Nwii 2023 i yé nwii u tôbôtôbô inyu juu li ngobol li Mbôgi Yéhôva ni hop u Papiamentô, inyule hala a mpam 75 nwii le ba nkobol bikaat. Hop u Papiamentô u yé hop u loñ u Kréol, u mpôdna hop u Ôland, hop u Potoki, lôñni hop u Panya. I len ini, bebee le 350 000 bôt ba nyééne biônd ba nsébél le ABC d’ Aruba, Bônaire, lôñni Curaçao bon ba mpot hop u Papiamentô.

Nson likalô u bi bôdôl nyoo biônd bi i mamélél ma nwii 1920. Ndi ndék ngéda nyen misiônère mi Giléad mi bi pam i Curaçao i nwii 1946, ngandak makoda i bé i ma gwéé nyoo i ônd. Ha ngéda i kaat to yada i bé ngi koblana ni hop u Papiamentô. Makoda ma bé tagbe ni hop u Ngisi lôñni u Papiamentô, ba gwéélak bikaat ni hop u Ôland, hop u Ngisi, lôñni hop u Panya. To hala kiki bilôk bikéé bi bi tehe le i bé béda bikaat ni hop u Papiamentô, ndi hala a bé bé jam li ntomb. Inyule ni hop u Papiamentô, dictiônère li ta bé, to alfabè i ta bé hi hop u. Mankéé Bill Yeatts a bé misiônère nu bisu le ba bi ep mu biônd, a bé hôla yak inyu ngobol bikaat. Kiki i yé ntillga i Annuaire i Mbôgi Yéhôva 2002, a nkal le: “Kiki di bé añle bôt ñañ nlam, di bé lama pot ni tila i mam ma bé ngi kéla to tilba ni hop u Papiamentô. Hala a bé bé jam li ntomb i bot ngim alfabè ni hop u Papiamentô.” Mukété mandutu ma momasôna, bilôk bikéé bi bi ke ni bisu i boñ biliya bi bé béda inyu kobol bikaat.

Brochure bisu ba bi kobol ni hop u Papiamentô i bé le The Joy of All the People, ba bi mal kobol yo i nwii 1948. I mbus ngéda, yak ngandak bikaat bipe bi bi koblana, yak Nkum Ntat ni Tôde ’ilo! Ngobol i mbok yondo i yé koblana ni hop u Papiamentô. Kaat bisu ba bi mal kobol i bé kaat Ruth, i sôñ Biôôm, hilo hi bisu, nwii 2021.

I bôlô njok ba bi sal inyu kobol ngandak bikaat ni hop u Papiamentô, i bi num matam malam, di ntehe hala munu mahol ma yé ikété biônd bini. I nwii 1956, i ngéda likoda li bisu ni hop u Papiamentô li bi gwéé, batéé likalô ba bé ndigi 16. I len ini, ba yé iloo 1 600 ba téé likalô ikété 25 i makoda ni hop u Papiamentô. Munu i nwii 2023, ba ntégbaha gwigil bi Bibel iloo 1 200.

Di yé nkwoog nkaa le, Yéhôva a ga ke ni bisu i sayap biliya bi bilôk bikéé bi bôda ni bi bôlôm bi bi ntéé likalô ni hop u Papiamentô, i ngéda ba nwas le mapubi map ma mbai.​—Matéô 5:16.