Ianakkon naung dewasa, martanggung jawab do mangurus natua-tuana naung matua. Didok Bibel, “Nasida ma na parjolo mangoloi paretta ni Debata taringot tu na mangurus keluarga. Jala ikkon baloson ni nasida do akka na denggan na dibahen natua-tua ni nasida. . . .  Ai hombar do i tu lomo ni roha ni Debata.” (1 Timoteus 5:4) Molo diurus ianakkon naung dewasa natua-tuana naung matua, na mangoloi paretta ni Bibel do nasida, i ma pasangappon natua-tuana.—Epesus 6:2, 3.

 Memang, dang adong takkas dipaboa di Bibel taringot songon dia carana mangurus natua-tua naung matua. Alai adong do dipaboa di Bibel akka contoh ni halak na setia na mangurus natua-tuana. Jala adong do muse akka nasehat na boi diihutton akka halak na mangurus natua-tuana.

•  Songon dia do cara ni akka halak na disurat di Bibel mangurus natua-tuana naung matua?

•  Akka ayat na dia do na dipaboa di Bibel na boi mangurupi akka halak na mangurus natua-tuana?

•  Adong do takkas dipaboa di Bibel ikkon songon dia carana mangurus natua-tua?

 Marragam do cara ni nasida, tergantung songon dia situasina. Contohna:

•   Hea do si Josep dao tinggal sian bapakna, i ma si Jakkob. Alai dung cocok situasina, diatur si Josep ma asa boi ibana jonok tinggal dohot bapakna i. Dilehon si Josep do jabu, sipanganon, jala dijaga do bapakna i.—1 Musa 45:9-11; 47:11, 12.

•   Dohot do si Rut pinda tu huta ni simatuana boru, jala berupaya do ibana karejo asa boi mangurus simatuana i.—Rut 1:16; 2:2, 17, 18, 23.

•   Tikki naeng mate Jesus, dipillit ibana do halak lao mangurus omakna, i ma si Maria naung mabalu di tikki i.—Johannes 19:26, 27. a

 Sipata, adong do ianakkon na loja mangurus natua-tuana naung matua. Alai adong do nasehat di Bibel na boi diihutton nasida, asa boi nasida menghadapi tantangan i.

•   Pasangap ma natua-tuamuna.

   Na didok Bibel: “Pasangap ma omakmu dohot bapakmu.”—2 Musa 20:12.

   Songon dia do carana mangulahon na didok di ayat on? Carana, paloas ma natua-tuamuna na mambahen keputusan tu dirina sandiri molo tolap dope nasida. Termasuk ma i, lao mamillit perawatan kesehatan na songon dia do na lomo roha ni nasida. Alai, boi do tong diurupi hamu nasida.

•   Mangattusi ma tu situasi ni nasida jala maappon ma molo adong na sala.

   Na didok Bibel: “Molo marbisuk halak, dang mura ibana muruk, jala dipuji do halak na olo manalpuhon hasalaan.”—Poda 19:11.

   Songon dia do carana mangulahon na didok di ayat on? Molo adong natua-tuamuna naung matua mandok hata na kasar manang na so denggan, manang hira na so diargai pambahenanmuna, pikkirhon ma sukkun-sukkun on, ‘Boha do molo au na di situasi ni nasida, songon dia do perasaanku?’ Molo diattusi hamu situasina, jala dimaappon hamu molo adong na sala, boi do gabe tetap denggan situasina.

•   Jalo ma pandapot sian na asing.

   Na didok Bibel: “Sundat do sakkap molo so jolo dihatai, alai saut do i molo godang na mamodai.”—Poda 15:22.

   Songon dia do carana mangulahon na didok di ayat on? Lului ma informasi taringot songon dia carana mangurus natua-tuamuna molo marsahit nasida. Jala lului ma muse informasi na adong di daerahmuna na boi mangurupi nasida. Molo adong kakak, abang, manang adekmuna, rap ma hamu makkatai taringot songon dia carana hamu memenuhi kebutuhan ni natua-tuamuna, mangurus nasida, jala marbagi tugas. Jala molo adong donganmuna na mangurus natua-tuana naung matua, boi do tong dipangido hamu saran sian nasida.

•   Sadari ma kesanggupanmuna.

   Na didok Bibel: “Marbisuk do halak na serep marroha.”—Poda 11:2.

   Songon dia do carana mangulahon na didok di ayat on? Sadari ma kesanggupanmuna. Alana, terbatas do waktu dohot tenaga ni sude halak. Dang sude boi diulahon hamu tikki mangurus natua-tuamuna naung matua. Jadi molo nga loja hamu mangurus natua-tuamuna i, pangido ma bantuan sian anggota keluarga na asing lao mangurus nasida.

•   Unang ma gabe dang diurus hamu dirimuna sandiri.

   Na didok Bibel: “Dang adong bawa na marsogo ni roha tu dirina. Dilehon ibana do dirina mangan jala dihaholongi do i.”—Epesus 5:29.

   Songon dia do carana mangulahon na didok di ayat on? Nang pe adong tanggung jawabmuna mangurus natua-tuamuna, alai unang lupa hamu mangurus kebutuhanmuna sandiri, dohot mangurus keluargamuna molo naung menikah hamu. Allang hamu ma sipanganon na bergizi jala cukkup ma hamu istirahat. (Parjamita 4:6) Molo adong tikkimuna, ulahon ma tong na asing. Molo diulahon hamu songon i, boi ma gabe positif pikkiranmuna, sehat hamu, jala gabe denggan ma hamu mangurus natua-tuamuna.

 Dang adong takkas dipaboa di Bibel taringot ikkon songon dia ianakkonna mangurus natua-tuana. Adong do piga-piga keluarga na mangurus sandiri natua-tuana naung matua saleleng sanggup dope nasida. Alai olo do sipata alani situasi, gabe digaji perawat lao mangurus natua-tuana i. Jadi, porlu do sude anggota keluarga marpungu lao manottuhon cara na terbaik na sesuai tu situasi ni sude akka anggota keluarga songon dia lao mangurus natua-tuana.—Galatia 6:4, 5.