Porsea do halak Kristen Jesus mate lao manobus dosa ni jolma. (1 Petrus 3:18) Alai, dang sae holan porsea songon i asa boi hita malua. Suru-suruan na jahat pe porsea do Jesus i “Anak ni Debata”. Alai dang lao dipalua nasida haduan.​—Lukas 4:41; Judas 6.

•  Aha ma na ikkon huulahon asa boi malua?

•  Memang na adong do tangiang na boi mambahen hita malua?

•  Sian dia do mulana adong “Tangiang ni Akka Pardosa”?

•   Ikkon porsea do hita, Jesus mate lao manobus dosatta. (Ulaon ni Apostel 16:30, 31; 1 Johannes 2:2) Dang holan i, alai ikkon porsea do hita na tutu do adong Jesus i jala sittong do sude na didok Bibel taringot ibana.

•   Parsiajari ma Bibel. (2 Timoteus 3:15) Dipaboa Bibel, hea do didok si Paulus dohot si Silas tu sahalak penjaga penjara, “Haporseai ma Tuan Jesus, asa malua ho.” Dung i, diajarhon nasida ma tu penjaga penjara i “hata ni Jahowa” a. (Ulaon ni Apostel 16:31, 32) Jadi ikkon bagas do diparsiajari penjaga penjara i Hata ni Debata asa boi ibana porsea tu Jesus.​—1 Timoteus 2:3, 4.

•   Ikkon Muba. (Ulaon ni Apostel 3:19) Molo adong pikkiranta na sala manang ulaonta na sala, ikkon tasolsoli do i jala muba. Unang be taulahon na mambahen sogo roha ni Debata jala taulahon ma “angka ulaon na patuduhon hamubaon ni roha”.​—Ulaon ni Apostel 26:20.

•   Tardidi. (Mateus 28:19) Didok Jesus ikkon tardidi do halak na naeng mangihutton ibana. Sahalak penjaga penjara na dipaboa nakkin pe tardidi do. (Ulaon ni Apostel 16:33) Dos songon i ma, dung diajarhon si Petrus taringot Jesus tu godang halak, “tardidi ma angka na manjalo hata i di bagasan las ni roha”.​—Ulaon ni Apostel 2:40, 41.

•   Oloi ma paretta ni Jesus. (Heber 5:9) Bukti na taihutton Jesus, i ma “mangulahon sude” parettana di ngolutta. (Mateus 28:20) Unang ma hita “holan na manangihon hata i” alai ikkon taulahon ma i.​—Jakobus 1:22.

•   Setia sahat tu ujungna. (Markus 13:13) Asa boi malua “ingkon sabar” do akka halak na mangihutton Jesus. (Heber 10:36) Contohna si Paulus, toktong do ibana setia tu Debata. Mulai gabe halak Kristen ibana sahat tu na mate, sabar do ibana jala diulahon do na didok Jesus.​—1 Korint 9:27.

 Adong do agama na mangajarhon tangiang na digoari “Tangiang ni Akka Pardosa” dohot “Tangiang Asa Dipalua”. Akka halak na pasahatton tangiang sisongon on, diboto nasida do na mardosa nasida. Jala porsea do nasida Jesus mate lao manesa dosa ni nasida. Dipangido nasida do asa ro Jesus tu roha manang tu ngolu ni nasida. Alai dang adong didok Bibel asa tapasahat tangiang sisongon on.

 Na deba mandok, molo nungnga dipasahat “Tangiang ni Akka Pardosa” i, nga pasti boi malua nasida salelengna. Alai dang tangiang na manjamin sasahalak boi malua. Ala jolma na mardosa hita, sai torus dope adong na sala taulahon. (1 Johannes 1:8) Alani i do disuru Jesus hita torus martangiang asa disesa dosatta. (Lukas 11:2, 4) Asing ni i, najolo adong do deba halak Kristen na maninggalhon Debata. Gabe dang dapot nasida be hangoluan na saleleng ni lelengna.​—Heber 6:4-6; 2 Petrus 2:20, 21.

 Marragam do pandapot ni akka sejarawan taringot asal usul ni “Tangiang ni Akka Pardosa”. Deba mandok tangiang on mulai adong tikki masa Reformasi Protestan (dimulai taon 1517). Na asing mandok, tangiang on mulai dipakke akka halak hira-hira 200 sahat tu 300 taon naung salpu tikki lam godang agama. Nang pe songon i, dang adong disurat tangiang on di Bibel. Jala dang adong diajarhon di Bibel asa taulang-ulangi tangiangta.