Baa mɛ a kookari mɔ̀ a ka suanaa ka yɛnun wãaru doo nɔɔrugiru wa, gãa ni a ǹ yĩiyɔ nu koo kpĩ nu nun deema kpa nu nun wunɛn nuku dobu warari. (Waasu kowo 9:11) Ka kĩra Gusunɔ sun somirun swaa sɔ̃ɔsimɔ su ka wahala kamia. Ma a Bibelin gee kpɛɛkpɛɛkugii yini swĩi, wunɛ ka wunɛn yɛnu i ko i kpĩ i yari saa saa kɔ̃sin di.

YE BIBELI YA GERUMƆ: “I bɛɛn wahala kpuro sɔbio win mi, u koo bɛɛ nɔɔri.” (1 Piɛɛ 5:7) A n yaaye baadomma ma Gusunɔ kun taarɛ mɔ wunɛn laakari mɛɛri bi a waamɔ sɔɔ. (Yakɔbu 1:13) Ma a Gusunɔ susimɔ, u koo nun somi ka win dam kpuro. (Esai 41:10) “I nùn sɔ̃ɔwɔ ye ya bɛɛ nɛni.”—Womu 62:9.

Kaa maa dam wa ma a Bibeli garimɔ baadomma, a yen keu mɔ̀. À n mɔ̀ mɛ, kaa gia ka wunεn tii mɛ Yehofa “U sun dam kɛ̃ɛmɔ bɛsɛn nuku sankiranu kpuro sɔɔ.” (2 Korinti 1:3, 4; Romu 15:4) U nɔɔ mwɛɛru kua u nun “bɔri yɛndu te Gusunɔ u wɛ̃ɛmɔ, te ta tɔnun yɛ̃ru kpuro kere” kɛ̃.—Filipi 4:6, 7, 13.

YE KAA KPĨ A KO:

• A Yehofa kanɔ u nun somi a n ka bɔri yɛndu mɔ a ka bwisiku nge mɛ n weenɛ

• A swɛɛ kpuro daario sãa sãa a sere swaa ye ya buram bo sua

YE BIBELI YA GERUMƆ: “Bwisigii u ra kãwa u yɛ̃ru sosi, laakarigii u ra maa kãwa u sɔ̃ɔsiru wa.” (Mɔnnu 18:15) A gãanu kpuro wɛ̃ɛrio ka laakari. A wunɛn yɛnugibu ben baawuren bukata kasuo. A ka be gari koowo. A be swaa dakio.—Mɔnnu 20:5.

Bɛɛn kĩnasi goo ù n maa gu ni? A ku de sekuru ǹ kun mɛ bɛrum mu nun mwa a ka tubusia mɛ n nun sãawe wunɛn bwɛ̃ra sɔɔ. A yaayo ma “Yesu u swĩ” win tii. (Yohanu 11:35; Waasu kowo 3:4) A ku duari ma wɛ̃raru ka dom ya maa sãa girim. (Waasu kowo 4:6) Yeni ya koo nun dera a ku ka mwia kpana nuku sankiranu sɔɔ.

YE I KO I KPĨ I KO:

• Takaasi yu sere bɛɛ deema i de ya n sãa bɛɛn dɔɔnɛ i n da wesianɛ yɛnu sɔɔ. Sanam mɛ wahala ya koo raa tera, ya ǹ ko ya n be sɛ̃sie bu ka nun gari ko.

• Be wahala yen bwesera deemare, i ka be gari koowo.

YE BIBELI YA GERUMƆ: “Bɔrɔ kĩnasibu ba ra kĩru sɔ̃ɔsinɛwa saa kpuro sɔɔ.” (Mɔnnu 17:17) Wunɛn bɔrɔba ko n kĩ bu nu dera, adama, ba n ko ba ǹ yɛ̃ mba ba koo ko. A be sɔ̃ɔwo yen bukata a mɔ ka gem. (Mɔnnu 12:25) A maa somi te ta wee Gusunɔn min di kasuo be ba Bibeli yɛ̃ n mi. Swaa ye ba koo nun sɔ̃ɔsi saa Bibelin di ya koo nun somi.—Yakɔbu 5:14.

Kaa somi tèn bukata a mɔ wa, à n da ka be ba Gusunɔ naanɛ sãa gem gem ma ba tãsa Win nɔɔ mwɛɛnu sɔɔ mɛnnɛ. Kaa maa gɔ̃ru yɛmia bakabu nɔ, ma a gabu dam kɛ̃mɔ bu ka mwia kpĩ. A be wunɛn naanɛ dokebu Yehofa ka Win nɔɔ mwɛɛnu sɔɔ tubusio. A n be ba somirun bukata mɔ nɔma kɛ̃mɔ.A n kun maa ka be ba nun kĩ ma ba kĩ bu nun nɔɔri tondanɛ.—Mɔnnu 18:1 ; 1 Korinti 15:58.

YE KAA KPĨ A KO:

• A wunɛn bwisikunu wunɛn bɔrɔ naanɛgii sɔ̃ɔwo kpa a de u nun somi

• A wunɛn bukata daario kpa a ye tubusia ka gem.