To. Minlômbi mi bikaat mi ñunda le Bibel i bi héñha bé tolakii ngandak nwii mi bi tagbe.

 Ba bi léba ngandak bikaat bi Bibel. Maselna ba bi léba mu bikaat bi ni Bibel di gwé len ma ñunda le ngim mahôha i bi jôp ngéda ba bé tiimba tila bikaat bi. Ndi i bon ba maselna ba, ba nhéñha bé biniigana bi Bibel. Ndi i maselna makeñi ma bi mpam mu ma bé inyule ngim bôt i bi kôôba kônde ngim mam i i bé bé maliga ikété Bibel ni ntjeñ. Di yoñ dihéga diba:

1.   I kaat 1 Yôhanes 5:7, ngandak ngobol i Bibel i gwé bini bibuk le: “I ngii, Tata, Bañga, Mbuu Mpubi. Bo baa ba yé mut wada.” Bikaat ba bi léba bi ñunda le bibuk bi, bi ta bé ikété Bitilna, ba bi kônde gwo i mbus ngéda. a Jon libim li ngobol i Bibel li ngwélél bé gwo.

2.   Jôl li Djob li yé ikété ngandak minlômbi mi bikaat mi Bibel. Ndi ngandak ngobol i bi héñha jôl li ni bitel kiki “Nwet’’ tole “Nyambe’’.”

 Di nla kal le ba bi nléba bebee le minlômbi mi bikaat mi Bibel nwominsôna. b Kii di nla nigil mu bikaat bi, bi bi nyis bés le Bibel i yé maliga?

•   William H. Green a nkal inyu Bitilna ni hop Lôk Héber le: “Di nla ba nkwoog nkaa le bôlô ipe i bi séla bé i ngéda kôba kiki i i bi séla inyu tééda Bibel.”

•   Inyu Bitilna ni hop Grikia, Federick Bruce a tila le: “Di gwé ngandak mam i i nkwés bés nkaa le Malômbla ma yondo ma yé maliga iloo bikaat bipe bi miñañ bi bi tilba i nlélém ngéda. To mut a nkal bé le bi ta bé maliga.”

•   Sir Frederic Kenyon, nwan minlômbi mi Bibel nu a nyiba loñge, a nkal le : “Ibabé pééna, hiki mut nu a ngwélél Bibel a nlama yi le i yom a gwé i moo i yé toi Bañga i Djob i i nom tjai i mbus tjai.”

•   I bet ba bi tila Bibel ba bi sôô bé mahôha litén li Djob li bi boñ. c (Ñañga bôt 20:12; 2 Samuel 11:​2-4; Galatia 2:​11-​14) Ba bi tééda yak minlôñ mi Bibel het ba bi nôgôs litén li Djob inyu ngimanôgla wap. (Hôséa 4:2; Malaki 2:​8, 9; Matéô 23:​8, 9; 1 Yôhanes 5:​21) Kiki ba bi sôô bé maliga ma, ba bi éba le ba nla bôdôl bo ñem ni le ba bé diihe Bañga i Djob.

•   Baa i ta bé loñge i hoñol le kiki Bibel i yé Bañga i Djob, wee Djob nyemede nyen a bi yoñ bitelbene le Lipôdôl jé li héñha bañ? d (Yésaya 40:8; 1 Pétrô 1:​24, 25) Bibel i bé ndik bé nseñ inyu bôt ba kôba, ndi yak inyu yés i len ini. (1 Korintô 10:11) Rôma 15:4 a nkal le: “Inyule i mam momasôna ma bi tilba i ngéda bisu, ma bi tilba inyu niiga bés, kayéle ni njel hônba yés ni hogbe i nlôl i Bitilna di bana botñem.”

•   Yésu ni banigil bé ba bi sima bipes bi bikaat bi Bitilna ni hop Lôk Héber ibabé le ba hoñol le mahôha ma bé le ma ba mu Bitilna bi.​—Lukas 4:​16-​21; Minson mi baôma 17:​1-3.