntééñga me, me yé maséé i sal nyono. Bôt ba Myanmar ba mbéna bé ba ngwañ, ndi ba yé liyômba, ba bak bebee i emble ñañ nlam. Kinje loñge jam i tehe kiki Yéhôva a mboñ le bôlô yé i hoo! Me yé nkwoog nkaa le sômbôl i Yéhôva i yé le me ba hana i Mandalay.”

Ngandak lôk kéé i i bi ke nyoo i nit nson likalô, i bi nôgda ngui i masoohe. Di yoñ hihéga hi Jumpei bo nwaa Nao, boba ba nloo 30 nwii. Ba bé sal i likoda li hilémb hi moo i Yapan. Ndi yak bo ba bi ke i sal i Myanmar. Kii i bi tinde bo i ke nyoo? Jumpei a nkal le: “Me ni nwaa wem, njômbi yés i bé le di kee nit nson i loñ i het ba gwé ngôñ ni batéé likalô.  Mankéé wada nu a bé likoda jés li hilémb hi moo i Yapan, a bi ke i Myanmar. I sôñ Mpuye u nwii 2010, tolakii di bééna ndik ndék moni, yak bés di bi ke nyoo. Lôk kéé yés i bôlôm ni i bôda i Myanmar i bi leege bés loñge!” Lelaa Jumpei a bi nôgda nson i tééne ndok bôt likalô i Myanmar? A nkal le: “Ndok bôt i ngwés ñañ nlam. Ngéda di yé di unda bo bividéô ni hilémb hi moo, ba yé ba ba nhelek. Di yé maséé ni makidik di bi yoñ i lo sélél Yéhôva nyono!”

Lelaa Jumpei bo Nao ba bi boñ inyu bana ndék moni? Jumpei a nkal le: “Mbus nwii maa, ndék moni di bééna i bi mal, di bééna ha bé moni inyu saa ndap. Me ni nwaa wem di bi soohe ngandak. Hélha jam li yé le, di bi kôs kaat i hikuu hi loñ hi hi bé naña bés i bôdôl bôlô basañal ba tôbôtôbô inyu ndék ngéda. Di bi bôdôl Yéhôva ñem, di tehe ki ntiik le a bi hôya bé bés. A bi yoñ ndun ni bés ikété manjel momasôna.” Jumpei bo Nao ba ntip tagbe i Suklu i baañal ñañ nlam.

Mankéé Simon nu a yé man Italia, a ban-ga 43 nwii, a yé mbiibaga ni Anna nu a gwé 37 nwii, a bak ngond i Siland Yondo, ba bi ke i yén i Myanmar. Ndi kii i bi tinde bo i ke i Myanmar? Anna a ntimbhe le: “Ñañ nson u loñ Myanmar ikété Kaat nwii 2013 won u bi tinde bés!” Simon a nkal le: “Kinje nsima nkeñi i ba i Myanmar. Niñ i ntomb ngandak nyono, me nla yak ti ngandak ngéda i nson Yéhôva. Hala a ntina maséé i tehe lelaa Yéhôva a nyoñ ndun ni bés, ngéda di nsal i ngim libôga i het ba gwé ngôñ ni batéé likalô.” (Tjémbi 121:5) Anna a nkal le: “Me mah ba bé maséé i nya i. Niñ i nlédél bé bés. Me ntégbaha ngandak ngéda ni nlô wem, hala a bi kônde boñ le di bana maada ma bas bas. Di bi bana ki bañga mawanda ipe. Bôt ba mbéñge bé Mbôgi Yéhôva ni mis mabe nyono, ba ngwés ki maliga ngandak!” Kii i ñunda hala?

Anna a nkal le: “Kel yada, me bi tééne mañge muda nu a bé boñ suklu ikeñi likalô i bôm, di yoñ bitelbene i bomna ki. Ngéda me bi lo, me koba le a nlona liwanda jé jada. Lipeple li bé noñ ki ha, a lona bôt bape. Mbus ha ki, a lona ki ba ba bé loo ba bisu. I len ini me nigil ni ba-tan ikété yap.” Simon a nkal le: “Bôt ba libôga ba yé minyaô, ba badak ngandak mambadga. Libim li neebe ñañ nlam. Di nyi bé lelaa di boñ inyu yoñ ndun ni gwigil bi gwobisôna.”

Ndi kii di nla kal inyu bet ba bi yoñ bitelbene bi ngui i ke i loñ Myanmar? Mizuho ngond Yapan, a nkal le: “Me ni nlô wem Sachio di bé gwés ke sal i loñ i het ngôñ i batéé likalô i yé keñi​—ndi hee ni? Ngéda di bi mal añ ñañ nson u loñ Myanmar ikété Kaat  nwii 2013, mam di bi añ mu, ma bi lôôha tihba bés kayéle di kahal badba too di bé le di ke nyoo i Myanmar.” Sachio a nkônde le: “Di bi yoñ makidik i ke tégbaha sonde yada i Yangon, nyañ tison i loñ Myanmar, inyu béñge yo. Mayuuga ma, ma bi kwés bés nkaa le di bé lama bôô i Yapan inyu lo i yén nyono.”

Rodney bo nwaa Jane, ba ba nlôl i Ôstrélia, ba ban-ga 50 nwii ni jam, ni bon bap Jordan bo Danica, ba nsal i het ngôñ i batéé likalô i yé keñi i loñ Myanmar ibôdôl i nwii 2010. Rodney a nkal le: “I tehe le ngandak bôt i bééna ngôñ i nigil, i bi tinde bés i ke nyoo. Me nti mahaa mape makénd i ke sal i bahoma ba yé kii Myanmar.” Inyuki? “Nseñ lihaa jés li bi kôs i pes mbuu, mbus di bi yoñ makidik ma, u nloo balal ba ndamba! Ngandak boñge ba wanda i pégi ni téléfôn yap, matôa map, ni bibôlô gwap, hala ni hala. Ndi bon bés bo ba pégi i nigil bibuk bi mondo, bi b’a gwélél i nson likalô. Ba noode nigil ki lelaa ba nla kwel ni bôt ba nyi bé Bibel, ni lelaa ba timbhe i makoda, ba yé ki nsôôbege ikété minson mi mbuu mimpe.”

Oliver, mankéé nu a gwé 37 nwii, a lôlak i Amérika, a ntoñol inyuki a nti bôt makénd i ke het ngôñ batéé likalô i yé keñi: “I gwélél Yéhôva i homa me meya bé i nlona me ngandak bisai. I nyodi i meeni inyu ke sal homa numpe, i bi lédés bôdôl me bééna le Yéhôva a ga nit me to ibale me mboma mambe mandutu. I sal ni bôt me bé yi bé, ndi ba ba yé hémle yada ni me, i bi hôla me i tehe le yom yo ki yo i gwé bé nseñ munu nkoñ isi unu kiki Ane Djob.” I len ini, Oliver bo nwaa Anna ba ntéñbe i nson wap ni makénd, hala wee i tééne bon ba Kina likalô.

Trazel, Sita yada i 52 nwii, nu a nlôl i Ôstrélia a nsal i Myanmar ibôdôl i nwii 2004. A nkal le: “Me nti bôt ba nla makénd, i ke sal i het ngôñ batéé likalô i yé keñi. Me bi yimbe le ibale u gwé ngôñ i sal, Yéhôva a nsayap biliya gwoñ. Me bé emel bé le me bé le me niñ hala kel yada. Hala a yé niñ i bisai, ni i maséé me bé bé le me hégda.”

Di nsoohe le mbôgi i bôt bana ba nsal i Myanmar i het ngôñ batéé likalô i yé keñi, i ti bé makénd i tehe too ni nla ke i hôla bôt ba gwé ngôñ ni maliga, i het batéé likalô ba ta bé. Ñ, bés ba di nsal i het ngôñ batéé likalô i yé keñi, di nkal bé le: “Soho, ni loo nyono Myanmar, ni hôla bés!”