1-2. (a) Inoñnaga ni kaat Éfésô 6:16, inyuki “ben ikeñi i hémle” i yéne bés nseñ? (b) Mambe mambadga di ga timbhe?

BAA u gwé “ben ikeñi i hémle”? (Añ Éfésô 6:16.) Ntiik. Kiki soso ben a nhô nyuu yosôna, hémle yoñ i ntat we munu bôô hiai ini nyonok ni malal ma nyega, bisañ, ni mana mam mape ma nkiha bé ni sômbôl i Djob.

² Kiki di niñil “dilo di nsôk,” di ga ke ni bisu i boma manoodana. (2 Timôtéô 3:1) Lelaa u nla wan ben yoñ i hémle inyu yi too i gwé ngui? Lelaa u nla tibil gwel ben yoñ? Di timbhe mambadga mana.

3. Lelaa bisônda bi bé bôñgôl biben gwap, inyuki?

³ Ngéda kôba, biben bi bisônda bi bé mbañak ni koo nuga. Bisônda bi bé hoo môô mu biben gwap inyu boñ le koo nuga i ôbi bañ, ni le bahoma ba bikei ba kôp bañ mañglét. Ngéda sônda i bé i yimbe le ben yé i yé ñôbak, i bé yoñ ngéda i tibil yo ilole i ntémb i gwét. Mambe maada ma yé ipôla hihéga hini ni hémle yoñ?

4. Inyuki u nlama wan ben yoñ i hémle, lelaa u nla wan yo?

⁴ Kiki bisônda bi kôba, di nlama wan ben yés i hémle hiki ngéda, inyu ba nkôôbaga i jo gwét. Bés bikristen, di njo sañ i mbuu, ñ di njôs yak mimbuu mimbe. (Éfésô 6:10-12) Mut numpe bé nyen  a’ bôñglene we ben yoñ i hémle. Kii i nla hôla we i ba nkôôbaga i kolba manoodana? Pog, soohe. Iba, gwélél Bañga i Djob inyu tehe wemede kiki Yéhôva a ntehe we. (Lôk Héber 4:12) Bibel i nkal le: “Bôdôl Yéhôva ñem ni ñem woñ wonsôna, u nigbene bañ bañga yoñ yi wemede.” (Bingéngén 3:5, 6) Inyu pam i boñ hala, noode le wan makidik u nyoñ masañ mana. Kiki hihéga, baa liyep li moni li ntééñga we dilo dini? Baa mu mangéda ma, u bi bigda mbônga u Yéhôva u u yé i kaat Lôk Héber 13:5 u u nkal le: “M’a yôi yaga bé me we, to yék we kekikel”? Baa mbônga u u bi kwés we nkaa le Yéhôva a ga hôla we? Ibale hala, wee ben yoñ i hémle i yé nkôôbaga loñge.

5. Kii u yé le u léba ibale u nwan hémle yoñ?

⁵ Ibale u ntibil wan hémle yoñ, wemede u yé le u ba nhelek. U nla pam i yimbe ngim bibomb i u tehge bé. Kiki hihéga, u nla léba le nduña i nlôôha, bitembee bi batjañgbene maliga bi ntômbôs hémle yoñ, tole u nimis makénd u bééna. Ibale u nyimbe hala, bimbe bitelbene u nla yoñ inyu kodol jam li?

6. Umbe ntén nduña di kôli bana?

⁶ Nduña yosôna i ta bé ibe. Kiki hihéga, di gwé ngôñ i lémél Yéhôva bo Yésu. (1 Korintô 7:32) Ibale di nkwo i béba ikeñi, nduña yés i yé le di témbna maada malam ni Djob. (Tjémbi 38:19) Nduña yés i yé ki le di lémél sobiina wés, bôt bés ba lihaa ni lôk kéé i mbuu.​—1 Korintô 7:33; 2 Korintô 11:28.

7. Kiki Bingéngén 29:25 a nkal, inyuki di nlama bé kon mut binam woñi?

⁷ Ndi, nduña i nlôôha i nla tômbôs hémle yés. Kiki hihéga, di yé le di kahal lôôha tôñ inyu bijek ni mambôt. (Matéô 6:31, 32) Inyu hôyôs i nduña i, di nla kahal lôôs ngéda yés yosôna i yéñ nkus. Di nla yak kahal gwés moni. Ibale di nyoñ bé yihe, hémle yés i ntomb di ôbôs ki maada més ni Yéhôva. (Markô 4:19; 1 Timôtéô 6:10) Di nla ki bana nduña i nlôôha ngéda di nyéñ lémél bôt. Di nla kahal kon woñi le bôt ba nol bés hiol tole ba kolba bés iloole di yéñ i lémél Yéhôva. Inyu tat bésbomede ni hiandi hini, di nlama yemhe Yéhôva le a ti bés hémle ni makénd.​—Añ Bingéngén 29:25; Lukas 17:5.

8. Kii di nlama boñ ibale di mboma batjañgbene maliga?

⁸ Satan “isañ bitembee,” a ngwélél i bet ba yé isi énél yé inyu tjam bitembee ikolba Yéhôva ni lôk kéé yés i bôda ni i bôlôm. (Yôhanes 8:44) Kiki hihéga, batjañgbene maliga ba ntjam bitembee ikolba ntôñ u Yéhôva mu internet, i nkuu biliñgeliñge, u mahop ni bakégikel. Bitembee bi bi yé mu nsoñgi u “makoñ ma hié” ma Satan. (Éfésô 6:16) Kii di nlama boñ ibale di mboma i nya bôt i? Di emble bañ bo! Inyuki? Inyule di nhémle Yéhôva di mbôdôl ki lôk kéé yés ñem. Ñ, di kwel bañ ni batjañgbene maliga tjagda! Di ga neebe bé le mut nye  ki nye tole yom yo ki yo i tinde bés i kwel ni bo, to i jôp i pééna ni bo.

9. Kii i nla pémél bés ibale di nimis makénd?

⁹ Hémle yés i nla tomb inyule di nimis makénd. Di nla bé tjél hoñol mandutu més. Ibale di ntjél hoñol mo, wee di yé kiki boñge. Ndi di nlama bé nwas le mandutu més ma yoña bés mahoñol, tiga le di hôya bisai bi mbuma ñañ Yéhôva a mbôn bés. (Masoola 21:3, 4) I nya mahoñol i i nla wéés bés kayéle di nimis makénd, di waa yak gwélél Yéhôva. (Bingéngén 24:10) Hala a pémlak bañ bés.

10. Bimbe biniigana di ñôt mu kaat sita yada i bi tila?

¹⁰ Di béñge lelaa sita yada i loñ Amérika i ntéñbe ni hémle yé mu kii a ntééda nlô wé nu a nkon ngandak. Mu kaat a tilna hikuu hikeñi hi Mbôgi Yéhôva, a kal le: “Ngim mangéda di yé di lôôha bana nduña kayéle di nimis makénd, ndi botñem yés i yé siñ. Me nlôôha ti mayéga inyu biniigana gwobisôna Yéhôva a nti bés inyu boñ le di bana hémle i ngui, ni le di hôyôs nduña yés. Biniigana bi bi nhôla toi bés, bi nti ki bés makénd. Bi nhôla bés i téñbe ni i hônba mandutu ma nlôl ni Satan.” Ndémbél i sita ini i ñunda bés le di nla bana makénd to ikété ndutu! Lelaa? Bigda le ngéda u gwé mandutu, Satan nyen a yé noode we. Ndi u hôya bañ le Yéhôva nyen a yé Lingen li hogbe. Ôt nseñ mu bijek bi mbuu a nti bés.

11. Inyu yi too hémle yés i ngi gwé ngui, mambe mambadga di nlama badba?

¹¹ Baa u nôgda le ngim jam i yii le u nlama boñ inyu lédés hémle yoñ? Baa masañ mana, u bi pam i yémbél nduña i nlôôha? Baa u bi tjél emble tole u bi tjél kwel ni batjañgbene maliga? Baa u bi bana makénd ikété mandutu? Ibale hala, wee hémle yoñ i nlet. Ndi di nlama yoñ yihe inyule  Satan a gwé bijôl bi gwét bipe a noode gwélél inyu jôs bés. Di béñge jôl gwét yada mu.

12. Kii hép nkus i nla tinde bés i boñ?

¹² Hép nkus i nla yoña bés kayéle di yoñ ha bé ngéda ni ben yés i hémle. Ñôma Paul a kal le: “Sônda yo ki yo i mpégés bé yomede ni mam ma niñ ini, le ndi i lémél nu a tila yo i nson sônda.” (2 Timôtéô 2:4) Bisônda bi Rôma bi bé lama bé sal bôlô ipe. Kii i bé le i pémél sônda ibale i noñ bé i mbén i?

13. Inyuki sônda i bé lama bé yoñ ngaba i mam ma nyuñga?

¹³ Hégda le jam lini. Bisônda bi yé hianda kegla ni pa minsoñ yap, ndi wada wap a ta bé. A yé i tison inyu yibil sabe yé. Kiki kôkôa i nkwo, bisônda bi nyoñ ngéda i béñge bijôl gwap bi gwét ni i hôl pa minsoñ yap. Ndi nwet a gwé sabe a ntégbaha ngéda yé i kôôba nyuñga yé inyu hilo hi noñ ha. Kel i nye bañ, gwét bi puhe bo. Imbe sônda i mba bebee i jo, ni i kônha ñane wé maséé? Njee u yé le u gwés le a ba we ipañ, i sônda i bi kôôba tole i i bi ke nyuñga?

14. Kiki di yé bisônda bi Kristô, limbe jam li yéne bés nseñ?

¹⁴ Kiki bañga bisônda, di nlama bé nwas le jam jo ki jo li kéñ bés njel i noñ njômbi yés i bisu bisu i i yé le di kônha Baane bés maséé, hala wee Yéhôva bo Kristô. Di ntehe le i jam li li nloo mam momasôna di nla kôs i nkoñ ’isi u Satan. Di nlama ti ngéda yés ni ngui yés yosôna i gwélél Yéhôva, i tibil bôñgôl ben yés i hémle ni bini bijôl bi gwét bi mbuu bipe.

15. Paul a béhe bés le kii, inyuki?

¹⁵ Di nlama ba nkôôbaga hiki ngéda! Inyuki? Ñôma Paul a béhe le: “Bôt ba nai ndigi le ba mba mingwañ” ba ga “ke haa ni hémle.”  (1 Timôtéô 6:9, 10, NWT.) I buk ini le “ke haa” i ñunda le ibale di nkahal yéñ nkus u w’a bane bé bés nseñ di nla tjôô mam ma mbuu. Di nla kwo ikété “ngandak minheña mi bijôñ ni mi mi nôgha njôghe.” Iloole di nwas le i nya minheña i i o mu miñem nwés, di nlama tehe nwo kiki bijôl bi gwét bi bi nla boñ bés béba.

16. Ñañ u mpémél i kaat Markô 10:17-22 u nlama tinde bés i badba mambe mambadga?

¹⁶ I nla ba le di gwé ngandak moni kayéle di nla somb ngandak masañgô. Baa i yé béba i nsomb gwom bi bi tane bé bés nseñ nano? Hala a ta bé béba ngéda yosôna. Ndi di badba le mambadga mana: To ibale me nla somb ngandak gwom, baa m’a bana ngéda ni ngui i bôñgôl gwo? Baa ñem w’a lôôha ba me mu? Baa gwéha yem inyu masañgô i ga tinde me i boñ kiki mañge wanda nu a bi tjél nsébla u Yésu, ngéda a bi naña nye i kéñbaha nsoñ wé? (Añ Markô 10:17-22.) Kinje loñge jam inyu yés le di suhus likala jés li niñ, di gwéélak ki ngéda yés ni ngui yés i boñ sômbôl i Djob!

17. Kii di nlama bé hôya kekikel?

¹⁷ Di hôiga bañ le di yé gwét, jon hiki kel di nlama ba nkôôbaga. (Masoola 12:17) Lôk kéé yés i bôda ni i bôlôm i nla bé beegene bés ben yés i hémle. Hiki wada wés nyen a nlama tibil gwel ben yé i hémle.

18. Inyuki bisônda bi ngéda kôba bi bé lama tibil gwel biben gwap?

¹⁸ Ngéda kôba, sônda i bé kôs bibégés inyu ñem wé lôs i gwét. Ndi ngéda a bé huu ngi ben yé, hala a bé nye hison. Man Lôk Rôma wada le Tacitus nu a bé mut miñañ a tila le: “Ngeñ sônda i ntjôô ben yé, hala a yé nye wonyuu i bilim.” Njom i yon i bé nyégsa sônda i tibil gwel ben yé.

19. Lelaa di nla tibil gwel ben yés le hémle?

¹⁹ Di nke ni bisu i tibil gwel ben yés i hémle ngéda di nke makoda, ni ngéda di ñañal jôl li Yéhôva ni Ane yé ni njel likalô. (Lôk Héber 10:23-25) Ni le di añ Bañga i Djob hiki kel, di soohege Yéhôva le a hôla bés i bii maéba mé ni biniigana gwé bisélél. (2 Timôtéô 3:16, 17) Jôl gwét yo ki yo Satan a ñôô ikolba bés i ga nyo bé bés, tole i ga lona bé bés njôghe i i mal bé. (Yésaya 54:17) ‘Ben yés ikeñi i hémle’ i ga tat bés. Di nlama sal ni makénd ni lôk kéé yés i bôda ni i bôlôm. Di ga yémbél ndigi bé sañ Nsohop a njôs bés hiki kel, di ga bana nsima i ba i pes Yésu ngéda a ga yémbél Satan ni bôt bé.​—Masoola 17:14; 20:10.