Siihutton Jesus do si Maria Magdalena jala setia do ibana. Goarna dibuat sian goar ni kota Magdala (olo do ra Magadan). Jonok do kota on tu Laut Galilea. Hea do ra ibana tinggal disi.

 Si Maria Magdalena ma sada sian akka borua na mandongani jala mangurupi Jesus dohot akka siseanna tikki marbarita. (Lukas 8:1-3) Diida ibana do Jesus dihukum mate. Jala dohot do ibana rap dohot akka borua na parjolo sahali mangida Jesus dipahehe.​—Markus 15:40; Johannes 20:11-18.

•  Boru-boru na so hasea do si Maria Magdalena?

•  “Apostel ni akka apostel” do si Maria Magdalena?

•  Istri ni Jesus do si Maria Magdalena?

•  Piga halak do na margoar si Maria na disurat di Bibel?

 Dang hea didok Bibel si Maria Magdalena boru-boru na so hasea. Alai hea do dipaboa Bibel, dipalua Jesus do ibana sian pitu suru-suruan na jahat.​—Lukas 8:2.

 Boasa adong na mandok boru-boru na so hasea hian do ibana sebelum mangihutton Jesus? Marratus taon dung mate si Maria, adong na mandok ibana do boru-boru na so hasea na tumatangis di pat ni Jesus jala na mangapusi pat ni Jesus mamakke obukna. (Lukas 7:36-38) Hape, dang adong dipaboa di Bibel goar ni borua i.

 Daong. Digoari Gareja Katolik do si Maria on “Santa Maria Magdalena”. Jala digoari do ibana “apostel ni akka apostel”. Didok nasida pe songon i, ala dohot do ibana rap dohot akka borua na parjolo sahali paboahon tu akka apostel, naung hehe Jesus. (Johannes 20:18) Alai dang na gabe apostel si Maria Magdalena alani i. Jala dang hea didok Bibel ibana apostel.​—Lukas 6:12-16.

 Di ujung ni abad na parjolo do Bibel sae disurat. Marratus taon dungkon i, i ma di abad paonomhon, dibahen akka gareja ma ibana gabe “apostel ni akka apostel” manang “Santa Maria Magdalena”. Di bukku na dibahen di abad paduahon dohot na patoluhon, dipaboa do disi na late roha ni akka apostel ni Jesus tu si Maria. Alai dang adong dipaboa Bibel songon i, na dikarang-karangi do carita di bukku i.

 Daong. Takkas do dipaboa Bibel dang mangoli Jesus sahat tu na mate. a