Baa Mbôgi Yéhôva i nhélés bôt le ba héñha base yap?

AÑ NI

To, di mboñ bé hala. Di bi kal ikété Nkum Ntat le: “I yé béba i nyégsa bôt i héñha base yap.” a Di gwé manjom maa ma ma ntinde bés i tjél nyégsa bôt:

Yésu a hélés bé mut nye kiki nye i neebe biniigana gwé. A bé yi lé ndik ndék bôt yoñ i bé le i hémle nye. (Matéô 7:13, 14) Ngéda ngim banigil i bi baage inyu biniigana gwé, ilole a nyégsa bo i noñ nye, a bi nwas bo le ba ke.—Yôhanes 6:60-62, 66-68.
Yésu a bi niiga banigil bé le ba hélés bañ bôt i héñha base yap. Iloole ba noode nyégsa bôt ba ba gwé bé ngôñ i neebe ñañ nlam u Ane, banigil baYésu ba bé lama yéñ i bôt ba ba nleege bo inyu emble bo.—Matéô 10:7, 11-14.
Li nyégsa mut i gwélél Djob li gwé bé nseñ wo ki wo, inyule Djob a neebe ndigi bibégés bi bi nlôl i ñem.—Ndiimba Mbén 6:4, 5; Matéô 22:37, 38.

Baa bôlô yés i yé i nyégsa bôt i yila Mbôgi Yéhôva?

I yé maliga le di ntjam ñañ nlam “letee ni masuk ma hisi,” di mboñ hala “mbamba ni mandap mandap,” ndik kiki Bibel i nkal. (Minson mi baôma 1:8; 10:42; 20:20) Ndi kikii bikristen bi hiai i bisu, ba mbéna soman bés le di mbôk mbén ngéda di nhôla bôt i yila Mbôgi Yéhôva. (Minson mi baôma 18:12, 13) Ndi bisoman bi, bi yé bitembee. Di nhélés bé bôt i neebe biniigana gwés. Maselna ni hala, di nhoñol le bôt ba gwé kunde i kôs biniigana kayéle ba laa yoñ makidik ibabé hôs.

Di nhélés bé bôt i héñha base, di mboñ bé ki to mam ma m’bô (ma pôlitik) ndi di solbenege mbus base, di nti bé ki to salaka inyu ôt bôt bape i base yés. Hala a yé maselna ni bôt ba nkal le ba yé bikristen ndi ki le ba nwéha Kristô nyuu ni maboñok map. b

Baa mut a gwé kunde i héñha base?

Mpôdôl Abraham a bi tjôô base i lihaa jé

Ñ, Bibel i ñunda le bôt ba gwé kunde i héñha base. I gwé ngandak dihéga di bôt ti di bi tjél noñ base i lihaa jap, ndi bomede ba yoñ makidik i gwélél bañga Djob. Abraham, Ruth, ngim bôt i Atén ni ñôma Paul ba yé ndigi ndék dihéga mu ikété yap. (Yôsua 24:2; Ruth 1:14-16; Minson mi baôma 17:22, 30-34; Galatia 1:14, 23) Di nla ki kônde le, yak Bibel yomede i ñéba le hiki mut a gwé kunde i yoñ makidik mabe i tjél gwélél Djob.—1 Yôhanes 2:19. Yak ONU (Organisation des Nations Unies), a nti hiki mut kunde i nhéñha base ikété mbén ba nsébél le la Déclaration Universelle des Droits de l’Homme, mu pes yé ba nsébél le “Fondation Internationale des Droits de l’Homme.” I kaat i, i nkal le hiki mut a gwé “kunde i héñha base tole hémle” ni “i yéñ, i neebe ni i añle tonjee i yom a nyi,” hala a mbéñge yak biniigana bi base. c Ñ, i kunde i, i nôgha bés le di yé nhélhak i ti bôt bape lipém inyule ba gwé kunde i tééda hémle yap tole i tjél i mam ba ñoo.

Baa li héñha base li yé i yuyui mahaa tole bilem gwap?

Hala bé nyen i nlama ba. Bibel i niiga le di ti bôt bobasôna lipém, to imbee base ba yé. (1 Pétrô 2:17) Ni ki le, Mbôgi Yéhôva i nôgôl mbén Bibel i nti le ba ti bagwal bap lipém, to ibale ba nhémle bé minlélém mi biniigana.—Efésô 6:2, 3.

Ndi to hala, bôt bobasôna ba neebe bé i yom Bibel i nkal. Muda wada nu a bi néñél i loñ i Sambia, a nkal le: “I litén jem, li héñha base . . . li mpôôna liyan mbén, li sohbene lihaa ni litén joñ.” Muda nu a bi boma ndutu i ngéda a bé mañge, a bi bôdôl nigil Bibel lôñni Mbôgi Yéhôva, mbus ngéda a yoñ makidik i héñha base. A nkal le: “Bagwal bem ba bi kal me ngandak ngélé le ba bé unbene me kiyaga, ni le me bé sômbôl tjôô bo. Me bé tehe hala ndutu ngandak, inyule buk i bagwal bem i bééna mahee ngandak inyu yem. . . . I pohol i téñbe ni Yéhôva he base i lihaa jem bé, i nkobla bé le me ntjôô lihaa jem.” d

a Béñge La Tour de Garde du 1er janvier 2002, page 12, paragraphe 15.

b Kiki hihéga, i nwii 785 N.Y. Mut wada le Charlemagne a bi pémés mbén inyu biloñ bi bé pot ngisi lôñni pulasi i i bé kal le ba nol nu ni nu a ntjél i sôblana kiki kristen. U héa hala, nsañ u Augsburg, u mintôñ mi mintonba mi énél i bipada i Loñ Rôma mi bi sane i nwii 1555 N.Y. u bé kal le hiki ñane ngim nkoñ a bé lama ba i base i Lôk Pada tole Lôk Sañgô, ni le hiki mut nu a bé niñ ikété nkoñ u, a bé lama ba ikété bibase bi gwobiba. Bet ba ntjél i ba ndik ikété bibase bi, ba bé nyégsaga i ke i loñ ipe.

c Minlélém mi mambén mi bé ikété mbén yada ba bé sélé le Charte Africaine des Droits de l’Homme et des Peuples, yak ikété la Déclaration Américaine des Droits et des Devoirs de l’Homme, yak mbén i la Charte Arabe des Droits de l’Homme i i bi pam i nwiin 2004, yak Association des Nations du Sud-Ouest de l’Asie, la Convention Européenne des Droits de l’Homme, ni i l’Alliance Internationale des Droits Civiques et Politiques. Ndi, to matén ma ma ntéé mabén ma, momede ma nla bé téñbe i nôgôl mo.

d Jôl li bañga Djob le Yéhôva kiki i yé ntilbaga ikété Bibel.