INYU BABIINA
2: Li boñ mam ntôñ
KII HALA A NKOBLA
Ibale ikété ndap libii, nwaa bo nlôm ba mboñ mam ntôñ, ba mpôôna nkena avioñ bo nhôla wé, bo iba ba gwé njômbi yada mu liké jap. To ngéda mandutu ma mpémél bo, hiki sobiina a nhoñol le bo “iba” bon ba nlama jôs mo he “wada” nyetama bé.
LITIÑ LI BIBEL: “Ba ta ha bé iba, ndik nsôn wada.”—Matéô 19:6.
“Woo wada u nkañ bé jomb. Nwaa bo nlôm ba nlama boñ mam ntôñ inyu boñ le libii jap li ke loñge.”—Kristôfer.
INYUKI HALA A YÉ NSEÑ
Ngéda ngimanôgla i mpam, babiina ba ba mbéna bé boñ mam ntôñ ba mbôdôl ômna minsohi iloole ba tibil wan i yom i nke bé.
“Li boñ mam ntôñ li yé nseñ ngandak inyu libii. Ibale me ni nlô wem di salak bé ntôñ, ki di yé ndik kiki bo gwañga bi bôt bi bi niñ ikété tuñ yada, ha kiki nwaa bo nlôm bé—hala wee bôt iba ba ba niñ ntôñ ndi ba gwé bé hoñol yada ngéda i mpam le ba yoñ makidik.”—Aléksandra.
JAM U NLA BOÑ
TIBIL WANBA
-
Baa me ntehe le moni me nkôs mi yé ndik inyu “yem metama”?
-
Baa inyu boñ le me tégbaha loñge ngéda, me nlama ndik ba haa ni sobiina wem?
-
Baa me nlama keñgle lihaa li sobiina wem to ibale a gwé manôgla malam ni jo?
KWEL NI SOBIINA WOÑ
-
Baa mambe mam ikété libii jés di mboñ loñge ngéda di yé ntôñ?
-
Bimbe bilem hiki wada wés a nlama hôlôs?
-
Bimbe bitelbene di nla yoñ inyu boñ le di sal loñge ni nsañ wonsôna?
NDÉK MAÉBA
-
Hégda le ni yé tuk bol, hiki wada nan a bak hié hikip. Iloole ni ba dikip diba, bimbe bitelbene ni nla yoñ inyu boñ le we ni sobiina woñ ni ba hikip hiada?
-
Iloole u badba le: ‘Lelaa me nla boñ inyu yémbél jam lini?’ Badba le: ‘Lelaa di nla boñ inyu yémbél jam lini?’
“I ta bé nseñ i yéñ yi njee a gwé njom. Ndi, nsañ ni adna gwon bi yé nseñ ngandak ikété ndap libii.”—Étan.
LITIÑ LI BIBEL: “Mut nye ki nye a tôñ bañndigi inyu yé nyetama, ndi a tôñ inyu bôt bape.”—Filipi 2:3, 4.
