Lao manobus jolma sian dosa dohot hamatean, dilehon Debata ma Jesus gabe tobusan. Didok Bibel, mudar ni Jesus ma na dipakke lao manobus jolma. (Epesus 1:7; 1 Petrus 1:18, 19) Jala didok Jesus, ro do ibana “mangalehon ngoluna lao manobus godang jolma”.​—Mateus 20:28.

Boasa porlu ‘tobusan tu godang jolma’?

 Si Adam i ma jolma na parjolo, sempurna do tikki ditoppa, dang mardosa ibana. Alai ala dang dioloi ibana Debata, gabe dang boi be ibana mangolu saleleng ni lelengna. (1 Musa 3:17-19) Jadi ala nga mardosa ibana, gabe dohot ma sude akka ianakkonna mardosa. (Rom 5:12) I do alana didok Bibel, nungnga “targadis” dibahen si Adam dirina dohot sude pinopparna gabe hatoban ni dosa dohot hamatean. (Rom 7:14) Ala dang adong nanggo sada sian pinoppar ni si Adam na sempurna, gabe dang adong be na boi manobus aha naung mago dibahen si Adam.​—Psalmen 49:7, 8.

 Asi do roha ni Debata mangida akka pinoppar ni si Adam na so adong harapanna. (Johannes 3:16) Alai ala adil do Debata, dang boi pittor disalpuhon Ibana dosa ni jolma molo dang adong dasar na jelas. (Psalmen 89:14; Rom 3:23-26) Jadi, dilehon Ibana ma dasar na jelas asa boi disalpuhon Ibana sude dosa ni sude jolma. (Rom 5:6-8) Dasar na jelas i, i ma tobusan. Tobusan, i ma sada bukti na patuduhon na holong do roha ni Debata tu sude jolma.

Aha do tandana molo didok tobusan?

 Di Bibel dipaboa do adong tolu tanda ni ‘tobusan’:

1.   Tobusan i dipakke lao manggarar.​—2 Musa 21:30.

2.   Tobusan i boi paluahon.​—4 Musa 3:46, 47.

3.   Nilai ni tobusan i ikkon sarupa do tu aha na lao ditobus. a

 Saonari tabahas ma, songon dia tolu tanda on adong di tobusan ni Jesus Kristus.

1.   Boi manggarar. Didok Bibel, “arga do hamu dituhor”. (1 Korint 6:20; 7:23) Alana mudar ni Jesus do na dipakke lao manuhor “akka jolma tu Debata sian saluhut marga, bahasa, dohot bangso”.​—Pangungkapon 5:8, 9.

2.   Boi paluahon. Marhite tobusan ni Jesus, dipalua do hita sian dosa.​—1 Korint 1:30; Kolosse 1:14; Heber 9:15.

3.   Sarupa nilaina. Tobusan ni Jesus i, sarupa do nilaina tu ngolu na sempurna na dipamago si Adam. (1 Korint 15:21, 22, 45, 46) Didok Bibel, “Alani sahalak jolma na so mangoloi [si Adam], gabe godang ma jolma mardosa. Suang songon i ma, ala mangoloi do sahalak jolma [Jesus Kristus], boi ma godang halak didok mangulahon na sittong.” (Rom 5:19) Jadi ayat on paboahon, marhite hamatean ni sasahalak boi manobus dosa ni godang jolma. Jadi holan tobusan ni Jesus do na sarupa nilaina lao manobus sude jolma, i ma tu akka halak na olo mangargai tobusan i.​—1 Timoteus 2:5, 6.