Tutu do hea masa Aek na Sumar. Debata do na mambahen Aek na Sumar i lao mangaripasson halak na jahat. Alai disuru Debata do si Noak mambahen sada parau na balga lao gabe inganan ni akka halak na mangulahon na sittong dohot akka binatang asa boi malua. (1 Musa 6:11-20) Boi do pos rohatta hea do masa Aek na Sumar i, alana disurat do i di Bibel. Jala “sian Debata” do isi ni Bibel i.—2 Timoteus 3:16.

•  Tutu do i masa manang holan dongeng?

•  Boasa ro Aek na Sumar i?

•  Diboto akka halak di tikki i do na naeng ro Aek na Sumar?

•  Songon dia do bentuk ni parau i?

•  Sadia leleng do si Noak mambahen parau i?

•  Cerita, mitos, dohot legenda taringot Aek na Sumar

 Molo tajaha di Bibel, memang adong do disurat taringot si Noak disi. Jala disurat do muse disi na hea do masa Aek na Sumar.

•   Porsea do Panurat ni Bibel Hea do Mangolu Si Noak. Misalna, manat do si Esra dohot si Lukas tikki manuratton sejarah ni halak Israel. Ala dipamasuk nasida do goar ni si Noak tu goar ni akka pinoppar ni bangso Israel, pos do rohatta pasti hea do si Noak mangolu. (1 Kronika 1:4; Lukas 3:36) Songon i do tong panurat ni bukku Mateus dohot Lukas na manuratton hata ni Jesus taringot si Noak dohot Aek na Sumar.—Mateus 24:37-39; Lukas 17:26, 27.

   Asing ni i dibahen Panurirang Hesekiel dohot Apostel Paulus do si Noak gabe contoh halak na porsea jala na mangulahon na sittong. (Hesekiel 14:14, 20; Heber 11:7) Molo dang tutu adong si Noak i, dang mungkin disurat nasida goarna jala disuru hita maniru ibana. Gabe sitiruon do si Noak dohot akka halak na disurat di Bibel tu hita, alana tutu do hea nasida mangolu.—Heber 12:1; Jakobus 5:17.

•   Lengkap do hatorangan disurat di Bibel taringot Aek na Sumar. Cerita taringot Aek na Sumar dang dibukka mamakke hata “Di tikki najolo”, songon na dipakke di cerita dongeng. Alai disurat do di Bibel hatorangan taringot taon, bulan, ari, dohot akka peristiwa na adong hubunganna tu Aek na Sumar. (1 Musa 7:11; 8:4, 13, 14) Jala dipaboa do muse disi taringot ukkuran ni parau i. (1 Musa 6:15) Sude hatorangan na disurat patuduhon tutu do masa Aek na Sumar i, dang holan dongeng.

 Sebelum masa Aek na Sumar i Bibel mandok, “massai jahat akka jolma di tano on”. (1 Musa 6:5) Jala didok do muse, “nungnga sega be portibi on di jolo ni Debata” ala gok kekerasan dohot ulaon seks na so patut.—1 Musa 6:11; Judas 6, 7.

 Mula ni hajahaton i, ala adong suru-suruan na manadikkon inganan nasida di surgo lao mangulahon seks na so patut tu akka borua di tano on. Dung i tubu ma akka anak ni nasida na digoari Nepilim. Massai jahat do halak Nepilim on jala gabe susa do jolma dibahen nasida. (1 Musa 6:1, 2, 4) Alani i naeng dipamate Debata ma akka halak na jahat i asa boi dimulai akka halak na burju parngoluan na denggan.—1 Musa 6:6, 7, 17.

 I do, diboto nasida do. Nungnga dipaboa Debata hian tu si Noak aha na lao masa. Disuru do si Noak mambahen sada parau lao paluahon keluargana dohot akka binatang. (1 Musa 6:13, 14; 7:1-4) Jala dipaboa si Noak do tu akka halak di tikki i na lao masa ma Aek na sumar. Alai dang olo halak i manangihon ibana. (2 Petrus 2:5) Didok do di Bibel, ”Dang diparrohahon nasida na masa sahat tu na ro Aek na Sumar i mangaup nasida sudena.”—Mateus 24:37-39.

 Songon poti na marsuhi opat do parau i. Hira-hira 133 meter ma ganjangna, 22 meter bidangna, jala 13 meter ma timbona. Ikkon sian hau na margota do parau i dibahen, jala dilappis do parau i sian bagasan dohot sian luar mamakke aspal (miak ter). Dibahen ma parau i gabe tolu tingkat jala markamar-kamar. Dibahen ma pintuna, jala adong jandela di atap ni parau i. Jala miring do dibahen atapna asa dang godang aek ni udan di atapna.—1 Musa 6:14-16.

 Dang disurat di Bibel sadia leleng si Noak mambahen parau i. Alai hira-hira marpulu taon do tikki lao mambahen parau i. Boasa boi tadok songon i? Tolu anak ni si Noak tubu tikki marumur lobi sian 500 taon ibana. Jala marumur 600 taon ma si Noak tikki ro Aek na Sumar. a—1 Musa 5:32; 7:6.

 Nungnga mangoli sude anak ni si Noak tikki disuru Jahowa ibana mambahen parau. Porlu do ra hira-hira 50 manang 60 taon sahat tu mangoli sude anakna. (1 Musa 6:14, 18) Jadi boi ma tadok hira-hira 40 manang 50 taon ma lelengna si Noak mambahen parau i.