1. Kii David a bé nôgda inyu Yéhôva, kii hala a bé tinde nye i boñ?

KIÑE David a tila le: “Yéhôva a yé nkeñi, a nlama ki béghana ngandak.” (Tjémbi 145:3) David a bé gwés Yéhôva, gwéha i yon i bé tinde nye i bégés Djob i “ngembe [ñemkété] likoda.” (Tjémbi 22:23; 40:6) Ibabé pééna yak we u ngwés Yéhôva, u nkémhe ki bini bibuk bi David le: “A Yéhôva, Nyambe nu tata wés Israel, u ba nsaibak mba ni mba.”​—1 Miñañ 29:10-13.

2. (a) Lelaa di nla bégés Yéhôva? (b) Mambe mandutu lôk kéé ihogi i mboma, kii di ga wan?

² I len ini, njel yada di gwé inyu bégés Yéhôva i yé mandimbhe di nti makoda. Ndi, ngandak bilôk bikéé bi bôlôm ni bi bôda i ntehe hala ndutu. Ba gwé ngôñ i timbhe i makoda, ndi ba nkon woñi. Lelaa ni ba nla yémbél i woñi u? Mambe maéba malam ma nla hôla bés bobasôna i ti mandimbhe ma ntina makénd? Ilole di ntimbhe mambadga ma, di bôk ndugi di wan manjom ma-na di gwé i timbhe makoda.

3-5. (a) Kiki kaat i Lôk Héber 13:15 i nkal, inyuki di ntimbhe makoda? (b) Baa bés bobasôna di nlama ti minlélém mi mandimbhe? Toñol.

³ Yéhôva a nti bés bobasôna nsima i bégés nye. (Tjémbi 119:108) Mandimbhe di nti makoda ma njôp ikété “bisesema [gwés] bi mayéga,” mut nye ki nye a ta bé le a sem gwo inyu yés. (Añ Lôk Héber 13:15.) Baa Yéhôva a mbat bés le di ti nye minlélém mi bisesema, tole minlélém mi mandimbhe? Heni!

 ⁴ Yéhôva a nyi le di gwé bé nlélém ngap, ni le di mboma bé minlélém mi mam. A nlôôha diihe bisesema di nla ti nye. Hoñol mintén mi bisesema Djob a bé neebe le bon ba Israel ba sémél nye. Bahogi ikété yap ba bé ndik le ba la ti man ntômba tole kembee. Ndi nwet a bé yep, a bé lama ti ‘bakuku iba tole dibeñ diba.’ A bak ki le, ibale man Lôk Israel a bé bé le a ti dinuni diba, Yéhôva a bé neebe le a ti “hihéga hi éfa hiada ikété jôm, flawa lam.” (Lôk Lévi 5:7, 11) Flawa i bé hee bé diye to ndék, ndi to hala Yéhôva a bé diihe i sesema i, i bé lama ndik ba “flawa lam.”

⁵ Djob jés li gwéha li ngi gwé nlélém litehge li mam i len ini. Ngéda di ntimbhe, a gwé bé ngôñ le bés bobasôna di nyi nkwel kiki Apôlô bo Paul ba ba bé yi yoña bôt. (Minson mi baôma 18:24; 26:28) I yom yosôna Yéhôva a ngwés, yon i yé le di ti mandimbhe malam kiki la yés. Di hoñol i yik muda i bi ti disiinaga di moni diba kiki makébla. Yik muda i i bé mahee i mis ma Yéhôva inyule i bi ti kii yosôna i bééna.​—Lukas 21:1-4.

6. (a) Inoñnaga ni kaat Lôk Héber 10:24, 25, lelaa mandimbhe di ñemble makoda ma ntihba bés? (b) Lelaa ni nla unda bape le ni ndiihe mandimbhe ma ma nti makénd?

⁶ Di ntina makénd bés ni bés ni njel mandimbhe més. (Añ Lôk Héber 10:24, 25.) Bés bobasôna di yé maséé i emble mintén mi mandimbhe nwominsôna mi ntina makoda. Di ngwés yak mandimbhe ma disii di boñge, ma ma nlôl ñem. Hala a yé a ntihba bés ngandak i emble mankéé wada a mpôdôl tik jam a nléba mu yigil. Di ngwés ki di ntehe i bet ba ‘mpot yaga ni makénd’ ngéda ba ntimbhe, to hala kii ba yé nsut, tole ba ba ntip bôdôl nigil maliga. (1 Tésalônika 2:2) Lelaa di nla unda bo le, di ndiihe biliya gwap? Di nla ti bo mayéga mbus likoda inyu mandimbhe map ma ma ntina makénd. Njel ipe i unda bo hala, i yé mandimbhe més di nti. Di nkôhna ndik bé makénd makoda més, ndi yak bés di nti bape makénd.​—Rôma 1:11, 12.

7. Lelaa di ñôt nseñ ngéda di ntimbhe?

⁷ Bésbomede di ñôt nseñ ngéda di ntimbhe makoda. (Yésaya 48:17) Lelaa?  Pok, ibale di nsômbôl timbhe likoda, hala a ntinde bés i tibil kôôba. Ngéda di ntibil kôôba, di nkéñbaha nokna yés i Bañga i Djob. Kiki nokna yés i nkeñep, hala nyen di ga pam i bii i mam di nigil bisélél. Iba, di ga lôôha ki ôt nseñ ni likoda inyule yak bés di nyoñ ngaba mu ni mandimbhe més. Aa, kiki i mbéda biliya inyu timbhe, hala nyen di yé le di bigda matode di ngwélél i ndimbhe yés ntandaa ngéda mbus le likoda li mal tagbe.

8-9. (a) Kiki Malaki 3:16 a ñunda, u nhoñol le kii Yéhôva a nôgda ngéda di ntimbhe makoda? (b) Kii i nkônha bôt bape woñi i téé hinoo?

⁸ Di nlémél Yéhôva ngéda di mpahal hémle yés. Di nla ba nkwoog nkaa le Yéhôva a ñemble bés, a nlôôha ki diihe biliya di mboñ inyu timbhe makoda. (Añ Malaki 3:16.) A ñunda le a ndiihe biliya gwés bi ngui di mboñ inyu lémél nye ni bisai a nkôp bés.​—Malaki 3:10.

⁹ Ñ, di gwé manjom malam i timbhe makoda. Ndi to hala, bahogi ba nla kon woñi i téé hinoo. Ibale hala nyen yak we u nôgda, u tomb bañ. Di wan ngim matiñ i Bibel, ndék dihéga, ni maéba malam ma ma nla hôla bés bobasôna i boñ biliya i timbhe ngandak makoda.

10. (a) Kii i mbéna kônha ngandak ikété yés woñi? (b) Ibale u nkon woñi i timbhe, wee u gwé imbe lem lam?

¹⁰ Baa hiki ngéda nu i yé i pam le u téé hinoo inyu ti ndimbhe likoda, ñem u mbôô we matjél? Ibale ñ, u ta bé wetama. Maliga ma yé le ngandak ikété yés i nkon woñi ndék, ngéda i nlama timbhe. Inyu yémbél ndutu u mboma, bôk ndugi yéñ yi i yom i nkônha we woñi. Baa u nkon woñi le u ga hôya i yom u gwé ngôñ i kal, tole u nkon woñi le w’a kal jam li li téé bé? Baa u ntôñ le ndimbhe yoñ i ga ba bé lam kiki i bana bape? Hala a nla ba yimbne i mahoñol malam. Hala a ñunda le u yé suhulnyuu, ni le inyu yoñ, bape ba  nloo we. Yéhôva a ngwés bôt ba suhulnyuu. (Tjémbi 138:6; Filipi 2:3) Yéhôva a ngwés ki le u bégés nye, ni le u ti lôk kéé yoñ i bôda ni i bôlôm makénd i makoda. (1 Tésalônika 5:11) A ngwés we, a’ ti ki we ñem ngui.

11. Mambe mabéhna ma Bitilna ma nla hôla bés?

¹¹ Di wan ndék mabéhna i Bitilna. Bibel i nkal le bés bobasôna di nhôs mu i mam di mpot ni lelaa di nkal mo. (Yakôbô 3:2) Yéhôva a mbem bé le di ba peles, to bés di bem bañ hala inyu lôk kéé yés i bôda ni i bôlôm. (Tjémbi 103:12-14) Bés ni bo di yé lihaa jada i pes mbuu, ba ngwés ki bés ngandak. (Markô 10:29, 30; Yôhanes 13:35) Ba nyi le ngim mangéda, i yé i pam le di gwélél bé bibuk bi kôli inyu tibil nôgha bôt yom di nhoñol.

12-13. Kii dihéga di Néhémia ni Yôna, di niiga bés?

¹² Nano hoñol ndék dihéga i Bibel, di di nla hôla we i yémbél woñi. Bigda hihéga hi Néhémia. A bé sal i yale i mpémba kiñe. I bi pam lisañga jada le Néhémia a modop inyule a bi nok le mapénd ma Yérusalem ni manwemel mé ma bi kwo. (Néhémia 1:1-4) Hégda woñi u bé le u gwel nye ngéda kiñe a bat nye inyuki a bé a môdi hala! Néhémia a bi hoo soohe, mbus a timbhe kiñe. Mbus ngéda, kiñe i bi yoñ ngim bitelbene inyu hôla litén li Djob. (Néhémia 2:1-8) Hoñol ki Yôna. Ngéda Yéhôva a ep nye i legel bôt ba Ninivé nwin wé, Yôna a bi lôôha kon woñi kayéle a ke ngwéé i mbok ipe. (Yôna 1:1-3) Ndi ni mahôla ma Yéhôva, Yôna a bi tééne bôt ba Ninivé likalô. Bibuk a bi gwélél bi bi tinde bôt ba Ninivé i tam béba yap. (Yôna 3:5-10) Hihéga hi Néhémia hi ñunda bés nseñ i soohe ilole di ntimbhe. Hi Yôna hi niiga bés le Yéhôva a nla hôla bés i gwélél nye, to ibale di nlôôha kon woñi. I pot maliga, baa ngim likoda i nla kônha mut woñi kiki bôt ba Ninivé?

¹³ Mambe maéba malam ma nla hôla we i ti mandimbhe ma ma ntina makénd i makoda? Di wan ndék maéba mu.

14. Inyuki di nlama kôôba loñge inyu makoda, imbe ngéda di nla tjek inyu boñ hala?

¹⁴ Kôôba hiki likoda. Ngéda u ntjek mam moñ loñge, ndi u kôôba, hala a ga ti we makénd i timbhe. (Bingéngén 21:5) I yé ntiik le, bés bobasôna di gwé bé nlélém ntjega. Yik muda yada i 80 nwii le Éloise, a yé a bôdôl kôôba yigil i Nkum Ntat bibôdle bi sonde. A nkal le: “Me nlôôha ôt nseñ ngandak ni likoda ibale me ntibil kôôba bisu bi ngéda.” Sita Joy nu a ntégbaha ngim kel yosôna i bôlô, a mbéna yoñ hilo hi ngwa jôn inyu kôôba yigil yé Nkum Ntat. A nkal le: “Me yé me gwés nigil ndék ngéda ilole me nke  likoda.” Mañ wada u ba nsébél le Ike, nu a yé nsañal, a bak a pégi ngandak, a nkal le: “Me ntehe loñge i tjek ndék ngéda inyu nigil hiki kel, iloole me yoñ ngandak ngéda ngim kel inyu kôôba.”

15. Lelaa u nla tibil kôôba inyu makoda?

¹⁵ Kii i mbéda inyu kôôba makoda loñge? Hiki ngéda u mbôdôl yigil, bat Yéhôva le a ti we mbuu wé mpubi ni njel masoohe. (Lukas 11:13; 1 Yôhanes 5:14) Mbus, yoñ ndék manut inyu leñ jis ngii ni ngii mu yigil. Hala wee wan ño nkwel u yigil, i mbus u wan bon ba miño mi minkwel, bititii, ni minkéñék mi matila. Mbus hala, ngéda u mbôdôl nigil hiki liben, añ libim li minlôñ mi Bibel u nla. Soñda biniigana u ñôt mu yigil, téntén matode u gwé ngôñ i gwélél mu ndimbhe yoñ. Kiki u nyoñ ngéda i kôôba, hala nyen u ñôt nseñ, hala ki nyen i ga ba we jam li ntomb i timbhe.​—2 Korintô 9:6.

16. Bimbe bisélél di gwé, lelaa di ngwélél gwo?

¹⁶ Ibale u nla, gwélél bisélél bi nyiña bi bi yé ni hilémb hioñ. Ntôñ u Yéhôva u nti bés bisélél bi bi nla hôla bés i kôôba makoda. Di gwé bo JW Library^® nu a nhôla bés i yoñ bikaat i tafel yés, tole i téléfôn. Di nla gwélél gwo inyu yigil mbus ngéda​—di nla soñgol gwo, tole di nla emble gwo​—to imbe ngéda, to hee homa. Bôt bahogi ba ngwélél i sélél i inyu yigil, ngéda yap noi i homa bôlô, i suklu tole ngeñ ba nke liké. Bisélél bini le Watchtower kobot bikaat ni Watchtower KOBOT BIKAAT I INTERNET^™ bi ntômbôs nyiña wés ngandak ngeñ di gwé ngôñ i tibil nok ngim jam i tôbôtôbô.

17. (a) Inyuki i yé loñge i kôôba ngandak mandimbhe? (b) Kii ini vidéô le Yila liwanda li Yéhôva​—Kôôba ndimbhe yoñ, i niiga we?

¹⁷ Ibale u nla, kôôba ngandak mandimbhe inyu hiki yigil. Inyuki? Inyule, i nla pam le ba pohol bé we ngéda u ntéé hinoo. Bebek yak bôt bape b’a téé hinoo nlélém ngéda ni we, ni le mankéé a ñéga yigil i, a nla tehe nseñ i pohol wada wap. Inyu mélés likoda i ngeñ, mankéé a nkena yigil a nlama hubus mandimbhe bôt ba nti inyu ngim maben. Jon hala a hindha bañ we ñem, tole hala a tômbôs bañ we ibale ba mpohol bé we bibôdle bi yigil. Ibale u nkôôba ngandak mandimbhe, u ga bana ngandak pôla i timbhe. Ndimbhe yada u nla kôôba i nla ba lisoñgol li ngim nlôñ Bibel. U nla yak kôôba i ti ndimbhe ni bibuk gwoñ wemede. *

18. Inyuki di nlama ti bikidik bi mandimbhe?

¹⁸ Ti mandimbhe ma yé sem kwep. Ngim mangéda, ndimbhe i i yé sem kwep,  ni i i nlet bé yon i yé i ti bôt makénd ngandak. Jon njômbi yés i nlama ba le di ti mandimbhe ma sem kwep. Boñ biliya le ma loo bañ pes linut. (Bingéngén 10:19; 15:23) Ibale nano a yé ngandak nwii le u yé u timbhege makoda, wen u nlama ti bana bape ndémbél. Ndi ibale u nti mbôñgô ndimbhe i i nom, hala a nla boñ le bape ba kon woñi i téé hinoo, ba hoñlak le ba ta bé le ba boñ kiki we. I bak ki le, bikidik bi mandimbhe bi nti ngandak bôt pôla i timbhe. Hala a yé maliga téntén ibale u yé mut bisu ba ntep inyu ti ndimbhe. U yéñ bañ ti ndimbhe i ntihba makas momasôna ma ndimbhe. Mbus ndimbhe i bisu i mpémés nlôm jam, u nla ti ndimbhe i nlona biyi bipe.​—Béñge minkéñék mi matila mini le “ Kii me nla pôdôl ngéda me ntimbe?”

19. Lelaa nkena yigil a nla hôla we, ndi kii u nlama boñ?

¹⁹ Yis mankéé a nkena yigil bisu bi ngéda le, u gwé ngôñ i timbhe ngim mbadga i tôbôtôbô. Ibale njel i yon u mpohol, u nlama tehe mankéé a nkena yigil ilole likoda li mbôdôl. Ngéda ba mpam ha liben li, hoo paa woo ngii kayéle mankéé nu a laa tehe wo.

20. Ni imbe njel di nla kal le, makoda ma mpôôna dina ni mawanda?

²⁰ U nlama yoñ makoda kiki dina ni mawanda moñ. Ibale bilôk bikéé bipe bi naña we i je ntôñ ni bo, ndi ba kal le hiki mut a kôôba ndék yom i je mu kiki a nlo. Lelaa w’a boñ? Bebek hala a nla tééñga we ndék, ndi u ga boñ kii yosôna u nla inyu lona ngim yom i i ga lémél bôt bobasôna. Nlélém ni Yéhôva nu a naña bés makoda, a nyônôs téblé yé ni ngandak gwom bilam inyu yés. (Tjémbi 23:5; Matéô 24:45) A nkon maséé i tehe bés di nlona likébla jés, to li nene bé bañga jam i mis més, ki le i yom yosôna di nla ti yo i. Jon kôôba loñge, u yoñ ki ngaba makoda ni njel mandimbhe moñ kiki la yoñ. Ni i njel i nyen, u ga unda le u nlo ndik bé i téblé i Yéhôva inyu je, ndi yak we u nlona likébla inyu ti bilôk bikéé.