Sude do jolma adong goarna. Jadi masuk akkal do kan molo Debata pe pasti adong do goarna. Ikkon jolo taboto do goar ni sasahalak asa boi hita akrab tu ibana. Suang songon i ma, ikkon jolo taboto do goar ni Debata asa boi hita jonok tu Ibana.

 Di Bibel didok Debata do, “Au do Jahowa, i do goarhu.” (Jesaya 42:8) Nang pe godang gelar ni Debata songon “Debata Pargogo na So Hatudosan”, “Tuan Natumimbul”, dohot “Sitoppa hita”, alai dipangido Debata do asa tajou goarna.—1 Musa 17:1; Ulaon ni Apostel 4:24; 1 Petrus 4:19.

 Godang do terjemahan ni Bibel na mambahen goar ni Debata di 2 Musa 6:3. Didok di ayat i, “Najolo jotjot do hupataridahon dirikku tu si Abraham, si Isak, dohot tu si Jakkob. Jala hupataridahon do tu nasida na Au do Debata Pargogo na So Hatudosan. Alai, dang sude hupaboa tu nasida taringot goarhu i ma Jahowa.”

 Bagian na parjolo sian Bibel disurat di bagasan bahasa Heber. Tulisan di bahasa i dijaha sian kanan tu kiri. Di bahasa Heber goar ni Debata, i ma opat huruf konsonan YHWH (יהוה). Digoari do opat huruf on Tetragramaton. Molo di bahasa Batak Toba diterjemahon ma on gabe Jahowa. Nang pe didok akka pakar goar “Yahweh” do na lebih pas, alai sebenarna Jahowa do na unjotjot dipakke.