Alusanna ya ǹ koo n sãa nge handunia ye sɔɔ sa wãa gisɔ. Gusunɔ kùn kĩare tem mu yibu ka takaasi ka nuku sankiranu, ka wuriribu ma ka nɔni swãanu. Sian tɔ̃ru, Gusunɔ u koo tem gɔsia alusanna. Amɔsunwa Alusanna ye ya koo ya n sãa? Su mɛɛri ye Bibeli ya gerumɔ:

Tɔn geobu. Alusanna ya koo n sãawa Gusunɔn bɔrɔban wãa yeru. Ba koo ben tii tiinɛ gãa geenu kuana. Ba kon Gusunɔn wooda geenu swĩimɔ.—Mɔnnu 2:21.

Dĩa dabinu. Alusanna sɔɔ, gɔ̃ɔru ta ǹ koo maa wãa. Bibeli nɛɛ : “Kpa alikama [ǹ kun mɛ dĩanu] yu marura tem sɔɔ.”—Womu 72:16.

Dia buranu ka sɔm buraru. Alusanna sɔɔ temɔ, dusibu baawere koo n diru mɔ te ta koo n sãa bengirun tii. Baawure kon sɔmburu mɔ te ta koo nùn bwɛ̃ɛ dora wɛ̃ ka gem.—Esai 65:21-23.

 Bɔri yɛndu handunia gira sɔɔ. Goo kun maa sannamɔ, goo kun maa gbimɔ tabu sɔɔ. Gusunɔn Gari ya nɛɛ : “[Gusunɔ] u tabu kpeesia.”—Womu 46:9, 10.

Bwãa dobu. Bibeli ya nɔɔ mwɛɛru gerumɔ : “Goo [Alusanna sɔɔ] kun maa gerumɔ u nɛɛ, u barɔwa.” (Esai 33:24) Kpa goo kun koo maa sãa kɔ̃ri kpirinugii ǹ kun mɛ wɔ̃ko ǹ kun mɛ soso ǹ kun mɛ wi u ku ra kpĩ u gari gere.—Esai 35:5,  6.

Wuriribu ka nuku sankiranu ka gɔɔ yi koo nɔru ko. Gusunɔn Gari ya nɛɛ : “Gɔɔ kun ko n maa wãa ka win nuku sankiranu ka swĩi ka wuriribu domi gasɔn gãanu nu doona kpuro.”—Kãsiru 21:4.

Tɔn kɔ̃soba kun koo n maa wãa. Yehofa u nɔɔ mwɛɛru kua : “Tɔn kɔ̃sobu ka mɛm nɔɔ saribara ba koo wuna min di.”—Mɔnnu 2:22.

Tɔmbu ba koo kĩana kpa bu bɛɛrɛ dokena. Siri kɔ̃suru, nɔni swãaru, binɛ ka tusiru yi ǹ koo maa wãa. Tɔmbu ba koo n wãa sannu ka nɔɔ tia sɔɔ, kpa ba kon Gusunɔn wooda geenu swĩimɔ.—Esai 26:9.