Mate do Jesus humongkop jolma asa boi disesa dosatta jala asa boi hita mangolu saleleng ni lelengna. (Rom 6:23; Epesus 1:7) Hamatean ni Jesus patuduhon molo boi do toktong hita setia tu Debata nang pe godang sitaononta.—Heber 4:15.

 Masuk akal do on? Taida ma hatorangan ni Bibel taringot on.

1.   Jesus mate lao “manesa akka dosatta”.—Kolosse 1:14.

    Tikki ditoppa Debata jolma na parjolo, i ma si Adam, sempurna do ibana. Alai, sengaja do ibana dang mangoloi Debata. Akibatna gabe mardosa do ibana dohot sude pinomparna. Didok di Bibel, “Alani sahalak jolma na so mangoloi, gabe godang ma jolma mardosa.”—Rom 5:19.

    Sempurna do Jesus jala dang hea diulahon ibana dosa. Alani i boi do ibana gabe “pelean pardamean tu akka dosatta”. (1 Johannes 2:2) Sarupa songon si Adam na so mangoloi Debata mambahen mardosa sude jolma, suang songon i ma hamatean ni Jesus boi manesa dosa ni sude halak na marhaporseaon tu ibana.

    Boi didok, hira na dijual si Adam do sude jolma tu dosa. Alai, olo do Jesus mate lao paluahon hita sian dosa dohot hamatean. Hasilna, “molo adong na mardosa, adong do na mangurupi hita na rap dohot Damang i, i ma Jesus Kristus na mangulahon lomo ni roha ni Debata”.—1 Johannes 2:1.

2.   Jesus mate “asa unang mate ganup na patuduhon haporseaon tu ibana, alai asa mandapot hangoluan na saleleng ni lelengna.”—Johannes 3:16.

    Sabotulna lao mangolu saleleng ni lelengna do si Adam tikki ditoppa. Alai alani dosa, gabe mate ma ibana. Marhite si Adam, “masuk do dosa i tu portibi on” jala gabe ‘rarat ma hamatean i tu sude jolma, ala nungnga mardosa sude jolma’.—Rom 5:12.

    Alai hamatean ni Jesus boi manesa dosa ni jolma. Jala dang holan i, boi do jolma mangolu saleleng ni lelengna molo marhaporseaon tu ibana. Didok di Bibel, “Songon dosa dohot hamatean na marhuaso gabe raja, asi ni roha ni Debata na massai balga i pe marhuaso do gabe raja. Marhite i, boi ma didok akka halak mangulahon na sittong jala mandapot hangoluan na saleleng ni lelengna marhite Jesus Kristus Tuanta i.”—Rom 5:21.

    Memang, dang boi jolma mangolu salelengna saonari on. Alai, marjanji do Debata lao bahenonna ngolu na salelengna tu halak na setia tu ibana. Paheheonna do muse halak naung mate. Jadi, dapot nasida ma tong manfaat ni tobusan ni Jesus i.—Psalmen 37:29; 1 Korint 15:22.

3.   Boi do toktong Jesus “mangoloi sahat tu na mate”. On patuduhon molo hita jolma, boi do tong setia tu Debata nang pe godang sitaononna.—Pilippi 2:8.

    Alani egois, dang olo si Adam mangoloi Debata nang pe sempurna ibana. Lomo do rohana mambuat akka na so hakna. (1 Musa 2:16, 17; 3:6) Didok si Bolis (musu ni Debata) di tikki ni si Job, molo dang adong nanggo sada jolma pe na tulus mangoloi Debata, tarlumobi tikki diancam. (Job 2:4) Alai, Jesus na sempurna mambuktihon boi do toktong setia ibana tu Debata nang pe haccit jala porsuk dihilala tikki dipamate ibana. (Heber 7:26) Jadi, dang tutu hata ni si Bolis i. Boi do hita jolma toktong setia tu Debata nang pe godang sitaononta.

Sukkun-sukkun taringot hamatean ni Jesus

•   Boasa ikkon susa Jesus jala mate, asa boi manobus sude jolma? Boasa dang pittor disesa Debata sajo dosa dohot hamatean i?

   Didok Debata di Bibel, “upa ni dosa do hamatean.” (Rom 6:23) Sian mulana nungnga didok Debata tu si Adam, dang mate ibana molo mangoloi patik ni Debata. (1 Musa 3:3) Tikki mardosa si Adam, masa ma hata ni Jahowa, “Debata na so margabus i”. (Titus 1:2) Gabe mardosa ma sude jolma, alani dosa na ditorushon si Adam tu pinomparna. Jala dang holan i, dohot do tong akibat ni dosa i na ditorushon, i ma hamatean.

   Nang pe ikkon mate jolma ala ni dosa, alai balga situtu do asi ni roha ni Debata. (Epesus 1:7) Dilehon ibana do Jesus gabe tobusan na sempurna humokkop hita. Silehon-lehon ni Jahowa on, patuduhon Debata na tigor jala parasi roha do Jahowa i.

•   Nandigan do mate Jesus?Jesus

   Jesus mate pas di ari Paska ni halak Jahudi, i ma “jam pasiahon” dung bissar mataniari manang jam 3 botari. (Markus 15:33-37, surat na di toru) Molo di kalender saonari, i ma ari Jumat, 1 April 33 Masehi.

•   Didia Jesus mate?

   Dihukum mate do Jesus di “inganan na digoari Golgata di bahasa Heber, lapatanna Inganan ni Tengkorak.” (Johannes 19:17, 18) Di tikki ni Jesus “di luar ni gerbang ni kota” Jerusalem do inganan i. (Heber 13:12) Olo do ra, di inganan na timbo do Golgata on, alana didok di Bibel tikki dibunu Jesus, adong do piga-piga halak na manatap-natap “sian na dao.” (Markus 15:40) Alai, dang takkas diboto didia do Golgata i saonari.

•   Di salib do Jesus tikki dipamate?

   Godang do halak porsea molo Jesus dipamate di salib manang di silang. Alai Bibel mandok ‘digattung do ibana di hau.’ (Ulaon ni Apostel 5:30, Lembaga Alkitab Indonesia) Dipakke akka panurat ni Bibel do dua hata Junani lao patorangkon hau na dipake tikki Jesus dipamate. I ma stau·rosʹ dohot xyʹlon. Akka ahli mandok lapatan ni dua hata i, i ma sada hau na ganjang manang sada tiang lurus sian hau.

•   Adigan do sabotulna ari hamamate ni Jesus diparingoti?

   Di tikki borngin Paska halak Jahudi, na dirayahon ganup taon, didok Jesus do tu siseanna, “Toktong ma ulahon on bahen parningotan di au.” (1 Korint 11:24) On ma mulana dipatandahon Jesus sada perayaan na baru taringot hamateanna. Piga-piga jom dukkon i, dibunu ma ibana.

   Dipatudos Bibel do Jesus songon anak ni biru-biru na dibahen gabe pelean di ari Paska. (1 Korint 5:7) Tikki dirayahon halak Israel ari Paska, gabe diingot nasida ma tikki dipalua nasida sian parhatobanan di Mesir. Suang songon i ma, tikki diulahon halak Kristen Parningotan ari hamamate ni Jesus, gabe diingot nasida ma nungnga dipalua be nasida sian dosa dohot hamatean. Dirayahon ganup taon do ari Paska i, i ma di tanggal 14 Nissan di kalender kamariah. Suang songon i ma halak Kristen na parjolo, diparingoti nasida do hamatean ni Jesus sataon sahali.

   Saonari on pe, marjuta halak di liat portibi on mamparingoti ari hamamate ni Jesus ganup taon, i ma tanggal 14 Nissan.