Bôt ba bôlô ba nke bé bôlô ngwéé. Ndi, ba ngwés bôlô, jon ba nsal ni ngui inyu bomede ni inyu hôla bape​—to ibale bôlô i, i gwé bé lipém.

To di ngwés to di ngwés bé, di gwé ngandak mam di yé nyégsaga i boñ. Tolakii ngandak bôt i len ini i ngwés bé bôlô, bés di nyi le i ba mut bôlô i yé bés nseñ ngandak.​—Ñañal 3:13.

“Me bi tehe le ibale u nsal ni ngui, u yé maséé ikété ñem woñ. Hala a bi boñ me le me kahal gwés bôlô. I yoñ bitelbene inyu ba mut a nsal ni ngui i nla hôla we i kôhna jôl lilam.”​—Reyon.

LITIÑ LI BIBEL: “Ngweege yosôna i gwé yéñe.”​—Bingéngén 14:23.

Matode ma ma noñ ha, ma nla hôla we i tehe nseñ u bôlô.

Yoñ ngéda i nigil i sal loñge. U nlama diihe bibôlô gwon to ibale bi yé bibôlô bi mbai, to bi ba nti we i suklu, to bi u nsal i homa woñ bôlô. Hiki ngéda le u yé sal ngim bôlô​—u nigil i hoo sal yo, ni i sal ki yo loñge. Kiki u mba ni meya sal bôlô yoñ, hala ki nyen i mba i nke ni bisu i lémél we.

LITIÑ LI BIBEL: “Baa u ntehe mut nu a yé likeñge ikété ngweege yé? A’ telep i bisu bi bikiñe; a’ telep bé bisu bi bôt ba ba yé puye puye (gwañga bi bôt).”​—Bingéngén 22:29.

Yoñ ngéda ni i bôlô u nsal. Ikété manjel momasôna, ngéda di nsal bôlô yés kiki i nsômbla, hala a nla hôla ki bôt bape. Kiki hihéga, ibale u ntibil sal bibôlô gwoñ bi mbai kiki i mbéda, hala a mboñ le mbegee i bôt bape ikété lihaa joñ i nhoi.

LITIÑ LI BIBEL: ‘Maséé ma nlôôha ba i ti iloo i kôs.’​—Minson mi baôma 20:35, MN.

Boñ iloo i bôlô ba nti we. Ilole u sal ndigi i bôlô ba nti we, u nla noode sal iloo i yom ba bémlak we. Hala a ñunda le wen u nkena niñ yoñ​—sal iloo kiki ba bémlak we, he bé inyule ba nyégsa we, ndi inyule u mpohol i boñ hala.​—Matéô 5:41.

LITIÑ LI BIBEL: “Loñge yoñ i nene ndik bañ wengoñle ba nhélés we hélhak, ndi inyu sômbôl yoñ wemede.”​—Filémôn 14.

Tibil hégha mam. Bôt ba bôlô ba ta bé bôt ba yeñgi, ndi ba nsal bé to kiki binuga. Ba nsal ni ngui ikété maséé, ba yik ki yoñ noi.

LITIÑ LI BIBEL: “Woo wada nyonok ni ñem nwee u yé loñge iloo moo ima nyonok ni ngéba ni linoñ mbebi.”​—Ñañal 4:6.