YIGIL 42
Lelaa u nla niiga mut ikepam i sôble—Pes iba
“Yoñ yaga yihe ni wemede ngéda yosôna, u yoñok ki yihe ni biniigana gwoñ.”—1 TIMÔTÉÔ 4:16.
HIÉMBI 77 Mapubi ma njôp i nkoñ isi u jiibe
DINYO MALÉP *
1. Kii i nyis bés le nson i yilha bôt banigil u ntohol bôt?
NSON i yilha bôt banigil u ntohol bôt! Kii i nyis bés hala? I ngéda Yésu a bi ti mbén i di nléba i kaat Matéô 28:19, 20, a kal le: “Kena, . . . ni yilha bôt banigil . . . , ni sôblege bo.” Inyuki sôble i yé nseñ? Inyu kôhna tohi di nlama sôblana. I mut a nyéñ kôhna sôble, a nlama hémle le tohi i nlôl ndik ni njel nyemb Yésu ni bitugne gwé. Inyu hala nyen ñôma Pétrô a kal bikristen bi ngéda yé le: “Sôble . . . i tohol bé nano ni njel bitugne bi Yésu Kristô.” (1 Pétrô 3:21) Jon i ngéda mut a ntip kôs sôble, wee a njôp i njel tohi.
2. Kii kaat 2 Timôtéô 4:1, 2 i ntinde bés baniiga i boñ?
2 Inyu yilha bôt banigil di nlama hôlôs “likeñge i niiga.” (Añ 2 Timôtéô 4:1, 2.) Inyuki? Inyule Yésu a ti bés oda le: “Kena, . . . ni yilha bôt banigil . . . , ni niigaga bo.” Ñôma Paul a kal le “téñbe” ni nson u, inyule “kiki u mboñ hala nyen w’a tohol wemede lôñni i bôt ba ñemble we.” Inyu hala nyen a kônde le: “Yoñ yaga yihe ni . . . biniigana gwoñ.” (1 Timôtéô 4:16) Kiki inyu yilha bôt banigil di nlama niiga bo, di hôlôs likeñge jés i niiga.
3. Kii di ga tehe munu yigil ini?
3 I nkoñ ’isi wonsôna di nigil Bibel ni didun di bôt. Ndi kiki di bi tehe i yigil i ntagbe, di gwé ngôñ i yi lelaa di nla hôla bo i sôblana inyu ba banigil ba Yésu Kristô. Munu yigil ini, di ga tehe mam matan hiki ntéé likalô a nlama boñ inyu hôla nnigil Bibel i hol ikepam i sôble.
GWÉLÉL BIBEL INYU NIIGA
Bat ntéé likalô nu a yé nhôôlak le a hôla we i hôlôs likeñge joñ i gwélél Bibel i ngéda u niiga (Béñge maben 4-6) *
4. Inyuki batéé likalô ba nlama bana hôtnyuu i ngéda ba ntégbaha yigil Bibel? (Béñge matila isi lipep.)
4 Di ngwés biniigana bi Bibel. Jon hala a nla tinde bés i pot ngandak i ngéda di ntoñol gwo. Ndi i nwet a ñéga yigil i Nkum Ntat, yigil i Bibel i likoda, tole a niiga mut Bibel, a nlama bé pot ngandak. Inyu nwas le Bibel yon i niiga, di nlama gwel bésbomede le di toñol bañ i mam momasôna di nyi inyu nlôñ Bibel wada tole inyu nkwel di yé tehe. * (Yôhanes 16:12) Hégda le i mam u bé yi i ngéda u bi kôs sôble ni mam u nyi nano. I nene le i ngéda u bi tip sôblana, u bé yi ndik biniigana bi bisu bi Bibel. (Lôk Héber 6:1) Hala a bi bat we ngandak nwii, i nigil mam u nyi nano, jon u yéñ bañ i toñle nnigil Bibel mam momasôna ngélé yada.
5. (a) Inoñnaga ni kaat 1 Tésalônika 2:13, kii di gwé ngôñ le banigil ba nok i ngéda di niiga bo? (b) Lelaa di nla hôla bo i añle bôt bape mam ba nigil?
5 Di gwé ngôñ le i mut a nigil ni bés a nok le biniigana a nkôs bi nlôl i Bibel. (Añ 1 Tésalônika 2:13.) Lelaa di nla hôla nye? Di ti nye makénd i añle bôt bape i mam a nigil. Iloole u toñle nye minlôñ mi Bibel, boñ le nyen a toñol. Hôla nye i tehe lelaa a nla ha i mam a nigil i bisélél. I ngéda ni ñañ nlôñ Bibel, gwélél mambadga ma ma nla hôla nye i tehe ndimbhe ni i pahal mahoñol mé. (Lukas 10:25-28) Kiki hihéga bat nye le: “Imbe lem i Yéhôva u ntehe munu nlôñ Bibel unu?” “Lelaa u nla ôt nseñ ni biniigana bini?” “Mahoñol moñ ma yé lelaa inyu jam di ntip nigil?” (Bingéngén 20:5) Jam li nlôôha nseñ li ta bé i mam nnigil Bibel a nyi, ndi le a gwés mam a nigil, a bii ki mo bisélél.
6. Inyuki i yé le i ba nseñ le di bat nhôôlak mankéé le u yéga bés i tégbaha yigil?
6 I ngéda u nke i tégbaha yigil i Bibel, baa u yé u ke ni minhôôlak mi batéé likalô? Ibale hala, bat bo lelaa ba ntehe likeñge joñ i niiga, ba kal ki we too u ngwélél Bibel loñge. Ibale u nyéñ hôlôs likeñge joñ i niiga, u nlama ba suhulnyuu. (Hégha ni Minson mi baôma 18:24-26.) I mbus ngim ngéda, bat nhôôlak ntéé likalô too nnigil Bibel a ntibil nok i mam a nigil. Ibale u pégi tole u nke liké, bat i mankéé nu le a hôla we i tégbaha i yigil i. Hala a ga boñ le yigil i telep bañ, ni le nnigil Bibel a nôgda le yigil i yé nseñ. Kekikel u hoñol bañ le yigil i yé ndik “yoñ” le mut numpe a nlama bé tégbaha yo. Di hôya bañ le njômbi yés i yé le nnigil Bibel a hol, hol ni hol letee a pam i yi maliga.
NIIGA NI MAKÉND U BAK NKWOOG NKAA
Añle nnigil Bibel dihéga di bôt ba ba yé ndémbél ilam, inyu boñ le a tehe nseñ i gwélél matiñ ma Bibel i niñ yé (Béñge maben 7-9) *
7. Lelaa di nla hôla nnigil i gwés mam a nigil?
7 Nnigil Bibel a nlama tehe le u ngwés biniigana bi yé ikété Bibel, u nhémle ki gwo. (1 Tésalônika 1:5) Hala a mboñ le yak nye a ga gwés i mam a nigil. Ibale pôla i nene, toñle nye lelaa matiñ ma Bibel ma bi hôla we i niñ yoñ. Hala a ga kwés nye nkaa le Bibel i gwé maéba ma ma nla bane nye nseñ.
8. Kii ipe u nla boñ inyu hôla nnigil Bibel, ni inyuki?
8 I ngéda ni nigil, añle nye dihéga di bôt ba bi boma minlélém mi mandutu ma yak nye a mboma ni lelaa ba bi yémbél mo. I ngéda u nke i tégbaha yigil, u nla kena mankéé nu ndémbél yé i nla bane nye nseñ. Tole u nla ki yéñ dihéga dilam i jw.org i homa le “Bibel i nhéñha niñ i bôt.” * I nya gwigil ini ni bividéô bini i nla hôla nnigil Bibel i tehe le i noñ matiñ ma Bibel i niñ yé i yé njel pék.
9. Lelaa u nla ti nnigil Bibel makénd le a añle bôt bé ba lihaa ni mawanda mé i mam a nigil?
9 Ibale nnigil a yé mbiibaga, baa sobiina wé yak nye a nigil? Ibale hala bé, naña nye i yigil nan Bibel. Ti nnigil makénd i añle bôt bé ba lihaa ni mawanda mé i mam a nigil. (Yôhanes 1:40-45) Lelaa u nla boñ? U nla gwélél mambadga kii bo: “Lelaa u nla toñle mut woñ lihaa litode lini?” tole “Umbe nlôñ u Bibel u nla gwélél inyu kwés liwanda joñ nkaa?” Ni i njel i, u ga hôla nnigil i yila nniiga. I ngéda a’ bana ngap i kôli, a mbôdôl ke likalô ni likoda. U nla ki bat nye ibale a nyi ngim mut i gwé ngôñ i nigil Bibel. Ibale hala, ke tehe i mut nu, u bat nye too a nla neebe nigil Bibel ni we. Unda nye vidéô ini le Yigil Bibel i ntagbe lelaa? *
HÔLA NNIGIL I BOT MAWANDA IKÉTÉ LIKODA
Ti nnigil Bibel makénd i bot mawanda ikété likoda (Béñge maben 10-11) *
10. Inoñnaga ni kaat 1 Tésalônika 2:7, 8, lelaa nniiga a nla noñ ndémbél i Paul?
10 Baniiga ba nlama unda banigil le ba ndiihe bo. Ba nlama tehe bo kiki bôt ba ga ba lôk kéé yap i mbuu. (Añ 1 Tésalônika 2:7, 8.) Hala a tane bé bo jam li ntomb i tjôô mawanda map ni i boñ mahéñha momasôna ma mbéda inyu gwélél Yéhôva. Di nlama hôla bo i léba bañga mawanda ikété likoda. Ba liwanda ni nnigil Bibel, u tégbaha ngéda ni nye, he ndik bé i ngéda ni nigil Bibel ndi yak mangéda mape. Ibale u nsébél nye i téléfôn, u ntilna nye tole u nyuuga nye i ngéda u yé i likalô, u ñunda nye le u ntôñ toi nye.
11. Kii di gwé ngôñ le banigil ba léba ikété likoda, ni inyuki?
11 Ba yé ba mbéna kal le: “Man a ta bé man mut wada.” Di nla ki kal le: “Likoda jolisôna jon li nyilha mut nnigil.” Inyu hala nyen bañga baniiga ba nhôla banigil i kôôge bebee ni i bet ba nla hôla bo i bana maada malam ni Yéhôva. Banigil ba nla ba maséé i ba mawanda ni bagwélél ba Djob ba ba nla hôla bo i ngéda ba mboma mandutu. Di gwé ngôñ le hiki nnigil Bibel a nôgda le a yé nseñ ikété likoda, ni le a yé wada ikété lihaa jés li mbuu. Di gwé ki ngôñ le a nôgda le gwéha i yé ikété lihaa jés li mbuu. Hala a ga ba nye jam li ntomb i tjôô i bôt ba nhôla bé nye i gwés Yéhôva. (Bingéngén 13:20) Ibale mawanda ma ma ntjôô nye, a nyi le a nla léba mawanda malam ikété ntôñ Yéhôva.—Markô 10:29, 30; 1 Pétrô 4:4.
BANA LEM I PÔDÔL NSEÑ I TI WEMEDE NKIKIP NI SÔBLE
Mam ma nlôôha nseñ ma yé, ma nnigil Bibel nu a gwé ngôñ i sôblana a nlama boñ! (Béñge maben 12-13)
12. Inyuki di nlama bana lem i pôdôl nnigil Bibel nseñ i yé i ti wemede nkikip ni sôble?
12 U bén-ga pôdôl nye nseñ i yé i ti nyemede nkikip yak Yéhôva ni i sôblana. U hôya bañ le njômbi yés i ngéda di ntégbaha yigil Bibel i yé le mut a sôblana. Ndék ngéda i mbus le u mbôdôl yigil Bibel, téntén i ngéda nnigil Bibel a mbôdôl lo makoda, a nlama nok le njômbi i yigil Bibel i yé le a yila Mbôgi Yéhôva.
13. Inyu boñ le nnigil Bibel a pam i sôble, mambe mam a nlama boñ?
13 Mam ma nlôôha nseñ ma yé, ma nnigil Bibel nu a gwé ngôñ i sôblana a nlama boñ. Li bisu, nnigil a nlama yi Yéhôva, a nlama gwés nye, a nlama hémle nye. (Yôhanes 3:16; 17:3) A nlama bana maada malam ni Yéhôva yak ni lôk kéé ikété likoda. (Lôk Héber 10:24, 25; Yakôbô 4:8) A nlama tjôô bilem gwé bibe, a tam yak bibéba gwé. (Minson mi baôma 3:19) Hémle yé i nlama tinde nye i añle bôt bape Bañga i Djob a nigil. (2 Korintô 4:13) I mbus a ti nyemede nkikip yak Yéhôva, a kôs ki sôble. (1 Pétrô 3:21; 4:2) Hilo hi, hi yé hilo hi maséé inyu bôt bobasôna! Ibale nnigil Bibel a mboñ biliya bi, di nlama bégés nye, di ti ki nye makénd i ke ni bisu i hol.
BANA LEM I BÉÑGE TOO NNIGIL BIBEL A NHOL
14. Lelaa ntéé likalô a nla yi too nnigil Bibel a yé hol?
14 Inyu hôla nnigil Bibel i hol ikepam i sôble, di nlama bana hônba. Ndi di nlama yi too a gwé ngôñ i gwélél Yéhôva. I ngéda u mbéñge nye, baa u ntehe le a mboñ biliya i noñ mambén ma Yésu? Tole a gwé ndik ngôñ i yi mam Bibel i nkal?
15. Mambe mam ma nla unda ntéé likalô le nnigil Bibel a yé hol?
15 Hiki ngéda béñge too nnigil Bibel a nhol. Kiki hihéga, baa a mpôdôl gwéha yé inyu Yéhôva? Baa a nsoohe Yéhôva? (Tjémbi 116:1, 2) Baa a ngwés a ñañ Bibel? (Tjémbi 119:97) Baa a nke makoda momasô? (Tjémbi 22:23) Baa a nlona mahéñha i niñ yé? (Tjémbi 119:112) Baa a mbôdôl añle bôt bé ba lihaa tole mawanda mé i mam a nigil? (Tjémbi 9:2) Jam li nlôôha nseñ, baa a gwé ngôñ i yila Mbôgi Yéhôva? (Tjémbi 40:9) Ibale nnigil Bibel a mboñ bé jam to jada ikété mam di ntip sima, ni likeñge yéñ yi inyuki, i mbus kwélés nye ni loñgeñem, ndi ni maliga. *
16. Imbe ngéda u nlama téé yigil Bibel?
16 Hiki ngéda u nlama béñge too u nlama kena yigil Bibel ni bisu. Badba le: ‘Baa nnigil Bibel a nkôôba bé yigil yé? Baa a gwé bé ngôñ i lo makoda? Baa a ngi gwé bilem gwé bibe? Baa a ngi kenek i base yé?’ Ibale ndimbhe i yé le ñ, i kena i yigil i ni bisu i yé wengoñle u nyéñ niiga mut nhoga ki le a gwé bé ngôñ i tihba malép! Ibale nnigil Bibel a ngwés bé i mam a nigil, ni le a ta bé bebee i lona mahéñha i niñ yé, nseñ i kena yigil i ni bisu i yé le kii?
17. Inoñnaga ni kaat 1 Timôtéô 4:16, kii batéé likalô ba nlama boñ?
17 Nson wés i yilha bôt banigil u nlôôha bane bés nseñ, jon di nyéñ hôla banigil Bibel i hol ikepam i sôble. Inyu hala nyen di nlama gwélél Bibel inyu niiga, di niigaga ni makénd di bak nkwoog nkaa. Di nlama ti bo makénd i bot mawanda ikété likoda. Di nlama ki bana lem i pôdôl nseñ i yé i ti wemede nkikip ni sôble, ni i béñge too nnigil a nhol. (Béñge minkéñék mi matila le “ I mam nniiga a nlama boñ inyu hôla nnigil Bibel i hol ikepam i sôble”) Kinje maséé di gwé i yoñ ngaba i nson u u ntohol biniñ! Di waa bañ i boñ kii yosôna di nla inyu hôla banigil Bibel i hol ikepam i sôble.
HIÉMBI 79 Le mintômba nwoñ mi téñbe ikété hémle
^ liboñ 5 I ngéda di niiga bôt Bibel, di gwé nsima i hôla bo i yi mambe mahoñol ni maboñok Yéhôva a ngwés le ba bana. I yigil ini i ga kônde toñol lelaa di nla hôlôs likeñge jés i niiga.
^ liboñ 4 Béñge i yigil ini le “Keñgle tjandi dini i ngéda u ntégbaha yigil i Bibel” Niñ yés ni nson wés–Kaat likoda li ñem sonde i sôñ Dipos 2016.
^ liboñ 8 Kee i homa ni hop Pulasi le QUI SOMMES NOUS > TÉMOIGNAGES ET ANECDOTES.
^ liboñ 9 I JW Library®, kee i MULTIMEDIA > NOS RÉUNIONS ET NOTRE MINISTÈRE > OUTILS DE PRÉDICATION.
^ liboñ 15 Béñge i gwigil bini le “Gwéha inyu Yéhôva i ntinde i sôble” ni “Baa u yé bebee i sôblana?” ikété Nkum Ntat nu sôñ Matumb i nwii 2020.
^ liboñ 77 NDOÑI I BITITII: Ngim mangéda i mbus yigil Bibel, nhôôlak sita i nhôla i nwet a ñéga yigil i tehe kii a nla boñ inyu boñ le a pot bañ ngandak i ngéda a ñéga yigil.
^ liboñ 79 NDOÑI I BITITII: Nnigil Bibel a yé tehe lelaa a nla ba loñge nwaa. I mbus ngéda a ñañle nlôm kii a nigil.
^ liboñ 81 NDOÑI I BITITII: Nnigil Bibel ni nlôm ba yé maséé i tégbaha ngéda ni mankéé nu muda a mboma i ndap Ane.
