Boi do hamu gabe dongan ni Debata molo diparsiajari hamu taringot Ibana jala diulahon hamu na mambahen las rohana. Dung i, “pajonohonna ma tu hamu”. (Jakobus 4:8) Didok Bibel do muse, “Ndang dao Ibana sian ganup hita on.”​—Ulaon ni Apostel 17:27.

•  Cara asa boi gabe dongan ni Debata

•  Pandapot na sala taringot Debata

 Jaha ma Bibel

•  Didok Bibel: “Ai sian Debata do sude Surat na Badia i.”​—2 Timoteus 3:16.

•  Lapatanna: Debata do Pangarang ni Bibel. Dipaboa Ibana do isi ni pikkiranna tu panurat ni Bibel. Sian Bibel gabe taboto ma aha na dipangido Debata na ikkon taulahon. Dipaboa Ibana do muse disi taringot sifatna. Parholong do Ibana, adil, jala parasi roha.​—2 Musa 34:6; 5 Musa 32:4.

•  Na boi taulahon: Jaha ma Bibel ganup ari. (Josua 1:8) Tikki dijaha hamu Bibel, sukkun ma dirimuna: ‘Aha do na boi huparsiajari taringot sifat ni Debata sian ayat na hujaha on?’​—Psalmen 77:13.

   Contohna, dung dijaha hamu Jeremia 29:11, sukkun ma tu dirimuna: ‘Aha do na naeng baenon ni Debata tu au, hadameon do manang jea? Sai diingot-ingot Ibana do hasalaakku, manang bahenonna do na denggan tu au haduan?’

 Parrohahon ma ciptaanna

•  Didok Bibel: “Nang pe ndang boi diida jolma Debata, alai . . . tarida do i sian angka na tinompana na tutu Ibana Debata.”​—Rom 1:20.

•  Lapatanna: Boi do taboto sifat ni Debata sian akka ciptaanna. Contohna, boi do taboto sifat ni sada seniman sian karya seni na dibahen ibana. Jala sian masin na jago boi ma taboto na malo situtu do halak na mambahen masin i. Dos songon i ma, gabe taboto ma na marbisuk situtu Debata tikki manoppa utok-utok ni jolma. Jala boi ma taboto na balga situtu do huasona ala boi denggan diatur Ibana energi ni mataniari dohot akka bintang.​—Psalmen 104:24; Jesaya 40:26.

•  Na boi taulahon: Lehon ma tikkimuna lao mamparrohahon akka toppaan. Dung i sukkun ma tu dirimuna, ‘Sifat ni Debata nadia do na boi huparsiajari sian ciptaanna on?’ a Godang do nian sifat ni Debata na so boi diceritahon akka toppaan i. Alani i ma dilehon tu hita Bibel.

 Jou ma goarna

•  Didok Bibel: “Paluaonku ma ibana, patimbulonku ibana, ala tinandana i goarhu. Jouonna ma Ahu, jadi alusanku ma ibana.”​—Psalmen 91:14, 15.

•  Lapatanna: Diparrohahon Debata na margoar Jahowa do, akka halak na mamboto goarna jala na pasangaphon goarna. b (Psalmen 83:19; Maleaki 3:16) Dipaboa Ibana do goarna tu hita asa tatanda Ibana. Didok Ibana, “Ahu do Jahowa, i ma goarhu!”​—Jesaya 42:8.

•  Na boi taulahon: Jou ma goar ni Jahowa tikki martangiang.

 Martangiang ma tu Jahowa

•  Didok Bibel: “Donok do Jahowa di sude angka na manjou Ibana.”​—Psalmen 145:18.

•  Lapatanna: Molo adong halak na porsea tu Jahowa jala martangiang tu Ibana, pajonokon ni Jahowa ma dirina tu nasida. Molo martangiang hita tu Jahowa, on patuduhon na tasomba do Ibana jala sangap hita tu Ibana.

•  Na boi taulahon: Jotjot ma martangiang tu Debata. (1 Tessalonik 5:17) Paboa ma arsak ni rohamuna dohot pakkilalaanmuna tu Ibana.​—Psalmen 62:9. c

 Porsea ma tu Debata

•  Didok Bibel: “Molo ndang porsea sasahalak tu Debata, ndang boi bahenonna las roha ni Debata.”​—Heber 11:6.

•  Lapatanna: Asa boi hita gabe dongan ni Debata, ikkon porsea do hita tu Ibana. Di Bibel, hata porsea lapatanna dang holan mamboto na adong Debata. Ikkon pos do rohatta tu Ibana, tu janjina dohot tu aturanna. Molo pos rohatta tu Ibana boi ma hita gabe donganna.

•  Na boi taulahon: Molo adong parbinotoanta taringot Debata, boi ma hita porsea tu Ibana. (Rom 10:17) Jadi taparsiajari ma Bibel asa pos rohatta tu Ibana dohot tu podana. Lomo do rohanami rap marsiajar Bibel dohot hamu. d

 Bahen ma las roha ni Debata

•  Didok Bibel: “Ai on do holong ni roha tu Debata, i ma molo taoloi angka parentana.”​—1 Johannes 5:3.

•  Lapatanna: Molo marsitutu hita mangoloi parettana, na tahaholongi do Ibana jala Debata pe holong do rohana tu halak na songon i.

•  Na boi taulahon: Tikki marsiajar Bibel hita, tapikkirhon ma aha na mambahen las roha ni Debata jala aha na mambahen jut rohana. Tasukkun ma diritta, ‘Aha do na porlu hupauba sian dirikku asa las roha ni Debata?’​—1 Tessalonik 4:1.

 Ulahon ma podana asa tahilala na burju do Ibana

•  Didok Bibel: “Dai jala ida hamu denggan basa ni Jahowa.”​—Psalmen 34:9.

•  Lapatanna: Dipangido Debata do asa taida sandiri na burju do Ibana. Molo nungnga tahilala na diurupi Debata hita jala tahilala holongna, olo ma hita gabe donganna.

•  Na boi taulahon: Dung dijaha hamu Bibel, ulahon ma i asa boi dihilala hamu na marguna do i. (Jesaya 48:17, 18) Parrohahon ma akka halak na mangulahon hata ni Debata tikki mangadopi parsoalan, lao mambahen denggan ngoluna, mambahen denggan keluargana, jala asa mandapot las ni roha. e

 Pandapot na sala: Dang boi hita mardongan tu Debata, ai dang niattusan Debata.

 Sasittongna: Adong do memang na so taatusi taringot Debata, ala dang boi taida Ibana. Alai, boi do hita mananda Ibana. Bibel pe mandok ikkon tatanda do Ibana asa boi hita mangolu saleleng ni lelengna. (Johannes 17:3) Asa boi taattusi taringot Debata na manoppa hita, dipaboa Ibana do taringot akka sifatna, tujuanna manoppa jolma dohot tano on, dohot aturanna. (Jesaya 45:18, 19; 1 Timoteus 2:4) Jala dipaboa Bibel do muse goar ni Debata. (Psalmen 83:19) Jadi boi do hita gabe dongan ni Debata, dang holan mananda Ibana.​—Jakobus 4:8.