Ñ, Bibel i nti bés ngandak manjom i i nkwés bés nkaa le Djob a yé toi. Bibel i nti bés makénd le di bôdôl Djob ñem iloole di neebe ndik biniigana gwobisôna bibase bi niiga bés. Di nlama gwélél “ngap yés i hek pék” ni “nogna yés.” (Rôma 12:1; 1 Yôhanes 5:​20, buk isi lipep) Di wan ngim manjom i i nkwés bés nkaa le Djob a yé toi:

•   Ngiinda ni bihégél gwobisôna bi yé mukété bi nkwés bés nkaa le ngim Nhek a yé. Bibel i nkal le: “Ni maliga, hiki ndap i ñôña ni ngim mut, ndi Nyambe nyen a bi hek mam momasôna.” (Lôk Héber 3:4) Ndoñi Bibel i nti i ntomb i nok, jon ngandak bayikaat i neebe yo. a

•   Bôt ba binam ba mbadba inyuki ba niñ, to ibale ba nyônôs ngôñ yap i pes minsôn, ba nke ni bisu i badba i mbadga i. I yi ni i bégés Djob yon Bibel i nsébél le “mam ma mbuu.” (Matéô 5:3; Masoola 4:​11) I yônôs ngôñ yés i pes mbuu, i nhôla ndik bé bés i yi le Djob a yé, ndi i nhôla ki bés i yi le Djob a gwé ngôñ le di nôgôl hiki Bañga i mpémél i nyo wé.​—Matéô 4:4.

•   Ngandak nwii bisu bi ngéda, Bibel i bi pôdôl ngandak mbañ. I mbañ i, i bi yon yak ikété disii di mam. Hala a nkwés toi bés nkaa le Bibel i nlôl ni mut a nloo bôt ba binam.​—2 Pétrô 1:​21.

•   Batila Bibel ba bi tila ngim mam i bôt ba njoñ yi ba bi yik nok i mbus ngéda. Kiki ’héga, ngandak bayimam i bé hoñol le hisi hi kéhi i ngii binuga kiki bo njok, ngôi bikai, tole onk nyaga. Maselna ni hala, Bibel yo i nkal maliga ngéda i nkal le Djob a “nkéi ki hisi hini ngii to yom.” (Hiôb 26:7) U héya hala, Bibel i niiga ki le hisi hi yé “ngiiña” tole kiki “bol.” (Yésaya 40:22, buk isi lipep; Douay Version) Ngandak bôt i neebe maliga mana inyule i ntehe le batila Bibel ba bé bé le ba bana nya yi i, handugi le i lôl bo ni Djob.

•   Bibel i ntimbhe mambadga bôt ba mbadba. Ngim mambadga le ibale mut a mbana bé biloñge bi mandimbhe, a nla kahal pééna le Djob a yé. Kiki ’héga: ibale Djob a yé gwéha, a ban-ga ngui, inyuki a nwas gwét ni mandutu i nkoñ ’isi? Inyuki a nwas le bibase bi boñ ngandak mam mabe?​—Titô 1:​16.