Di Bibel, hata “haheheon” dibuat sian bahasa Junani i ma anastasis, lapatanna “hehe” manang “jongjong”. Tikki dipahehe sasahalak, naung hehe do ibana sian hamatean jala halak na sarupa do tong na dipahehe.​—1 Korint 15:12, 13.

 Nang pe di bahasa aslina hata “haheheon” dang dibahen di akka Bukku Heber manang Perjanjian Lama, alai sasittongna adong do ajaran on dipaboa disi. Contohna, marhite panurirang Hosea didok Debata do, “Paluaokku nama nasida sian Kuburan, Paluaokku nama nasida sian hamatean.”​—Hosea 13:14; Job 14:13-15; Jesaya 26:19; Daniel 12:2, 13.

 Lao mangolu didia do akka halak naung dipahehe i? Adong do halak na dipahehe lao mangolu di surgo lao gabe raja jala rap mamaretta rap dohot Kristus. (2 Korint 5:1; Pangungkapon 5:9, 10) Di Bibel, didok do haheheon on “haheheon na parjolo”, lapatanna lao adong do muse haheheon dukkon haheheon na parjolo i. (Pangungkapon 20:6; Pilippi 3:11) Dukkon haheheon na parjolo i, i ma haheheon tu godang halak na lao mangolu di tano on.​—Psalmen 37:29.

 Songon dia do akka halak dipahehe? Dilehon Debata do tu Jesus huaso lao pahehehon halak naung mate. (Johannes 11:25) Lao dipahehe Jesus do “saluhut na di kuburan”. Jala dipaulak Jesus do muse ciri-ciri, sifat, dohot kenangan ni halak naung mate i songon tikki dang mate dope ibana. (Johannes 5:28, 29) Akka halak na dipahehe lao mangolu tu surgo, gabe songon suru-suruan do nasida. Alai, akka halak na dipahehe lao mangolu di tano on, gabe sehat jala sempurna do daging ni nasida.​—Jesaya 33:24; 35:5, 6; 1 Korint 15:42-44, 50.

 Akka ise do na lao dipahehe? Didok Bibel, “Lao dipahehe Debata do halak na burju dohot halak na jahat.” (Ulaon ni Apostel 24:15) Halak na burju, i ma akka halak na porsea songon si Noak, si Sara, dohot si Abraham. (1 Musa 6:9; Heber 11:11; Jakobus 2:21) Akka halak na jahat, i ma akka halak na so mangulahon Patik ni Debata ala dang hea dope diparsiajari nasida Patik i.

 Alai molo halak na jahat na so olo bertobat, dang na lao dipahehe be. Jadi tikki mate halak sisongon i, dang adong be harapan di nasida lao dipahehe muse.​—Mateus 23:33; Heber 10:26, 27.

 Andigan do haheheon i masa? Didok Bibel, haheheon ni akka halak na lao tu surgo masa ma i saleleng di ari haroro ni Kristus, na dimulai taon 1914. (1 Korint 15:21-23) Alai haheheon tu akka halak na lao mangolu di tano on, masa ma i di Pamarettaon ni Jesus Kristus Saleleng Saribu Taon, dung dibahen tano on gabe paradeiso.​—Lukas 23:43; Pangungkapon 20:6, 12, 13.

 Boasa porsea hita na tutu do masa haheheon i? Di Bibel, adong do disurat sia taringot haheheon na hea masa. Jala adong do halak na mangida tikki masa haheheon i. (1 Raja-Raja 17:17-24; 2 Raja-Raja 4:32-37; 13:20, 21; Lukas 7:11-17; 8:40-56; Johannes 11:38-44; Ulaon ni Apostel 9:36-42; Ulaon ni Apostel 20:7-12; 1 Korint 15:3-6) Contohna, sada hal na menarik do tikki dipahehe Jesus si Lasarus. Alana, nungnga opat ari si Lasarus mate jala godang do halak na mangida tikki dipahehe si Lasarus. (Johannes 11:39, 42) Jadi akka halak na marsogo ni roha tu Jesus pe, dang boi mandok na so tutu i masa. Alani i, gabe direncanahon nasida ma naeng mambunu Jesus dohot si Lasarus.​—Johannes 11:47, 53; 12:9-11.

 Didok do di Bibel, sanggup do Debata pahehehon halak naung mate jala lomo do rohana mangulahon i. Alani balga ni huaso ni Debata, sanggup do Debata mangingot sude taringot sasahalak na lao dipahehe Ibana. (Job 37:23; Mateus 10:30; Lukas 20:37, 38) Jadi, sanggup do Debata pahehehon halak naung mate, jala lomo do rohana lao pahehehon nasida! Lao manggombarhon taringot haheheon na lao masa, didok Bibel do taringot Debata, “Masihol do Ho tu na tinoppam.”​—Job 14:15.

Pandapot na sala taringot haheheon

 Pandapot na sala: Haheheon i ma, mardomu muse dagingna dohot tondina.

 Na sasittongna: Bibel mangajarhon, tikki mate sasahalak dang adong be bagian sian dirina i na mangolu. (1 Musa 2:7, surat na di toru; Hesekiel 18:4) Jadi tikki dipahehe sasahalak, dang adong didok na mardomu muse dagingna dohot tondina. Alai didok, gabe jolma na mangolu do sasahalak tikki dipahehe.

 Pandapot na sala: Adong do halak na dipahehe, alai pittor dipamate do muse.

 Na sasittongna: Didok Bibel, “akka na mangulahon na jahat” hehe lao diuhumi. (Johannes 5:29) Diuhumi pe sasahalak, dang alani pangalahona sebelum dipahehe, alai alani pangalahona dung dipahehe do. Didok Jesus, “Begeon ni akka na mate ma soara ni Anak ni Debata jala mangolu ma manang ise na mamparrohahon i.” (Johannes 5:25) Akka halak na “mamparrohahon” manang mangoloi aha na diparsiajari dung dipahehe, disurat ma goar ni nasida di “bukku hangoluan”.​—Pangungkapon 20:12, 13.

 Pandapot na sala: Tikki dipahehe sasahalak, sarupa do muse dagingna dipahehe dos songon sebelum mate ibana.

 Na sasittongna: Dung mate sasahalak, olo do nga hancur be sude dagingna.​—Parjamita 3:19, 20.