1. I ngéda Yéhôva a mbéñge bagwélél bé, kii a ntehe?

YÉHÔVA DJOB “a nkon maséé ni [bagwélél] bé.” (Tjémbi 149:4) Kinje jam li nkônha maséé! Yéhôva a nyimbe bilem gwés bilam; a ntehe i yom di yé le di ba yani, jon a ñôt bés i nyeni. Ibale di ntéñbe ni nye, a ga ba lôñni bés i boga ni boga!​—Yôhanes 6:44.

2. Inyuki hala a nlédél ngim bôt i hémle le Yéhôva a ngwés bo?

² Bôt bahogi ba yé le ba kal le: ‘Me nyi le Yéhôva a ngwés ntôñ wé, ndi kii i nkwés me nkaa le Yéhôva a ngwés me tôbôtôbô?’ Kii i nla tinde mut i badba hala? Oksana *, nu a bi nok ndutu ngandak i ngéda a bé mañge, a nkal le: “Me bé maséé i ngéda me bi sôblana, me yila yak nsañal. Ndi 15 nwii i mbus ngéda, me bi bôdôl hoñol i mam mabe ma bi pémél me i ngéda me bé mañge. Hala a bi tinde me i hoñol le Yéhôva a ngwés ha bé me, ni le me kôli bé to ni gwéha yé.” Sita yada le Yua nu a yé nsañal, ni nu a bi nañ ikété ndutu, a nkal le: “Me bi ti memede nkikip yak Yéhôva inyule me bé yéñ lémél nye. Ndi me bé hoñol le a ta bé le a gwés me.”

3. Kii di ga tehe munu yigil ini?

³ Kiki bisita di nsima hana, i nla ba le yak we u ngwés Yéhôva ngandak, ndi hala a nlédél we i neebe le a ngwés we. Inyuki di nlama ba nkwoog nkaa le Yéhôva a ntôñ toi bés? Kii di nla boñ i ngéda di gwé i nya  mahoñol i? Di noode timbhe mambadga ma munu yigil ini.

4. Inyuki i yé béba i pééna le Yéhôva a ngwés bés?

⁴ Gwéha i nti ngui i ke ni bisu. Ibale di yé nkwoog nkaa le Yéhôva a ngwés bés, a nidik ki bés, hala a ga tinde bés i gwélél nye ni ñem wés wonsôna to ibale di mboma mandutu. Maselna ni hala, ibale di mpééna le Djob a ntôñ bés, “ngui [yés] y’a ba ititigi.” (Bingéngén 24:10, MN.) I ngéda di nimis makénd, di nkahal hoñol le Yéhôva a ngwés bé bés, di ga pala ki kwo i ngéda Nsohop a noode bés.​—Éfésô 6:16.

5. Kii i yé i sôk pémél i bet ba mpééna le Djob a ngwés bo?

⁵ Bikristen bihogi i len ini, bi bi tomb i pes mbuu inyule bi bé pééna le Yéhôva a ngwés bo. Mañ wada le James a nkal le: “Tolakii me bé sal i Bétel, me nidik likoda li hilémb hipe, me bé badba too Yéhôva a neebe bisesema me mboñ. I bi pam yak le me badba too a ñemble masoohe mem.” Sita Éva nu a yé ngwelnson nu ngéda yosôna a nkal le: “Me bi léba le i yé béba i pééna le Yéhôva a ngwés bés inyule hala a mboñ le ndék ni ndék di yin i pes mbuu. Ha ngéda i, di nimis maséé di ban-ga i nson u Yéhôva.” Mañ wada le Michael nu a yé nsañal nu ngéda yosôna, a nkal le: “Ibale u nhémle bé le Djob a ntôñ we, ndék ni ndék w’a nimis maada moñ ni nye.”

6. Kii di nlama boñ i ngéda di mbôdôl pééna le Nyambe a ngwés bés?

⁶ Dihéga di ntehe di ñunda le di nla nimis hémle yés ibale di mbôdôl hoñol le Djob a ngwés bé bés. Kii di nlama boñ ibale pééna i nkahal gwéé miñem nwés? Di nlama pala héya i pééna i! Bat Yéhôva le a hôla we i héñha i “nduña i” ni ‘nsañ u Nyambe u w’a tééda ñem woñ ni mahoñol moñ.’ (Tjémbi 139:23; Filipi 4:6, 7) Bigda le wetama bé nyen u gwé mahoñol ma. Lôk kéé i bôlôm ni i bôda ipe i njôs minlélém mi mahoñol. Yak bagwélél ba Yéhôva ba kôba ba bi boma nlélém ndutu. Di béñge i yom ndémbél i ñôma Paul i niiga bés.

7. Mambe mandutu Paul a bi boma?

⁷ Baa u gwé ngandak minson kayéle u nôgda le mbegee i nyuu we? Ibale hala, u nla nok i yom ñôma Paul a bé nôgda. A bééna nduña “inyu makoda momasôna.” (2 Korintô 11:23-28) Baa u nimis maséé moñ inyule u gwé kon u u mal bé? Paul a bééna “loo . . . ikété minsôn,” i i bé lama ba ngim kon, a bi bat Nyambe ngandak ngélé le a mbuubaha nye, ndi to yom. (2 Korintô 12:7-10) Baa libak joñ li kwéha li yé li tômbôs we? I bé i pam le Paul a nôgda nlélém jam. A bi kal le a yé “ngoo mut” inyule a bé jôs bibomb gwé hiki kel.​—Rôma 7:21-24.

8. Kii i bi hôla Paul i yémbél mandutu mé?

⁸ Tolakii Paul a bi boma mandutu ma momasôna, a bi téñbe ni Yéhôva. Ndi hee ngui i bé lôl nye? To hala kiki a bé yi le a yé kwéha mut, hémle yé inyu binoñ i bé ngui ngandak. A bé yi yak unu mbônga u Yésu le: ‘Hiki mut a ñunda le a nhémle [Yésu] . . . a mbana niñ boga.’ (Yôhanes 3:16; Rôma 6:23) Ñ, ikété bôt ba bé unda le ba nhémle binoñ, Paul a bé wada mu. A bé nkwoog nkaa le Yéhôva a yé bebee i nwéhél, yak i bet ba mboñ béba ikeñi ndi ba tam béba yap.​—Tjémbi 86:5.

9. Kii bibuk bi Paul di nléba i kaat Galatia 2:20 bi niiga bés?

⁹ Paul a bé hémle le Djob a bé gwés nye ngandak, jon a bi om Man wé i wo inyu yé. (Añ Galatia 2:20.) Yimbe bibuk a ngwélél mamélél ma nlôñ. Paul a nkal le: “Man Nyambe . . . a bi gwés me, a sem ki nyemede inyu yem.” Paul a bé hoñol bé le Nyambe a ta bé le a gwés nye inyule a nlôôha mandaa. Paul a bi hôñlaha lôk kéé yé i Rôma le: “Ngéda di bé di ngi yii baboñbéba, Kristô a wél inyu yés.” (Rôma 5:8) Yom yo ki yo i nla bé kéñ Yéhôva i gwés bés!

10. Kii kaat Rôma 8:38, 39 i niiga bés?

¹⁰ Añ Rôma 8:38, 39. Paul a bé yi le gwéha Nyambe i gwé ngui ngandak. A tila le hégél yo ki yo “i ga la bé bagal bés ni gwéha Nyambe.” Paul a bé yi le Yéhôva a bi hônba litén li Israel ngandak. A bé yi ki le Yéhôva a bi unda nye konangoo yé. Di nla hégda Paul a ñôt pék nyetama, a kalak le: ‘Ibale Yéhôva a bi neebe le Man wé a wo  inyu yem, inyuki me mpééna le a ngwés me?’​—Rôma 8:32.

11. Tolakii Paul a bi boñ bibéba di nléba i kaat 1 Timôtéô 1:12-15, inyuki a bé nkwoog nkaa le Djob a ngwés nye?

¹¹ Añ 1 Timôtéô 1:12-15. I bé i pam le i mam Paul a bi boñ ilole a nyila kristen ma tééñga nye. Di nla nok inyuki a kal le ikété baboñbéba, nyen a bé nu bisu! Ilole Paul a nyi maliga, a bé tééñga bikristen, a hak bihogi i mok, a tinak kiñ yé le ba nol bape. (Minson mi baôma 26:10, 11) Baa u nhégda i yom Paul a bé le a nôgda i ngéda a bé boma njohok kristen i i bi nimis bagwal bé inyule nye Paul a bi ti kiñ yé inyu nyemb yap? Paul a bi tam maboñok mé mabe, ndi a bé bé le a héñha mam. A bi hémle le Kristô a bi wo inyu yé, jon a bi tila le: “Ni njel konangoo i mbuma ñañ i Nyambe, me yé i yom me yé.” (1 Korintô 15:3, 10) Kii hala a niiga bés? U nlama ba nkwoog nkaa le Kristô a bi wo inyu yoñ, a ti ki we pôla i yila liwanda li Yéhôva. (Minson mi baôma 3:19) I jam li nlôôha nseñ i mis ma Nyambe li yé i yom di mboñ nano ni i yom di ga boñ dilo di nlo, ndi he bé i mam di boñ kôba i ngéda di bé ngi yila Mbôgi Yéhôva, tole i mbus sôble yés.​—Yésaya 1:18.

12. Lelaa bibuk di nléba i kaat 1 Yôhanes 3:19, 20 bi nla hôla bés i ngéda di nhoñol le di nhee bé to yom, ni le di kôli bé le ba gwés bés?

¹² Ngéda u nhoñol le Yésu a bi wo inyu bibéba gwoñ, u nla kal le: ‘Me kôli bé ni nya nsima i.’ Inyuki? Inyule kiki di yé bikwéha bi bôt, ñem wés u nla lôk bés, u tinde bés i hoñol le di nhee bé to yom, le ba kôli bé to gwés bés. (Añ 1 Yôhanes 3:19, 20.) Ha ngéda i, di nlama bigda le: “Nyambe a  nloo miñem nwés.” To ibale di nhoñol le Yéhôva a ngwés bé bés, to nwéhél a kôli bé nwéhél bés, hala a nkéñ bé nye i ke ni bisu i gwés bés ni i nwéhél bés. Di nlama kwés bésbomede nkaa le Yéhôva a ngwés toi bés. Inyu pam i boñ hala, di nlama bana lem i nigil Bibel, i soohe hiki ngéda, ni i tégbaha ngéda ni lôk kéé i bôlôm ni i bôda i i tiñi ni nye. Inyuki i yé nseñ i boñ i mam ma?

13. Lelaa yigil i Bibel i nla hôla bés? (Béñge minkéñék mi matila le “ Lelaa Bañga i Djob i nhôla bo?”)

¹³ Nigil Bibel hiki kel, ibale u gwé ngôñ i yi bilem bi Yéhôva. Hala a ga hôla we i nok ipam limbe likala a ngwés we. I yoñ ngéda i soñda mu minlôñ u ñañ hiki kel i ga hôla we i “téé mam loñge” i ñem woñ ni i mahoñol moñ. (2 Timôtéô 3:16) Mañ wada le Kevin nu a bé hoñol le a nhee bé to yom, a nkal le: “I yoñ ngéda i añ ni i ôt pék mu kaat Tjémbi 103 i bi hôla me i kodol mahoñol me bééna, ni i yi i jam Yéhôva a nhoñol toi.” Sita Éva nu di mbôk di sima a nkal le: “Mamélél ma kel, me nyoñ ngéda i ôt pék inyu yi mahoñol ma Yéhôva. Hala a nhôla me i ba nwee ni i lédés hémle yem.”

14. Lelaa masoohe ma nla hôla bés?

¹⁴ Soohe hiki ngéda. (1 Tésalônika 5:17) Inyu ba liwanda li mut, u nlama kwel ni nye hiki ngéda, u kalak nye i yom u nôgda. Nlélém jam won di nlama boñ inyu ba liwanda li Yéhôva. Ngéda di néhne nye ñem wés ikété masoohe, di ñunda le di mbôdôl nye ñem, ni le di nyi le a ngwés bés. (Tjémbi 94:17-19; 1 Yôhanes 5:14, 15) Yua nu di mbôk di sima a nkal le: “Ngéda me nsoohe, me ñañle ndik bé Yéhôva lelaa kel yem i ntagbe. Ndi me nyeelene yak nye i yom me nhoñol ni i yom me nôgda. Hala a bi boñ le, ndék ni ndék, me bôdôl tehe Yéhôva kiki Tata nu a ngwés bon bé, he bé kiki nwet bôlô.”​—Béñge minkéñék mi matila le “ Baa u ma añ yo?”

15. Lelaa Yéhôva a ñunda le a ntôñ bés?

¹⁵ Tégbaha ngéda ni lôk kéé i i tiñi ni Djob; i yéne bés likébla li nlôl ni Djob. (Yakôbô 1:17) Tata wés nu gwéha a ñunda le a ntôñ bés, ni njel lihaa likeñi li bilôk bikéé bi bôda ni bi bôlôm, bi bi ‘ngwés bés ngéda yosôna.’ (Bingéngén 17:17) Mu kaat Paul a bi tilna bikristen bi Kôlôsé, a bi sima môl ma ngim lôk kéé i i bi nit nye, a kal yak le  ba bi yilna nye “lingen li ngandak hogbe.” (Kôlôsé 4:10, 11) Yak Yésu Kristô a bi bana ngôñ le mawanda mé (biañgel ni bôt ba binam) ma nit nye, a ti ki bo mayéga.​—Lukas 22:28, 43.

16. Lelaa mawanda ma ma tiñi ni Djob ma nla hôla bés i bana maada malam ni Yéhôva?

¹⁶ Baa yak we u ma ôt nseñ ni mawanda Yéhôva a nti bés? Ibale u ñañle liwanda joñ li li yé nhôôlak i pes mbuu i yom u nôgda, hala a nkobla bé le u mbomb; hala a nla yak hôla we i keñgle ngim hiandi. Mankéé James nu di mbôk di sima a nkal le: “I ba liwanda ni minhôôlak mi bôt i bi hôla me ngandak. Ngéda i bé i pam le mahoñol mabe ma yuu me, ba bé yoñ ngéda i emble me, ba bigdaga me le ba ngwés me ngandak. Maboñok map ma ñunda le Yéhôva a ngwés toi me, ni le a ntôñ me.” Ñ, i yé toi nseñ le di bot mawanda ni lôk kéé i bôlôm ni i bôda.

17-18. Njee di nlama emble, inyuki?

¹⁷ Satan a gwé ngôñ le di waa jo sañ inyu boñ loñge. A nsômbôl le di hoñol le Yéhôva a ngwés bé bés, le di kôli bé ni tohi. Ndi kiki di ntehe munu yigil ini, tembee ipe i nloo bé i.

¹⁸ Yéhôva a ngwés we. U yé tik i mis mé. Ibale u nôgôl nye, u ga “yén ikété gwéha yé” i boga ni boga, kiki Yésu. (Yôhanes 15:10) Jon u emble bañ Satan tole kiññem yoñ i ngéda i nkéés we. Maselna ni hala, emble Yéhôva, nu a mbok mis i mam malam di mboñ. Ba nkwoog nkaa le “a nkon maséé ni bôt bé,” yak we!