DI NLA hégha banigil Bibel ni bayéñ gôl. Banigil Bibel ba nlama sal ni ngui, ba nwanak Bitilna ibabé waa, inyu léba pék i i nlôôha bana mahee. Kiki yak bés di yé banigil Bibel, bimbe biniigana di nla ôt i wan manjel maa bayéñ gôl ba ngwélél?

Hégda le, u yé ke bebee ni lép, ndi u ntehe jam li mpôôna man ngok nu a mbai i hiañgaa. Ngéda u nhôdôp inyu bada yo, u nkon maséé i tehe le gôl i. I mpam bé nsam tole jis li pobo bikeñi, ndi bañga diamañ i ntôl iloo yo. Ibabé pééna, w’a yéñ ha homa nu, inyu tehe too u nla léba tik ngok ipe.

Nlélém jam won u bi tagbe, hala a yé ndék ñwii nano, i kel Mbôgi Yéhôva yada i bi lo i mbai yoñ inyu toñle we botñem i yé ikété Bibel. Bebeg u ngi hoñlak loñge lelaa u bi léba inyu ngélé bisu maliga ma Bibel, ma ma yé kiki tik ngok. Bebeg jam li bisu u bi léba li yé ngéda u bi tehe jôl li Djob ikété Bibel inyu ngélé bisu. (Tjémbi 83:19) I nla ki ba le, u bi nigil le u nla ba liwanda li Yéhôva. (Yakôbô 2:23) Ha ngéda i nyen u bi nôgda le, ibabé pééna, u nléba yaga jam li li gwé mahee iloo gôl! Hala a bi kônde ti we ngui i léba tik ngok ipe i pes mbuu.

Ngim mangéda, minluñ mi gôl mi ntegep ikété diléléba di nkuli. Mbus ndék sôñ ndigi, bayéñ gôl ba ba nsal ni ngui, ba nla léba mu bahoma ba, ngandak kilô i gôl, i i nla hee jam kiki bo môm ma dikôô ma dollar.

Ngéda u bi bôdôl nigil Bibel ni Mbôgi Yéhôva, bebeg u bi nôgda le u yé kiki nyéñgôl nu a nseghe biték bi gwé ngandak gôl. I nla ba le, i soñda minlôñ mi Bibel wada i mbus wada, i bi kéñbaha yi yoñ, i hôlôs ki we i pes mbuu. Mu kii u bé tibil wan maliga ma Bibel, u bi nigil lelaa u nla kôôge Yéhôva bebee, ni lelaa u nla tééda wemede ikété gwéha yé inyu niñ boga.​—Yakôbô 4:8; Yuda 20, 21.

Ndik kiki nyéñgôl nu a nsômbôl léba homa tik ngok i gôl i ntegep, bebeg yak we u bi boñ ngandak biliya inyu léba lisôô li nkus i pes  mbuu. Ngéda u bi mal kôhna biniigana bi Bibel bi bisu, bebeg le ñem woñ u bi tinde we i boñ mam ma nsômbla inyu ti wemede nkikip yak Yéhôva, ni kôs sôble.​—Matéô 28:19, 20.

Nyéñgôl a nla léba ngandak kilô i minluñ mi gôl ikété ngok i tôbôtôbô. Ngok ipe mu, i gwé jôga li gôl mukété yap, kayéle ba nlama bol yo inyu pémés gôl i. I bitéé bi mis, ini gôl i mpala bé nene mu ngok. Inyuki? Inyule ba nlama bol jam kiki bo tôn i ngok yada, ndik inyu léba jam kiki bo 10 gram i gôl! Ndi to hala, nyéñgôl a nyi le hala a yé mahee le a boñ biliya bi.

Yak bés di nlama boñ biliya i mbus di mal yi “bibuk bi mbôk bi maéba ma Kristô.” (Lôk Héber 6:1, 2) U nlama boñ biliya bi ngui inyu léba biniigana bi mondo, ni maéba malam mu yigil yoñ i Bibel. Jon, kii u nlama boñ kayéle yigil yoñ i Bibel i hôlôs we i pes mbuu, to ibale u bi meya u nigil Bitilna hala a yé ngandak ñwii nano?

Bana ngôñ i nigil hiki ngéda. Tibil wan yak disii di mam. Ke ni bisu i boñ biliya bi ngui, ndi w’a léba yi i Djob ni maéba mé, ma ma yé ikété Bitilna kiki tik ngok. (Rôma 11:33) Inyu kéñbaha yi yoñ i Bitilna, tibil gwélél bisélél inyu nyiña, bi bi yé ikété hilémb hioñ. Bana wongut mu kii u mbem maéba ni mandimbhe inyu mambadga moñ ma Bibel. Bat bape le ba kal we bitilna ni bikaat ba nléba, bi bi yé loñge, tôbôtôbô inyu ti bôt mahôla ni makénd. Kal bôt bape mam malam u nléba mu yigil yoñ i Bañga i Djob.

I yé mbale le, ngôñ yoñ i nlama ndik bé ba le u hôlôs yi yoñ. Jon ñôma Paul a bi béhe le: “Yi i nhumbul nyuu.” (1 Korintô 8:1) Inyu hala nyen u nlama boñ biliya inyu tééda suhulnyu yoñ, ni lédés hémle yoñ. I bana lem i bégés Djob ni lihaa joñ ni nigil Bibel wemede, i ga hôla we i niñ inoñnaga ni matiñ ma Yéhôva. I ga tinde ki we i hôla bôt bape. Ndi iloo mam mana momasôna, w’a ba maséé, inyule w’a léba jam li li yé mahee iloo yaga gôl.​—Bingéngén 3:13, 14.