Hiki nwii, didun di bôt di nwo, tole di nôla, inyu hibañga ni bee bipe bi bi gwé ngui i hibañga. I ngéda himala hi Kôrôna, mam ma bi bep ndik, bep ni bep. Bibel i ma hôla ngandak bôt i nwas hibañga. Ibale yak we u gwé ndutu i nwas i béba lem i, mana maéba malam ma nla hôla we. a

Munu ño nkwel unu, di ga tehe . . .

•  Inyuki maéba ma Bibel ma nla hôla we i nwas i lem i?

•  Maéba ma-na ma Bibel, ma ma nla hôla i nwas i lem i

•  Minlôñ mi Bibel mi mi nla hôla we i nwas i lem i

•  Mbôgi i bôt bape: Bibel i bi hôla bo i nwas bilem bi bi bi adbe bo

•  Baa Bibel i nsôña le mut a ke matibla ibale a nsômbôl nwas ngim lem ibe?

•  Baa Bible i nsôña ligwéélak li hibañga jo ki jo to ibale dokta nyen a ntila hio?

 Bayi mam ba bi léba le bôt ba nyila minkol mi hibañga tole gwom bipe bi bi gwé ngui i hibañga inyule ba nôgda le ba yé botama, ba gwé nduña mahoñol, ba ntôñ ngandak, tole ba nkon i mahoñol. Bibel i nla ti we hémle i ngui, kayéle to u gwé mahoñol ma, ma tinde bañ we i kwo mu bilem bibe bi. I ñunda ki we kii u nla boñ inyu yila liwanda li Djob. (Tjémbi 25:14) Ni mahôla ma, u nla yémbél mandutu u tehge le u nla bé yémbél.—Markô 11:22-24.

1.  1. Nigil i yi njee a yé Yéhôva Djob. b (Yôhanes 17:3) Nhek wés nu, a bak ki Lipigil li ngui i i mal bé. Ndi i jam li nlôôha ba nseñ li yé le Isañ wés ni ngii, hala wee Isoñ, nu a ngwés we. A gwé ngôñ i ba we bebee, a gwé ki ngôñ i gwélél ngui yé inyu hôla we. (Yésaya 40:29-31; Yakôbô 4:8) A gwéne ki we mam malam inyu dilo di nlo, ibale u neebe gwéha yé.—Yérémia 29:11; Yôhanes 3:16.

2.  2. Bat Yéhôva mahôla. Soohe Djob, u badak nye le a hôla we i nwas i lem i, le ndi u yila ‘pubhaga [tole mapubi], u lémél ki [nye].’ (Rôma 12:1) A ga gwélél mbuu wé mpubi, tole ngui yé, inyu ti we “lipémba li li nloo li mut binam.” (2 Korintô 4:7; Lukas 11:13) Lipémba li, li ga hôla we i nwas hibañga, le hi énél ha bañ we, ni le u yila “mut yondo,” hala wee u bana bilem bi bi nlémél Djob.—Kôlôsé 3:9, 10.

3.  3. Yônôs boña woñ ni mahoñol ma Djob. (Yésaya 55:9) A ga hôla we i ‘yila yondo ikété ngui i ñénél mahoñol moñ,’ hala wee a ga hôla we i héñha i nya boña woñ a ñôt mahoñol, le ndi u sôk kobla ni i lem ibe i. (Éfésô 4:23) Mahoñol ma Djob ma yé ntilga ikété Bibel, jon u bén-ga añ yo. (Tjémbi 1:1-3) Bagwélél ba Djob ba bi hôla ngandak bôt i nok biniigana bi Bibel. (Minson mi baôma 8:30, 31) Mbôgi Yéhôva i nkwel ni bôt inyu niiga bo Bibel yañga. Di naña yak we le u loo i makoda més, u ga tehe lelaa di nigil Bibel, u tehe ki lelaa u nla noñ maéba ma yé mu i niñ yoñ.

4.  4. Pohol mawanda malam. Mawanda moñ ma nla tinde we i boñ mam malam tole mam mabe, jon pohol ba ba ga hôla we mu sañ u njo inyu nwas i lem ibe i. (Bingéngén 13:20) Djob a gwé ikété bagwélél bé, bôt ba nla yilna we biloñge bi mawanda, a gwé ngôñ le mu nsoñgi wap nyen u tep mawanda moñ. (Tjémbi 119:63; Rôma 1:12) U yik ki pohol mintuk nwoñ, inyule di yé di nigle i bôt di mbéñge i télé, i radiô, tole ikété bikaat. Tjél i ni i, i nla tômbôs makidik u yé yoñ i boñ loñge.—Tjémbi 101:3; Amôs 5:14.

 Filipi 4:13: “Inyu mam momasôna, me gwé ngui ni njel nu a nti me lipémba.”

 “Me bé yi le me bé me gwééba bé jôga inyu nwas hibañga, jon me bi soohe Djob le a hôla me. A bi ti me ngui i bé béda me.”—Patrizia, i Italia.

 Joseph Ehrenbogen a bi nañ i homa bisañ, momol ni manola ma bé, a yila nkol u maok, u siga, u marijuana ni u éroin. Ngandak ngélé a bé le a wo, inyule hibañga hi bi loo nye ngui. Ndi nlôñ Bibel wada u bi kwés nye nkaa le a nla héñha. Añ mbôgi yé, munu nkwel ni hop Pulasi le “J’ai appris à respecter les femmes et à me respecter.”

 Dmitry Korshunov a bi kwo a telbak, ngandak ngélé, mu sañ a bé jo inyu nwas nyôba. Béñge vidéô ini le ‘Niñ me niñ i bé lémél ha bé me’ inyu yi kii i bi hôla nye i yémbél i lem ibe i.

 To. Ngo Bibel yomede i nkal le: “I bôt ba yé mbôô ba gwé bé ngôñ ni dokta, ndik bôt ba nkon.” (Matéô 9:12) Hikuu hini le, U.S. National Institute on Drug, i Amérika, hi mpot nlélém jam; hi nkal le: “I ba nkol u hibañga i yé béba nkon, inyu nwas hio i mbéda ndik bé ngôñ ni hôtnyuu.” I maliga, mahôla ma Djob ma gwé ngui iloo makidik ni ngôñ i mut binam. Bibel i bi hôla ngandak bôt i nwas hibañga ni gwom bipe ki, bi bi nyilha mut nkol. Ndi to hala, ngandak yap i bi bana ki ngôñ i ke yak dokta. c Di yoñ hihéga hi mut wada le Allen; a nkal le: “I ngéda me bé nwas maok, nyuu i bé bat me maok, kayéle minsôn nwem mi bé sôghe me ngandak. Ha nyen me bi nok le i mbéda le me kônde matibla ma dokta i ngii ma Bibel.”

 To. Kiki héga, Bibel i ñunda le maok ma nla gwéélana inyu makon, tole inyu suhul njôghe i mut a yé bebee ni nyemb. (Bingéngén 31:6; 1 Timôtéô 5:23) Ndi, kiki mut a nla yila nkol u maok, hala nyen mut a nla yak yila nkol u bee bi bi gwé ndék hibañga inyu suhus njôghe, bi le dokta a ntilna ngim bakokon. Jon ibale ba ntilna we gwo, yi le bi nla boñ we béba, jon yoñ yihe ni lelaa u nyoñ i nya bee i.—Bingéngén 22:3.