Mbôgi Yéhôva i nhoñol le matiñ ni mambén ma yé ikété Bibel ma nla hôla bés i yoñ makidik ma nlémél Djob, ni ma ma yé bés nseñ. (Yésaya 48:17, 18) Di bi bot bé matiñ ni mambén ma, ndi di mbii mo i bisélél. Di wan lelaa matiñ mahogi ma ntihba jam li mbéñge i béñgna inyu yi too bôt iba ba nla biiba. a

•   Libii li nlama nom niñ yosôna. (Matéô 19:6) Mbôgi Yéhôva i nyoñ i ngéda ba ntégbaha i béñgna inyu libii kiki ngim ntjep i nkena libii, jon di njôha bé ni ngéda i.

•   Bôt ba nla béñgna inyu libii, ndigi ibale ba gwé ñwii mi kôli inyu boñ hala. I nya bôt i “ntagbe ñwii mi mañge wanda,” hala wee ñwii i het nyuu i nlôôha bat bo mahôla.​—1 Korintô 7:​36, MN.

•   I bet ba béñgna ba nlama bana kunde i biiba. Ngim bôt i bi bos i bisu bi ngomin i ta bé kunde i témb biiba i mis ma Djob, kiki matiñ mé inyu maboha ma yé le ndigi ndéñg yon i yé njom i téé sép.​—Matéô 19:9.

•   Bikristen bi nsômbôl biiba bi nlama ndigi pohol sobiina wap ikété ntôñ u Mbôgi Yéhôva. (1 Korintô 7:​39) Inyu Mbôgi Yéhôva, i oda ini i mbéñge mut a yé toi nsôblege Mbôgi Yéhôva, nu a nhémle biniigana gwés, a hak ki gwo bisélél, he ndik bé mut nu a nti biniigana gwés lipém. (2 Korintô 6:​14) Ibôdôl behee, Djob a mbat bagwélél bé le ba biiba ndigi ni i bet ba yé i nlélém base. (Bibôdle 24:3; Malaki 2:​11) I oda ini i ngi yii nseñ inyu niñ yés i hiki kel, kiki bôt ba njôôñ yi ba nléba i len ini. b

•   Boñge ba nlama nôgôl bagwal bap. (Bingéngén 1:8; Kôlôsé 3:​20) Inyu boñge ba ba ngi niñik ni bagwal bap, i oda i i nkobla le ba nlama nôgôl bagwal bap yak inyu jam li béñgna inyu libii. Hala a nkobla le bagwal ba nla yak téé i ñwii lok yap tole ngond yap i nla bôdôl béñge mut inyu yi too ba nla biiba, ni inyu mam ba gwé kunde i boñ mu ngéda i.

•   Inoñnaga ni maéba ma Bibel, hiki Mbôgi Yéhôva yon i mpohol too i nsômbôl béñge ngim mut inyu libii, yak nye ni njee ba nsômbôl béñgna inyu libii. Hala a nkiha ni litiñ lini le: “Ndi hi mut a’ begee yé yé mbegee.” (Galatia 6:5) Ndi to hala, i ngéda ngeñ i nkola i béñgna inyu libii, ngandak bôt ba noñ njel pék i bat maéba ma minhôôlak mi Mbôgi Yéhôva ba ba ntôñ bo.​—Bingéngén 1:5.

•   Ngandak mam bôt ba mbéna boñ ngéda ba béñgna inyu libii ma yé bibéba bikeñi i mis ma Djob. Kiki hihéga, Bibel i nti bés oda le di keñgle ndéñg. U héya malal ipôla munlôm ni muda ba ba ta bé mbiibaga, i oda i i ntihba yak maboñog ma nyega ipôla yap, kiki bo litihbana gwom bi mbôô inyu kôhna mane, ligwélél manyo map inyu tuk ni gwom bi mbôô tole ligwélél linyil inyu malal. (1 Korintô 6:​9-​11) Yak ngéda bôt iba ba ta bé mbiibaga ba mboñ mam ma nlôñôs ngôñ yap i malal, to ba mpam bé i malal, hala a yé jam li “nyega” li li mbébél Djob. (Galatia 5:​19-​21) Bibel i nsôña yak ‘bipôdôl bi mpuñgu.’​—Kôlôsé 3:8.

•   Ñem, hala wee mut kétékété, u yé malôga. (Yérémia 17:9) Ñem u nla tinde mut i boñ mam a nyi le ma yé mabe. Inyu yoñ yihe le miñem nwap mi lôk bañ bo, i bôt ba béñgna inyu yi too ba nla biiba ba nkeñgle i yén botama i bahoma i het ba nla kwo ndéñg. Ba nla pohol i yoñ bitelbene bi pék kiki bo i tégbaha ngéda ni bôt bape, tole i pohol ngim mut nu a nyéga bo. (Bingéngén 28:26) Bikristen bi bi yé ngibiiba, bi sômblak biiba, bi nyi le hala a ta bé njel pék i yéñ sobiina i internet, téntén hiandi i bana maada ni ngim mut nu di nyi bé loñge loñge.​—Tjémbi 26:4.