Saa ye Yehofa u yɛnun wãaru swĩi, u mɔwɔbu yiwa ba n sãa ben bibun wirugibu. (Kolose 3:20) Ma a sãa mɔwɔ, wunɛn sɔmbura a wunεn bii seeya u Yehofa kĩa, kpa u gɔsia sɔ̃ɔ teeru bukuro wi u maa win baa yibiamɔ. (2 Timɔte 1:5; 3:15) N weenɛ a maa kasu a tubu ye ya wãa wunɛn biin gɔ̃ruɔ. Sika sari, wunɛn tiin kom mu sãawa girim. Kaa kpĩ a wunɛn bii sɔ̃ɔsi geeru wɛ̃ Yehofan Gari sɔɔ ma wunɛn tii a gbia a yi doke wunɛn gɔ̃ruɔ.—Womu 40:9.

YE BIBELI YA GERUMƆ: “I de baawure u n da nɔ kpaaka, kpa u n da saku u sere gere.” (Yakɔbu 1:19) Kaa n kĩ wunɛn biba n yɛ̃ ma ba koo kpĩ bu ka nun gari ko bɛrum sari. N weenɛ ba n yɛ̃ ma kaa kpĩ a be swaa daki baa n domma n na ba yen bukata mɔ. A be ayeru kɛ̃yɔ te sɔɔ ba ko ba n toro sindu mɔ bu ka nun sɔ̃ ye n be wãasi. (Yakɔbu 3:18) Bà n bwisika ma kaa n ka be sɛ̃ ǹ kun mɛ kaa be siri ye ba gerumɔ sɔɔ, ba ǹ kon kĩ bu nun ben gɔ̃ru wukia. A n tɛmanɛ ka wunɛn bibu, a n da be tubusie kiri kiri ma a be kĩ.—Mateu 3:17; 1 Korinti 8:1.

YE KAA KPĨ A KO:

• A de a n ayeru mɔ sanam mɛ wunɛn biba kĩ bu ka nun gari ko

• A n da ka wunɛn bibu gari ko baadomma ya n kun sanam mɛ gɛɛ wãa tɔna

YE BIBELI YA GERUMƆ: “Wi u ra bwisiku u sere gãanu ko, u ra kuurewa.” (Mɔnnu 16:20) Gasɔ, n ka nun yeeri mɛ n wunɛn bibu sãawe ben bwɛ̃ra sɔɔ, n weenɛ a ye ba gerumɔn asansi kasu. Ya sãawa aluwaasi ǹ kun mɛ wɔndiaban dɔɔnɛ bu gari tɔn tãre ǹ kun mɛ bu gãanu gere ye ba ǹ bwisika. “Wi u ku ra gari swaa daki u sere wisi, ya win gari bakaru sɔ̃ɔsimɔwa.” (Mɔnnu 18:13) A n kun da kpaaka mɔru se.—Mɔnnu 19:11.

YE KAA KPĨ A KO:

• A ka tii yinɔ a wunɛn bibu gari bura ǹ kun mɛ a n wurure baa mba n na ba gerumɔ

• A yaayo mɛ n daa nun sãawe sanam mɛ a ben wɔ̃ɔ mɔ, ka mba n daa nun sãawe girim

YE BIBELI YA GERUMƆ: “Wunɛ, nɛn bii durɔbu, a wunɛn baaban sɔ̃ɔsiru nɔɔwɔ kpa a ku ra wunɛn mεron gere yina.” (Mɔnnu 1:8) Yehofa u tundo ka maa mɛro nɔɔ kã bu ko ben bibu wirugibu. N weenɛ i bɛɛn bibu keu sɔ̃ɔsi bu ka bɛɛ bɛɛrɛ wɛ̃ kpa bu bɛɛ mɛm nɔɔwa. (Efesu 6:1-3) Biba koo kpĩ bu tubu ben mɔwɔbu ba kun “bwisiku teenu mɔ.” (1 Korinti 1:10) ) Ma i kun nɔɔsinɛ gari gɛɛ sɔɔ, i kookari koowo i ku ka ye sɔ̃ɔsi bɛɛn bibun wuswaaɔ, domi ya koo kpĩ yu bɛɛrɛ ye ba bɛɛ wɛ̃ɛmɔ kawa.

YE I KO I KPĨ I KO:

• I sinɔ kpa i nɔɔsina mɛsum i ko i ka bɛɛn bibu sɔ̃ɔsiru kɛ̃

• Ma bɛɛn bwisikunu kun teenu mɛ i ko i ka bɛɛn bibu seeya sɔɔ, a kookari koowo a wi a suen bwisikunu wɛ̃ɛri

YE BIBELI YA GERUMƆ: “A bii swaa gea sɔ̃ɔsio.” (Mɔnnu 22:6) I ka bɛɛn bibu swaa gea sɔ̃ɔsi ya koo kookari baka kana. N weenɛ i kpunaa yi i ka bɛɛn bibu seeya. Kpunaa ye sɔɔ, i maa nɔɔsinɔ mɛ i ko i ko i ka be sɛɛyasia. (Womu 127:4; Mɔnnu 29:17) Sɛɛyasiabu ya ǹ bii soobu tɔna, adama n weenɛ i bɛɛn bibu somi bu ka tubu yèn saabuwa i ka wooda ye swĩi. (Mɔnnu 28:7) I maa be keu sɔ̃ɔsio bu ka Yehofan Gari kĩa kpa bu yen gee kpɛɛkpɛɛkugii tubu. (Womu 1:2) Yeni ya koo be dera bu ka gɔ̃run seeda gea seku.—Heberu 5:14 VB.

YE I KO I KPĨ I KO:

• I de i n sire ma bɛɛn biba Gusunɔ mɛɛra nge Goo wi u wãa ka gem kpa bu kpĩ bu Wi naanɛ ko

• I be somio bu ka kookoo bεrεtεkε tubu bu ka si suuri, kookoo sin bwesenu ba ra wa Intεεnεtiɔ ka yen kãasi sɔɔ; ba n yɛ̃ mɛ ba koo ka be ba kĩ bu ka be kɔ̃ɔ mεnna kankam ko suuri.