Bana ñem ngôô inyu “bôt bobasôna”
NGÉDA Yésu a bé unda banigil bé lelaa ba nlama téé likalô, a bi yis bo le bôt bobasôna bé bon ba bé lama neebe nwin u Ane. (Lukas 10:3, 5, 6) Jon i nson wés likalô, di mboma bôt ba mbep timbhe bés, tole ba nôgha bés liyot ni maboñok map. I yé ntiik le, maboñok map ma nla boñ le di bana ha bé ñem ngôô inyu yap.
Mut ñem ngôô a ntehe mandutu ma bôt ni mam ba gwé ngôñ, a nkônôô bo ngoo, a nhôla ki bo. Ndi, ibale di ñunda ha bé bôt di ntééne likalô ñem ngôô, di nla yak bôdôl nimis makénd més ni likeñge jés. Jam lipe li yé le, ngéda di nhôlôs ñem ngôô, a yé wengoñle di nkônde kalasin i hié—ni njel i nyen makénd més i nson likalô ma nke ni bisu i loñ!—1 Tésalônika 5:19.
Lelaa di nla hôlôs ñem ngôô to ibale hala a yé bés nledek jam? Di wan dihéga diaa di bôt di nlama kôna—Yéhôva, Yésu, ni ñôma Paul.
KÔNA ÑEM NGÔÔ U YÉHÔVA
Hala a yé nwii ndi nwii len, le Yéhôva a bi hônba i tehe lelaa ba nhoo jôl jé mahindi. Ndi to hala, a ‘mpôgba ni ba ba nti bé mayéga ni bôt babe.’ (Lukas 6:35) Loñge yé ñem i nene mu wongut yé. Yéhôva a gwé ngôñ le “bôt bobasôna” ba tohlana. (1 Timôtéô 2:3, 4) Tolakii Djob a ñoo béba, a ndiihe bôt ba binam, a gwé bé ngôñ le to wada wap a nimis niñ yé.—2 Pétrô 3:9.
Yéhôva a nyi i pam limbe likala Satan a nkwés bôt ba ntop bé hémle, ndim. (2 Korintô 4:3, 4) I nlôôha ba nledek inyu ngandak bôt i neebe maliga inyule ibôdôl bo boñge, ba bi kôs biniigana bi bitembee, ni bilem bibe. Yéhôva a yé bebee i hôla i nya bôt i. Lelaa di nyi hala?
Béñge lelaa Yéhôva a bé tehe bôt ba Ninivé. To hala kii ba bééna maboñok mabe, Yéhôva a kal Yôna le: “Ndi baa me kôli bé tôñ ni Ninivé, soso nkoñ yaga, i het bôt ba yii, ba nloo mbôgôl dikôô ni môm ma ma dikôô, ba ba nla bé yi bagal woo wap walôm ni u waé?” (Yôna 4:11) Yéhôva a bé tehe bôt ba Ninivé kiki bôt le ba nyi bé maliga inyu yé, jon ni konangoo, a om Yôna inyu béhe bo le ba héñha.
Kiki Yéhôva, di ndiihe biniñ bi bôt. Di nla kôna nye ngéda di yé bebee i hôla nu ni nu a nla emble, to ibale di nhoñol le ba neebe bé maliga.
KÔNA ÑEM NGÔÔ U YÉSU
Kiki Isañ, Yésu a bi kônôô i bet ba nyep i pes mbuu ngoo. Jon Bibel i nkal le: “Ndi ngéda a tehe mamut, ma kônha nye ngoo, inyule ma ba bahelga ni nwambaga, kiki mintômba mi ngi ntééda.” (Matéô 9:36) Yésu a bi yimbe i jam li bé nene bé mis; a bé yi le i bet ba bé emble nye ba bi kôs bikwéha bi biniigana, ni le baéga bap ba bé tét bo. Yésu a bi ke ni bisu i ‘niiga bo ngandak mam’ tolakii a bé yi le ngandak yap i ga neebe bé i yila banigil bé inyule ngandak mam i bé lama kéñ bo.—Markô 4:1-9.
Unup bañ ibale mut a nleege bé we i kel bisu u mboma nye
Ngéda mam ma nhéñha i niñ i mut, yak litehge jé li maliga li nla héñha
Ngéda bôt ba neebe bé nwin wés, di nlama béñge iloo jam li nene i mis, di noode ki yi inyuki ba ntjél emble bés. Maboñok ma bôt ba nkadba le ba yé bikristen ma nla boñ le bôt bape ba yahal Bibel. Bebek bape ba bi nok bôt ba ntôô bitembee inyu yés. I nla ki pam le ibale ba nleege bés, mahaa map tole bôt ba litén jap ba bôdôl tééñga bo.
Bôt bahogi di mboma likalô ba nla tjél emble bés inyule ba bi boñ bo mam ma ma bi lôôha tééñga bo, i nya i ba nla bé hôya. Nsañal wada nu a bé sal i loñ ipe le Kim, a nkal le: “Ngim libôga nyono mbok yés, ngandak bôt i bi nimis nkus wap wonsôna i gwét. Ba gwé bé botñem yo ki yo inyu bilôl. Ba yé ñunbak, ba konok bôt woñi. Mu libôga li, di mbéna boma ngolba. Lisañ jada, ba bi tééñga me bañga bañga i likalô.”
Lelaa Kim a bi tééda ñem ngôô tolakii ba bi tééñga nye? A nkal le: Ngéda ba bé tééñga me, me bi tééda pes kaat i Bingéngén 19:11 mahoñol, i i nkal le: “Mut yihe a mpala bé nyai.” Yom i bi hôla me i bana ñem ngôô inyu bôt ba libôga jés, i yé i bigda binéñél gwap. Ni ki le bôt bobasôna bé bon ba nkolba bés hala. Di bi kôhna yaga ndék mapeple malam mu libôga li.”
Di nla badba le: “Lelaa me bak le me tehe nwin Ane ibale men me ba i bôt ba, ndi ba lo i tééne me likalô?” Kiki hihéga, ibale me nok bôt ba nyahal Mbôgi Yéhôva, ki me mboñ lelaa? Bebek le ibale di ba kiki bo, ki di bak le di bana nlélém libak ipañ batéé likalô, ki di yé ki le di gwés le bape ba kônôô bés ngoo. Ngéda di mbigda oda Yésu a ti le di bôñôl bôt bape yom di ngwés le ba bôñôl bés, hala a ntinde bés i nôgda yom bape ba nôgda, to ibale hala a nlet.—Matéô 7:12.
KÔNA ÑEM NGÔÔ U PAUL
Ñôma Paul a unda bôt ñem ngôô, yak i bet ba bé kolba likalô jé. Inyuki? A bi hôya bé le nyemede a bi tééñga bôt bape. A kal le: “Me ba ñôbôsjôl ngéda bisu, me tééñgaga ntôñ, me bômlak ki wo. Ndi to la, me kôs konangoo inyule me ba boñ hala ni ngi yi, inyu ngitophémle.” (1 Timôtéô 1:13) A bé yi le Yéhôva bo Yésu ba bi lôôha kônôô nye ngoo. Jon, a bé le a nok i bet ba bé kolba nye.
I bé i pam le Paul a boma bôt ba bi kôs bikwéha bi biniigana ibôdôl bo boñge. Lelaa a bé boñ? Kaat Minson mi baôma 17:16 i nkal le, ngéda Paul a bé i Atén, “mbuu wé u unup ikété yé lakii a tehe nkoñ u ma yon ni bisat.” Ndi to hala, Paul a bi gwélél jam li bé unbaha nye inyu ti mbôgi lam. (Minson mi baôma 17:22, 23) A bi boñ le likalô jé li kiha ni binéñél bi mintén mi bôt nwominsôna, jon a bi “tohol bahogi ikété yap manjel momasôna.”—1 Korintô 9:20-23.
Di nla kôna Paul ngéda di nyimbe bilem bibe tole bikwéha bi biniigana bôt di mboma ba gwé, ndi to hala di ngwélél makeñge inyu añle bo “miñañ mi biloñge bi mam.” (Yésaya 52:7) Sita yada le Dorothée a nkal le: “Libôga jés li likalô, ba bi niiga bôt le Djob a gwé nledek ñem ni le ngéda di mboñ béba jam, a ñôm bés nsohi u u ga tinde nye i kogse bés. Me mbéna bégés i nya bôt i, inyu hémle ba gwé le Djob a yé, me yé me ôt ki mahoñol map i jam Bibel i nkal inyu Yéhôva, Djob li gwéha, ni mam a mbôn bés inyu bilôl.”
‘WAA BAÑ YÉMBÉL BÉBA LÔÑNI LOÑGE’
Nano nu “dilo di nsôk” di nkôôge bebee ni lisuk jap, di nlama ba nkwoog nkaa le “bôt babe, yak ni bajuñbaha bôt” ba ga ke ni bisu i bana maboñok mabe. (2 Timôtéô 3:1, 13) Ndi di nlama bé nwas le jam li, li boñ le konangoo yés i sôs tole li héya bés maséé més. Yéhôva a nla ti bés ngui i ke ni bisu i “yémbél béba lôñni loñge.” (Rôma 12:21) Nsañal wada le Jessica a nkal le: “Me mbéna boma bôt ba ba nhañ suhulnyu, ba ba nyahal bés lôñni nwin wés. Hala a nla tééñga bés ngandak. Ilole me mbôdôl nkwel, me nsoohe Yéhôva i ñem wem, me bat ki nye le a hôla me i tehe bôt kiki nyemede a ntehe bo. Hala a nhôla me i bok mis mem i ngii yom me nla boñ inyu hôla bôt bape, ndi he bé i ngii mam me nôgda inyu yap.”
Di ke ni bisu i yéñ bôt ba ba kôli inyu niñ boga
Bôt bahogi ba yé ba sôk neebe maliga, ngéda di nwaa bé tééne bo likalô
Di nlama ki béñge lelaa di nla ti lôk kéé yés makénd. Jessica a nkal le: “Ibale wada ikété yés a mboma jam libe i likalô, me mboñ biliya le di héléé bañ mu jam li. Iloole di kwélél mu hiki ngéda, me mpohol mam malam mape di nla pôdôl, kii bo lelaa nson wés u num matam malam.”
Yéhôva a ntibil yi mandutu di mboma i nson wés likalô. Kinje maséé a nok ngéda a ntehe bés di nkôna konangoo yé! (Lukas 6:36) I yé ntiik le, Yéhôva a ga unda bé ñem ngôô i boga ni boga. Di nla ba nkwoog nkaa le a nyi ngéda imbe a’ mélés ni nkoñ isi unu. Mu ndék ngéda i yii, i yé nseñ le di nyamnda ni nson u ñañ lam. (2 Timôtéô 4:2) Jon, di ke ni bisu i yônôs nson wés ni makénd, di ban-ga ñem ngôô inyu “bôt bobasôna.”
