N weenɛ a hania ko à n kĩ a bɔrɔ wa; n weenɛ a hania ko à n kĩ a bɔrɔ nɛni. À n hania kua a ka Gusunɔn bɔrɔ gɔsia ma a ka win bɔrɔnu nɛnua, kaa domanu dabinu wa. Yesu u be ba nùn naanɛ doke sɔ̃ɔwa u nɛɛ: ‘Gem mu koo bɛɛ yakia.’ (Yohanu 8:32) Mba yen tubusianu?

Kaa kpĩ a tii mɔru di tɛ̃ɛ. Kaa kpĩ a kasira saa sɔ̃ɔsiru weesuginu ka weesu dabinu yi Setam kparamɔn di. Kaa kpĩ a kasira saa sɔ̃ɔsiru yĩiyɔbu sarin di ye sɔɔ tɔmbu yako dabinu ba wãa, be ba ǹ Yehofa gie. (Romu 8:22) Gusunɔn bɔrɔ ba maa ­kasira saa “gɔɔn bɛrum” di.—Heberu 2:14, 15.

Kaa kpĩ a tii mɔru di Gusunɔn handunia kpaaru sɔɔ. Kaa tii mɔru buraru wa sian saa sɔɔ! Alusannan temɔ, sa koo n tii mɔ saa tabun di, saa baranun di, ka saa gɔban di. Sa koo n tii mɔ saa masaasiru ka gɔ̃ɔrun di. Sa koo n tii mɔ saa tɔkɔru ka gɔɔn di. Sa koo n tii mɔ saa bɛrum ka nɔni swãaru ka siri kɔ̃surun di. Bibeli ya nɛɛ Gusunɔ sɔɔ: “A ra wunɛn nɔma dɛmiɛ kpa a hunde koni baayere wɛ̃ yèn bukata ya mɔ.”—Womu 145:16.

 Gusunɔn bɔrɔ ba koo n wãa sere ka baadomma. Wãaru te ta ku ra kpe ta sãawa kɛ̃ru bakaru te Gusunɔ koo tɔmbu kpuro be ba ra win bɔrɔnu kasu kɛ̃. (Romu 6:23) A bwisikuo fiiko ye wãaru te ta ku ra kpe ta koo n sãa wunɛ sɔɔ!

Kaa n saa mɔ a ka gãa dabinu ko. Sɔrɔkudo kaa n kĩ a mɛɛri a ka simpatia so. Ǹ kun mɛ kaa n kĩ a mɛɛri a foto ko ka wunɛn nɔmu ǹ kun mɛ a ka dãa dãko gɔsia. Ǹ kun mɛ kaa n kĩ a mɛɛri yɛɛ sɔɔ ǹ kun mɛ ye ya kpia sɔɔ. Ǹ kun mɛ kaa n kĩ a sanum ko a ka tem ka tɔn dabinu wa. À n wãaru te ta ku ra kpe mɔ kaa kpĩ a ye kpuro ko!

Kaa n saa mɔ a ka bɔrɔba dabinu wa. À n wãa ka baadomma , kaa kpĩ a tɔn dabinu gabu gia, be ba Gusunɔn bɔrɔba gɔsia. Kaa ye ba kpĩa ba kua ka ben daa burɛ gia, kpa bu maa ko wunɛn bɔrɔba. Kaa be kĩa, kpa ba maa nun kĩa. (1 Korinti 13:8) À n wãaru te ta ku ra kpe mɔ kaa n saa mɔ a ka baawure kpuron bɔrɔ gɔsia temɔ! Ye ya kpuro kere, wunɛn bɔrɔnu ka Yehofa nu koo kpɛ̃a too too sanam mɛ wɔ̃ɔ wunɔbu dabinu ko n saramɔ. A n sãa Gusunɔn bɔrɔ ka baadomma!