Biniigana bi mpémél ikété Bibel, bi gwé ngui ngandak inyu héñha biniñ bi bôt. Di yoñ dihéga diba inyu toñol jam li: Rikardô bona Andréa.

RIKARDÔ: Ngéda me bééna ndigi 15 nwii, me bi jôp i lôñ i mintonba. I lôñ i, i bi tinde me i héñha niñ yem. Njômbi yem i bé le me tégbaha jôm li nwii i ndap mok! Mut numpe a nla tehe hala kiki bijôñ. Ndi i libôga jem, i bet ba bé bégés ni ti lipém, ba bé i bôt ba bi boñ mok. Me bé yéñ pôôna bo.

Me bi boñ mam momasôna ntonba u nla boñ, kiki bo i ôt hibañga, malal ma nyega, ni bisañ. U wada, di bi leñna mangaa, bés ni lôñ i mintonba ipe. Me bé hoñol le ma ga wo, ndi me bi pei. I mbus ha, me bi bôdôl bok niñ yem, me kit ki le me nlama héñha. Ndi kii me bé le me boñ? Kii i bé le i hôla me?

Lihaa jem li bé bé maséé. Li nogok ndutu. Ndi lihaa li nyandôm wem li bé maselna. Me bé yi le ba bé biloñge bi bôt, ni le Bibel yon i bé éga bo. Bon ba bi niiga me le jôl li Djob le Yéhôva. I mbus le di bi mal leñna mangaa, me bi soohe Yéhôva le a hôla me, me sim-ga ki jôl jé. Me bi hel le i mbus hilo hiada, Mbôgi Yéhôva yada i koode likôga jem! I bôdôl ki éga yigil yem i Bibel.

Me bi sôk me jo sañ ikeñi. Minlômbi nwem mi mawanda mi bé mi nsébél me nsiñga le me témb ni bo. Me bé timbhe hiki ngéda le to. Me bi téñbe i nigil Bibel, me yé maséé le me bi boñ hala! Niñ yem i bi lôôha lama, me léba ki bañga maséé.

Me nhoñol masoohe me soohe Djob kel yada le me bé bebee i tégbaha jôm li nwii i ndap mok kiki ntonba ndigi inyu kôhna lipém. Jon me bi bat nye ikété masoohe le a hôla me i gwélél nye i ndék yosôna jôm li nwii kiki nsañal nu ngéda yosôna inyu hôla bôt bape kiki yak me ba bi hôla me. Nyambe a bi timbhe masoohe mem, inyule me bi tégbaha 17 nwii kiki nsañal nu ngéda yosôna! Me nkal ki le me mah bé ke i mok.

Ikété mawanda mem ma behee, ngandak i ngi yii i mok. Bape ki, ba bi wo. Ngéda me mbéñge mbus, me nti lihaa jem mayéga. Li bé bebee i boñ mahéñha ni i kil ikété biniigana bi Bibel. Kiki me bé nañ, me bi nigil i ti bo lipém iloo lôñ yem i mintonba. Ndi iloo hala, me nti Nyambe mayéga inyule a bi niiga me bañga niñ.

 ANDRÉA: Me bi gwééne, me néñél ki i homa liyep i het hibañga, wip, manola ni libambe bi bé tôl. Pua yem a bé nkol u moog, a ôdôk ki hibañga. Bona mama yem ba bé jo bisañ hiki ngéda, ba nomlak ki.

Me bi bôdôl nyoo moog me bak me ngi yii mañge, me ôdôk ki hibañga. Me bi tégbaha binéñél gwem i nip gwom i minloñ ni i nuñul ki gwo. Kiki me bé ke ni bisu i nañ, pua yem a bi boñ le me ni nye di bôdôl kiha inyu boñ mam mabe, ha ni nyen a bi niiga me lelaa me nla boñ inyu jôpna hibañga ni gwom bipe i loñ yés me nuñul ki gwo, ibabé le ngomin a yi. Me bi hoo​—kwo ngwañ. Kel yada bisônda bi bi jôp i meni, bi gwel me, bi ha me i mok nwii mintan inyule me bi noode nol mut.

Kegla yada, ba bi legel nwin ni ndap mok yosôna le bôt ba mok ba nla ke i nigil Bibel lôñni Mbôgi Yéhôva. Me bi kit le ma ga ba ha. I yom me bi nok yokel i bé i téé, jon me bi bôdôl nigil Bibel ni Mbôgi Yéhôva. Ba bé kôdi bé Bitilna, ndi ba bi niiga me kii i yé maboñog ma telepsép ma Djob.

Me bi hoo nôgda le me bé bé le me héñha i nya i kôli ibabé le ba hôla me, téntén ngéda mawanda mem ma behee ma bé gwés bé i yom me bé boñ. Ha nyen me bi soohe inyu kôhna ngui ni pék, ni Yéhôva a hôla me. Me bi kôhna yak ngui i añle bôt ba mok bape i yom Bibel i niiga.

Ngéda me bé lama pam i mok, me bé ñunbak inyule me bé sômbôl le ba kônde nwas me ikété ndap mok! Ngéda me bé ke, ngandak bôt ba mok i bi tjôla me. Bape ba bé kal ni gwiiha mis le: “A pastô, u kenek loñge.”

Me nla bé to hégda lelaa niñ yem i bé le i ba ibale me neebe bé le Yéhôva a niiga me. Me yé maséé, maséé kiyaga inyule Djob a ngwés me, a bi yoñ bé ki to me kiki nimlak mut. *