Minlôñ mini mi mpôdôl bilem bôô: “Litam li mbuu li yé gwéha, maséé, nsañ, wongut, loñgeñem, ñem nlam, hémle, ñemlima, hôtnyuu.” Ndi bilem bini gwotama bé gwon mbuu Djob u nla hôla bés i bana.

Di béñge i yom ñôma Paul a bi kal ilole a mpôdôl bilem bi: “Minson mi minsôn . . . mi yé malal ma nyega, nyega, maboñok mabe ngi wonyuu, i bégés bisat, maada ni mimbuu mimbe, ôa, momol, njôñ, nyayak, mindañ, mbagla, mintôñ mi mbagla, tama, lihiua, mangand ma nyega, ni mam mape kiki ma.” (Galatia 5:19-21) Paul a bé le a sima “minson mi minsôn” mimpe. (Kôlôsé 3:5) Nlélém, i ngéda a bi mal pôdôl litam li mbuu, a kal le: “Mbén i i nkolba i nya mam ini i ta bé.” Paul a bé sima bé bilem bilam gwobisôna mbuu Djob u nla hôla bés i bana.

Di ntibil nok jam lini i ngéda di nhégha bilem Paul a bi sima i kaat Galatia ni i jam a bi tilna likoda li Éfésô: “Litam li mapubi li yé i bana ñem nlam ikété mam momasôna, lôñni telepsép ni maliga.” (Éfésô 5:8, 9) Ñ, “ñem nlam” u yé ikété “litam li mapubi” u bak ki ikété “litam li mbuu.”

Paul a bi ti yak Timôtéô makénd le: “Noñ telepsép, ndéñbe i gwélél Nyambe, hémle, gwéha, hônba, ni ñemlima.” (1 Timôtéô 6:11) Mu bilem bi, biaa ndigi gwon ba nsima mu “litam li mbuu,” hala wee hémle, gwéha ni ñemlima. Ndi yak Timôtéô a bééna ngôñ ni mahôla ma mbuu Djob inyu bana bini bilem bipe Paul a bi sima: telepsép, ndéñbe i gwélél Nyambe ni hônba.​—Hégha Kôlôsé 3:12 ni 2 Pétrô 1:5-7.

Jon, kaat Galatia 5:22, 23 i nsima bé bilem bilam gwobisôna bikristen bi nlama bana. Mbuu u Djob u nla hôla bés i bana bilem bôô bi “litam li mbuu.” Ndi inyu yila nhôôlak kristen ni “haba mut yondo nu a bi héga inoñnaga ni sômbôl Nyambe ikété bañga telepsép ni bañga ndéñbe,” di nlama ki hôlôs bilem bilam bipe.​—Éfésô 4: 24