Inyuki Ni Nlama Ti Bébomede Nkikip Yak Yéhôva?

“I u unu, añgel i Nyambe nu me ngwélél . . . i ntelep me ipañ.”—MINSON MI BAÔMA 27:23.

1. (a) Kii mut a nlama ndugi boñ ilole a nkôs sôble? (b) Mambe mambadga di ga timbhe?

 “BAA u ntam bibéba gwoñ, u ti wemede nkikip inyu boñ sômbôl i Yéhôva, u neebe ki le Yésu Kristô a yé njel Nyambe a ngwélél inyu tohol we?” I yé mbadga yada ikété mambadga ima ba mbat bakôs sôble i mamélél ma nkwel u sôble. Inyuki bikristen bi nlama ti gwomede nkikip yak Yéhôva? Inyuki i yé nseñ i boñ hala? Inyuki Yéhôva a neebe bé bibégés bi bôt ba nti bé bomede nkikip inyu gwélél nye? Ilole di ntimbhe mambadga ma, di bôk ndugi di béñge kii i yé i ti wemede nkikip.

2. Lelaa mut a nti nyemede nkikip yak Yéhôva?

² I ti wemede nkikip yak Yéhôva wee kii? Di béñge lelaa ñôma Paul a bi pôdôl maada mé ni Djob. I ngéda môñgô i het Paul a bé u bé pôk, ha nyen a bi añle i bôt ba bé mu i môñgô ni nye njee a yé Yéhôva, a séblak nye le “Nyambe nu me ngwélél.” (Añ Minson mi baôma 27:22-24.) Bañga bikristen i ngwélél Yéhôva. Maselna ni hala, nkoñ ’isi wonsôna u yé “isi ane i mut mbe.” (1 Yôhanes 5:19) Mut a mbôdôl gwélél Yéhôva i ngéda a nti nyemede nkikip yak Yéhôva ikété masoohe, yak Yéhôva a leege ki masoohe mé. I ti wemede nkikip i mbéñge hiki mut i mbombom. Mut a mboñ hala ilole a nkôs sôble.

3. Sôble i Yésu i nkobla le kii, lelaa banigil bé ba yé le nigle ndémbél yé?

³ Yésu nyemede a bi ti bés ndémbél i boñ sômbôl i Djob. Bon ba Isreal bobasôna ba bé ntinak kikip yak Yéhôva ibôdôl bo i ligwéé; jon yak Yésu, ibôdôl ligwéé je, a bé ntinak nkikip yak Yéhôva. Ni njel sôble yé, a bi boñ yom i i bé lel i yom Mbén i bé bat. Paul a nkal le Yésu a kal Isañ le: “Nun-ki, me nlo . . . le me boñ sômbôl yoñ, a Nyambe.” (Lôk Héber 10:7; Lukas 321) Kiki Yésu a bi sôblana, a bi unda le nyemede nyen a mpohol i lo yak Isañ, i boñ sômbôl i Nyambe. Yak banigil ba Yésu ba nyoñ sôble kiki nye. Ndi inyu yap, sôble i ñunda i mbamba le ba mbôk ba ti bésbomede nkikip yak Yéhôva ikété masoohe.

Inyuki i ti bésbomede nkikip i yé nseñ

4. Lelaa liwanda ipôla David bo Yônatan li ñunda makidik mawanda ma nlama yoñ?

⁴ Inyu bikristen, i ti bésbomede nkikip i yé jam li nlôôha ba nseñ. Hala a nlel le mut a nyoñ makidik i boñ ngim jam. Inyuki i boñ hala i yéne bés nseñ? Inyu nok i jam li, di yoñ hihéga hi mut nu a mbép woo i tôl le a ga yônôs ngim mbôn-ga. Kiki bo i ba liwanda ni mut. Inyu tééda liwanda joñ, u yé nyégsaga i neebe ngim mam. Hala a mbat le u yoñ ngim makidik. U nlama yoñ ngéda inyu liwanda joñ. Ndémbél ikeñi yada ikété Bibel, i maada malam ipôla mawanda, i yé ipôla David bo Yônatan. Bo iba ba bi kum soñ i tééda maada ma yé ipôla yap. (Añ 1 Samuel 17:57; 18:1, 3.) Bun bé le mawanda ma kum soñ hala; ndi ni maliga, maada ipôla mawanda ma nkônde let i ngéda hiki wada a mboñ biliya i tééda maada ma.—Bingéngén 17:17; 18:24.

5. Lelaa nkol u bé le u ke ni bisu i ôt nseñ ni matééda malam ma nwet wé?

⁵ Mbén Nyambe a ti bon ba Isreal i ñunda hihéga hipe het liwanda lilam li nlona bisai. I ngéda nkol u gwé loñge nwet, u yé le u gwés ke ni bisu i sélél nwet wé niñ yé yosôna inyu matééda malam nwet wé a ntééda nye. Mbén i bé kal le: “Ibale nkol u nai, u kal le: ‘Me ngwés nwet wem, nwaa wem, ni bon bem; me gwé bé ngôñ i ba kunde,’ nwet wé a nlama kena nye i bisu bi bañga Nyambe. I mbus, nwet wé a ga kena nye i nwemel tole i tembee nwemel, a ga tôp nye ôô ni tubul ôô, a ga ba nkol u nwet wé niñ yé yosôna.”—Manyodi 21: 5, 6.

6, 7. (a) Umbe nseñ di nôt i ngéda di nyoñ makidik? (b) I ti wemede nkikip yak Yéhôva i nlona bimbe bisai?

⁶ Libii li yé jam li li mbat makidik ma ngui ngandak. Li ta ndik bé i yoñ makidik i sane ngim mapep, ndi iloo hala, babiina ba nyoñ makidik inyu ba ntôñ niñ yap yosôna. Bôt iba ba ba nyoñ makidik i niñ ntôñ ibabé i biiba inoñnaga ni mbén, ba nla bé nôgda bañga maséé, ngi woñi wo ki wo, to i bon ba ngwal. Ndi, i ngéda munlôm bo muda ba njôp i libii li li nti lipém, ni ita civil, ba neebe ki i niñ inoñnnaga ni likak jap, ha nyen ba ntibil nok le ba yé nyégsaga noñ matiñ ma Bibel, ba mboñ ki biliya i pamba ikété mandutu ma ma nkwél bo, ba boñok hala ni gwéha.—Matéô 19:5, 6; 1 Korintô 13:7, 8; Lôk Héber 13:4.

⁷ I ngéda kôba, i bôt ba ba bé sômbôl bôdôl sal ntôñ ba bé lama sane ngim mapep. (Matéô 20:1, 2, 8) Hala a yé nlélém yak i len ini. Kiki hihéga, ilole u nyibil homa bôlô tole u mbôdôl sélél mut, i yé loñge le ni nôgla, ni sane ngim mapep. I sem kwep, i yoñ makidik ma ngui i nlédés maada ipôla mawanda ni babiina, i mboñ ki le nwet bôlô a nôgla loñge ni i bet ba nsélél nye. Bôô ni ngélé yañen ni i ti bésbomede nkikip ilole di nsôblana; i boñ hala i nlédés maada més ni Yéhôva! Nano, di béñge bisai bon ba Isreal ba bé kôs mu maada ma tôbôtôbô ba bééna ni Yéhôva; di béñge lelaa makidik ma, ma bé ma gwé ngui ilel makidik ma yañga le mut a nla yoñ.

Manôgla bon ba Israel ba bééna ni bisai ba bé kôs

8. Kiki litén li Israel li bi kum soñ le li ga nôgôl Nyambe, kii hala a bé kobla inyu yap?

⁸ Lôk Israel yosôna i bi ntina nkikip yak Yéhôva i ngéda ba bi kum soñ i gwélél ndik nye kiki Nyambe wap. Yéhôva a bi naña bon ba Israel bobasôna isi hikôa hi Sinai, a kal bo le: “Ibale ni nôgôl toi me, ni tééda ki malômbla mem, ibabé pééna, ni ga yila tik yem yom ipôla matén momasôna.” Litén jolisôna li timbhe ni kiñ yada, li kal le: “Di yé bebee i boñ mam momasôna Yéhôva a nkal.” (Manyodi 19:4-8) Inyu bon ba Israel, i neebe i malômbla ma, i bé kobla bé i neebe i boñ ndik ngim mam. Ba bé neebe le ba yé litén li Yéhôva, ba yé “tik yé yom.”

9. Bimbe bisai bon ba Israel ba bééna?

⁹ I ba litén li Yéhôvai bé lona bon ba Israel bisai. A bé tééda bo kiki nyañ tole isañ man a nyoñ ngéda i tééda man wé. Yéhôva a bi kal bon ba Israel le: “Baa muda a nla hôya man wé nu a nyuñus, tole muda a nla yôi man nu a bi begee i libum jé? To ibale i bôda bana ba nhôya, me me yé mbén i hôya we.” (Yésaya 49:15) Yéhôva a bi ti bo biniigana ikété Mbén, a gwélél bapôdôl inyu ti bo makénd, ni biañgel inyu tééda bo. Ntôp tjémbi a kal le: “A nti Yakôb bañga yé, a nti Israel matiñ mé ni matéak mé. A bi boñ bé hala ni loñ ipe yo ki yo.” (Tjémbi 147:19, 20; añ Tjémbi 34:7, 19; 48:14.) Nlélém kiki Yéhôva a bi tééda bagwélél bé ba kôba, hala nyen a ga tééda ba bobasôna ba nti bomede nkikip inyu gwélél nye.

Inyuki di nlama ti bésbomede nkikip yak Yéhôva

10, 11. Baa i ngéda di ngwéé, di i yé i lihaa likeñi li Nyambe? Toñol.

¹⁰ I yé i pam ngim mangéda le, i bôt ba nsômbôl ti bomede nkikip ni i kôs sôble, ba yé ba mbadba le: ‘Inyuki mut a nlama ndigi ti nyemede nkikip yak Yéhôva inyu boñ le a gwélél nye?’ Di nlama ndugi nok libak jés ipañ Djob. Mu kiki di bi kôdôl béba i Adam, di bi gwééne bé i lihaa li Nyambe. (Rôma 3:23; 5:12) Inyu ba i lihaa li Nyambe di nlama ti bésbomede nkikip yak Yéhôva. Inyuki di nkal hala?

¹¹ Ngwal to wada a ta bé le ti man wé i bañga niñ Yéhôva a bi bôn bés: niñ boga. (1 Timôtéô 6:19) Di bi gwééna bé libak li bon ba Nyambe, inyule béba i Adam i bi kit maada bôt ba binam ba bééna ni Nhek wap, Isañ wap nu gwéha. (Hégha ni Ndiimba Mbén 32:5.) Ibôdôl ha nyen bôt ba binam ba ta ha bé i lihaa likeñi li Yéhôva, ba yé mbaglak ni Nyambe.

12. (a) Lelaa bikwéha bi bôt bi nla jôp i lihaa li Nyambe? (b) Ilole di nkôs sôble, kii di nlama ndugi boñ?

¹² Ndi, hiki mut a nla bat Nyambe le a nsômbôl jôp i lihaa jé, li li nkot ndik bagwélél bé, le nyemede a ñôt i nyeni. a Lelaa hala a nla bôña ki le yé di yé bikwéha bi bôt? Ñôma Paul a tila le: “Di bi pam i sañgla ni Nyambe ni njel nyemb i Man wé i ngéda di bé baoo bé.” (Rôma 5:10) I ngéda sôble, di mbat Nyambe loñge kiññem, inyu boñ le a leege bés. (1 Pétrô 3:21) Ilole di nkôs sôble, di nlama ndugi boñ ngim mam. Di nlama nigil i yi Nyambe, di nigil i bôdôl nye ñem, di tam bibéba gwés, di héñha ki maboñok més mabe. (Yôhanes 17:3; Minson mi baôma 3:19; Lôk Héber 11:6) Ndi jam lipe li yé ki li di nlama mboñ inyu boñ le Nyambe a neebe bés i lihaa jé. Limbe li?

13. Inyuki mut a nlama ti nyemede nkikip yak Nyambe inyu boñ le Nyambe a neebe le a ba ikété lihaa li bagwélél bé?

¹³ I mut nu a yé mbaglak ni Djob, inyu boñ le Nyambe a neebe nye ikété lihaa li bagwélél bé, i mut nu a nlama ndugi bôñôl Yéhôva mbôn-ga u tôbôtôbô, i mbus unda hala i mbamba. Inyu nok i jam li, di hégda le ngim mut i gwé ngôñ i yoñ man nyuu kiki man wé, inyule a nôgda ndutu yé. Bôt ba bi yimbe le i mut nu a yé loñge isañ mbai. Ndi ilole a nyoñ i man nu, a nkal nye le: “Bôn me le u ga gwés me, u ti ki me lipem kiki bo le men me yé isoñ.” Ibale i mañge nu a yé bebee i neebe hala, isañ mbai a ga leege nye i lihaa jé. Baa u nhoñol bé le isañ mbai nu a yé kunde i bat nye i jam li? Nlélém ni Nyambe, a neebe ndik i lihaa jé i bôt ba yé bebee i ti bomede nkikip. Bibel i nkal le: “Ni sem yaga manyuu manan sesema i yômi, ni pubhaga, i i nlémél Nyambe.”—Rôma 12:1, Kaat Nyambe.

Ndémbél i gwéha ni i hémle

14. Inyuki i ti bésbomede nkikip yak Nyambe i ñunda le di ngwés nye?

¹⁴ I ngéda di nti bésbomede nkikip yak Nyambe, di ñunda le di ngwés nye. Hala yé kiki mimbôn-ga bôt ba mboñ i ngéda ba mbiiba. Munlôm a ñunda nwaa wé le a ngwés nye i ngéda a mbôn nye le a ga ba ni nye i loñge ni i béba ngéda. A nkal ndik bé nye le a ga ti nye hiki yom i ga béda nye, ndi yak le a ga gwés toi nye. Kristen i nok ha i homa nu le, a ta bé le a niñ ni muda ibale a mbôn bé nye i jam li. I nlélém, mut a ta bé le kôs bisai bi bi nlôl i lihaa li Yéhôva ibale a nti bé nyemede nkikip yak Nyambe. Jon to hala kiki di yé bikwéha bi bôt, di nti bésbomede nkikip yak Nyambe inyule di ngwés nye, di gwé ngôñ i gwélél nye ni i téñbe ni nye ikepam lisuk.—Matéô 22:37.

15. Inyuki i ti bésbomede nkikip yak Nyambe i ñunda le di nhémle nye?

¹⁵ I ngéda di nti bésbomede nkikip yak Nyambe di ñunda le di nhémle nye. Inyuki di nkal hala? Hémle yés ipañ Yéhôva yon i nkwés bés nkaa le i tiige Nyambe bebee i yé loñge inyu yés. (Tjémbi 73:28) Bésbomede di nyi le i kôôge bebee ni Yéhôva munu ñemkété i “hiai hibe ni hi hi kôdi” hini, i ta bé jam li ntomb, ndi di mbôdôl Nyambe ñem, nu a mbôn le a ga lédés bés. (Filipi 2:15; 4:13) Di nyi le di yé bikwéha bi bôt, ndi di nyi ki le Yéhôva a ga unda bés konangoo yak i ngéda di mboñ dihôha. (Añ Tjémbi 103:13, 14; Rôma 7:21-25.) Di gwé botñem le a ga bom bés inyu makidik di nyoñ i ke ni bisu i ba bagwélél bé.—Hiôb 27:5.

I ti bésbomede nkikip yak Nyambe i nlona maséé

16, 17. Inyuki i ti bésbomede nkikip yak Yéhôva i nlona maséé?

¹⁶ I ngéda di nti bésbomede nkikip yak Yéhôva, di yé maséé inyule di nti nye niñ yés. Yésu a bi kal le: “Ti i nlona maséé iloo kôhna.” (Minson mi baôma 20:35) I ngéda Yésu a bé yônôs nson wé hana ’isi, a bi nôgda maséé ti i nlona. Ngim mangéda, i bé béda nye le a je, ni le a noi, ndi a bé yoñ i ngéda i inyu hôla bôt bape i léba njel i nkena i niñ. (Yôhanes 4:34) Yésu a bé gwés a nkônha Isañ maséé. Yésu bi kal le: “Me mboñ i mam ma nlémél nye ngéda yosôna.”—Yôhanes 8:29; Bingéngén 27:11.

¹⁷ Yésu a bi kal banigil bé le ba nigle nye i ngéda a kal le: “Ibale mut a nsômbôl noñ me, a nlama ha bé niñ inyu yé nyemede.” (Matéô 16:24) Hala a mboñ le di nkôôge Yéhôva bebee. Baa di nla nwas niñ yés i moo ma Yéhôva, le nyen a éga bés ikété gwéha?

18. Inyuki i niñ inoñnaga ni sômbôl i Yéhôva i nlona maséé ilel le i gwélél mut binam tole yom ipe?

¹⁸ I ngwélél Yéhôva ni ñem woñ wonsona ni i niñ inoñnaga ni sômbôl yé i nlona maséé ilel le u gwélél mut binam tole yom ipe. Kiki hihéga, ngandak bôt i ntégbaha niñ yap yosôna i yéñ nkus, ndi i mam ma ma nlona bé bo bañga maséé. Ki le i bet nti bomede nkikip yak Yéhôva ba ga bana bañga maséé nano ni i boga ni boga. (Matéô 6:24) Nsima di gwé i ba “baso bagwelnson ba Nyambe” i nlona bañga maséé, ndi bikristen bi nti bé niñ yap inyu ngim nson, ndi inyu gwélél Nyambe wap. (1 Korintô 3:9) Mut nye ki nye a ta bé le a bom bés kiki Nyambe a yé le a boñ inyu nson di ngwel. A mbôn le a ga boñ le bagwélél bé bobasôna ba témb ba yila njohok, inyu boñ le ba ôt nseñ ni loñge yé ñem i boga ni boga.—Hiôb 33:25; añ Lôk Héber 6:10.

19. Umbe nsima di gwé i niñ inoñnaga ni sômbôl i Yéhôva?

¹⁹ I ti bésbomede nkikip yak Yéhôva i mboñ le di bana maada ma bas ni nye. Bibel i nkal le: “Kôôgana bebee ni Nyambe, ndi yak nye a’ kôôge bé bebee.” (Yakôbô 4:8; Tjémbi 25:14) Mu i yigil i noñ ha, di ga nok inyuki di nla ba nkwoog nkaa le i ba bagwélél ba Yéhôva i yé loñge njel di mpohol.

[Footnote]

Lelaa w’a timbhe?

• I ti bésbomede nkikip yak Yéhôva wee kii?

• Lelaa i ti bésbomede nkikip yak Yéhôva i yé loñge inyu yés?

• Inyuki bikristen bi nlama ti bomede nkikip yak Yéhôva?

[Study Questions]

[Titii i lipep 6]

I niñ inoñnaga ni sômbôl i Yéhôva i nlona maséé i boga ni boga