“Me ñoo suklu!” Ibale hala nyen u nôgda, u nla bana ngôñ i téé yo. I nkwel unu u ga unda we manjel mape ma ma yé malam.

•  Inyuki bape ba ntéé suklu?

•  Hoñol mandutu w’a yik boma i mbus ngéda

•  Njel ipe i yé ilam

•  I jam bisega gwoñ bi nkal

 Ikété manjom balét ba nti, di nla sima mana:

•   Suklu i nlédél bo. “Me mboñ biliya ndi to hala me nsal bé loñge i suklu.”

•   Suklu i nél bé bo. “Me ntehe nga bé me nseñ u mam me nigil.”

•   Ba gwé bé moni. “Me nlama sal moni inyu hôla lihaa jem.”

 Bibel i nkal le: “Mut yihe a ntibil béñge i homa a nkil.” (Bingéngén 14:15) Kii hala a niiga bés? Ibale u mbadba too u nlama téé suklu, bôk ndugi hoñol mandutu w’a yik boma i mbus ngéda.

 Badba le:

•   “Ibale me ntéé suklu, baa hala a’ ba jam li ntomb le me léba bôlô yani?”

   “Hoñol le kel yada y’a béda le u bana bôlô, u tééda ki lihaa joñ. Lelaa w’a pam i boñ hala ibale hiki nwet bôlô a mbat le i bititigi gwobisôna, i mbéda le i mut a nyoñ i bôlô a bana Bac?”​—Yulia.

•   “Ibale me ntéé suklu, baa m’a la yémbél mandutu ma niñ?”

   “Suklu i nkôôba we i kolba mandutu ma niñ. Yani, i bôt w’a boma, i manoodana w’a kôhna, ni i bôlô w’a bana, i mam ma momasôna ma ga ba kiki mam u mboma nano i suklu.”​—Daniel.

•   “Ibale me ntéé suklu, baa m’a bana makeñge m’a ba me nseñ i niñ?”

   “Bebek le nano u ntehe bé nseñ i ke i suklu ndi i ngéda w’a bana 23 nwii, u yik tjek mam moñ ma moni, ha nyen w’a kal le: ‘Me yé maséé le me bé yén péé i ngéda ba bé niiga bés minsoñgi.”’​—Anna.

•   Bat mahôla. Bibel i nkal le: “I ngéda bati maéba ba yé ngandak, mam ma nke loñge.” (Bingéngén 11:14, MN.) Jon ibale u nsal bé loñge i suklu, bat ngwal woñ wada, tole malét wada, tole conseiller d’orientation, tole nañak mut umpe we u mbôdôl ñem le a unda we makeñge ma ma nla hôla we i pamba i suklu.

   “Ibale u nok bé ngim biniigana, bat malét woñ. Ngim mangéda u nla hoñol le nyen a yé njom ndi libim li ngéda, mam ma yé le ma lama ndik inyule u mbat mahôla.”​—Edward.

•   Béñge haa. Bibel i nkal le: “Lisuk li jam li yé loñge iloo bibôdle gwé.” (Ñañal 7:8) I ngéda w’a mélés suklu, handugi yi kaat w’a bana, u mba ki u ma hôlôs bilem bilam, u bana ki makeñge ma m’a ba we nseñ i niñ.

   “I ngéda w’a nañ, bebek le w’a nigil ha bé inyu kôôba makégse, to ke i makégse, ndi i likeñge u ngwélél inyu yémbél mandutu i suklu li nkôôba we inyu yémbél mandutu w’a boma yani i ngéda u ga mal kôhna ma diplôm moñ.”​—Véra.

•   Wan manjel mape. Bibel i nkal le: “Bipék bi mut bôlô bi ga yon, ndi bôt bobasôna ba mpabla i boñ mam, ma ga sôk ikété liyep.” (Bingéngén 21:5, MN.) U pala bañ kit le njel ipe i ta bé, u nlama ndigi téé suklu. U nla mélés suklu yoñ u bak i ndap kiki bo ni njel internet tole ni njel biléta.

   “Suklu i nhôla bés i ba bôt ba bôlô, i nhôla bés i yémbél mandutu, i niiga ki bés i sal ni bôt bape. I bilem bi, bi ga hôla bés niñ yés yosôna. Jon i yé toi nseñ i boñ biliya i mélés suklu.”​—Benyamin.

 I jam di nlama tééda: Kena suklu yoñ ipam lisuk, ha nyen w’a ba nkôôbaga inyu yémbél mandutu w’a boma yani i ngéda w’a nañ.