1 Kronika 12:1-40
-
Akka halak na mangurupi si Daud (1-40)
12 Adong do akka halak na manjuppangi si Daud tu Ziklag+ tikki lari ibana tusi ala dilele si Saul+ anak ni si Kis. Akka tentara na jago do nasida na mangurupi si Daud tikki marporang.+
2 Boi do nasida mamakke panah. Jala boi do nasida mamakke tangan kanan manang tangan kiri+ lao mamakke ambalang*+ dohot panah. Halak Benjamin do nasida,+ haha anggi* ni si Saul.
3 Si Ahieser dohot si Joas akka anak ni si Sema halak Gibea i+ do pamimpinna. Dung i, adong ma muse si Jesiel dohot si Pelet, i ma akka anak ni si Asmapet,+ si Beraka, si Jehu halak Anatot,
4 si Ismaya halak Gibeon,+ i ma sahalak sian 30 tentara na jago+ jala ibana do pamimpin ni nasida. Dung i, si Jeremia, si Jehasiel, si Johanan, si Josabad halak Gedera,
5 si Elusai, si Jerimot, si Bealia, si Semaria, dohot si Sepatia halak Harip.
6 Sian pinoppar ni si Kora,+ i ma si Elkana, si Ishia, si Azarel, si Joeser, dohot si Jasobeam.
7 Dohot do muse akka anak ni si Jeroham na sian Gedor, i ma si Joela dohot si Sebadia.
8 Adong do deba halak Gad na marpihak tu si Daud. Lao ma nasida tu inganan partabunian ni si Daud di tombak.+ Akka tentara na jago do nasida jala nungnga dilatik marporang. Dipakke nasida do perisai na balga dohot tombak.* Songon singa do nasida idaon jala hatop do nasida marlojong songon kijang na di akka dolok.
9 Si Eser ma pamimpinna, si Obaja ma na paduahon, si Eliab na patoluhon,
10 si Mismana na paopatton, si Jeremia na palimahon,
11 si Attai na paonomhon, si Eliel na papituhon,
12 si Johanan na paualuhon, si Elsabad na pasiahon,
13 si Jeremia na pasappuluhon, jala si Makbanai ma na pasappulu sadahon.
14 Nasida ma halak Gad+ na gabe pamimpin ni akka tentara. Na umgale sian nasida boi manaluhon 100 tentara, jala na umgogo sian nasida boi manaluhon 1.000 tentara.+
15 Nasida ma na menyeberang sian Sunge Jordan di bulan na parjolo. Tikki i, balga do aek ni sunge i. Dipalao nasida do sude halak na di rura i tu sabola timur dohot tu sabola barat.
16 Ro do muse deba halak Benjamin dohot halak Juda manjuppangi si Daud di inganan partabunianna.+
17 Dung i dijuppangi si Daud ma nasida jala didok ma, “Molo di bagasan dame do haroromuna on, boi ma ihuttononmuna au. Alai molo naeng berhianat do hamu, idaon ni Debata ni akka omputta do i jala Ibana ma na gabe hakim di tonga-tongatta.”+
18 Dung i, ditogu-togu tondi parbadia ma si Amasai+ pamimpin ni na 30 halak i. Didok ibana ma,
“Ale Daud, naposom do hami. Ale anak ni si Isai,+ tu ho do hami marpihak.
Dame, dame ma di ho, jala dame ma di akka halak na mangurupi ho.Ai diurupi Debatam do ho.”+
Diloas si Daud ma nasida mangihutton ibana jala dipillit si Daud ma nasida gabe pamimpin ni akka tentara.
19 Adong do muse deba halak Manasse na marpihak tu si Daud. Tikki i, naeng marporang do ibana rap dohot halak Palistim mangalo si Saul. Alai, dung makkatai akka pamimpin ni halak Palistim,+ dipalao ma si Daud. Gabe dang dohot be ibana mangurupi halak Palistim. Ai didok akka pamimpin ni halak Palistim do, “Sotung marpihak ibana tu si Saul tuanna i, jala dipamate hita.”+
20 Tikki di Ziklag+ si Daud, on ma halak Manasse na marpihak tu ibana: si Adna, si Josabad, si Jediael, si Mikhael, si Josabad, si Elihu, dohot si Jilletai. Nasida ma pamimpin ni halak Manasse na sasaribu.+
21 Diurupi nasida do si Daud mangalo akka pangarampok. Ai gogo jala barani do nasida sude.+ Alani i, dibahen ma nasida gabe pamimpin ni akka tentara.
22 Ganup ari sai marroan do akka halak mangurupi si Daud.+ Gabe godang ma tentara ni si Daud songon godang ni tentara ni Debata.+
23 Godang do akka tentara na ro manjuppangi si Daud di Hebron.+ Diurupi nasida do si Daud asa gabe raja manggattihon si Saul songon paretta ni Jahowa.+
24 Sian halak Juda, adong do 6.800 tentara na mamakke perisai na balga dohot tombak.
25 Sian halak Simeon adong 7.100 tentara na gogo jala barani.
26 Sian halak Lepi, adong 4.600 halak.
27 Si Jehoyada+ ma pamimpin ni akka anak ni si Aron+ jala adong do 3.700 halak na ro rap dohot ibana.
28 Ro do muse si Sadok,+ sahalak doli-doli na gogo jala barani. Ro do ibana rap dohot 22 pamimpin ni na saompu.
29 Sian halak Benjamin haha anggi* ni si Saul,+ adong do 3.000 tentara. Godang do sian nasida najolo na manjaga keluarga ni si Saul.
30 Sian halak Epraim adong do 20.800 tentara na gogo jala na barani. Tarbarita do nasida di tonga-tonga ni nasida na saompu.
31 Sian satonga ni marga Manasse, dipillit do 18.000 tentara na lao mangurupi si Daud asa gabe raja.
32 Sian halak Isasar adong 200 pamimpin ni akka tentara. Diboto nasida do manottuhon aha na ikkon diulahon halak Israel. Jala dioloi haha anggina* do paretta ni nasida.
33 Sian halak Zebulon adong 50.000 halak na boi marporang. Marbaris do nasida sude huhut maniop sinjatana. Setia do* nasida sude mangihutton si Daud.
34 Sian halak Naptali adong 1.000 pamimpin ni akka tentara. Ro do nasida rap dohot 37.000 tentara na mamakke perisai na balga dohot tombak.*
35 Sian halak Dan adong 28.600 tentara na rade marporang.
36 Sian halak Aser adong 40.000 tentara na rade marporang.
37 Sian halak Ruben, halak Gad, dohot satonga sian halak Manasse na di bariba ni Sunge Jordan,+ adong 120.000 tentara na rade mamakke marragam sinjata.
38 Nungnga rade sude tentara i lao marporang. Marbaris ma nasida jala borhat ma nasida manjuppangi si Daud di Hebron. Nungnga dos roha ni nasida naeng mambahen si Daud gabe raja ni sude halak Israel. Halak Israel na asing pe, nungnga marsada ni roha naeng mambahen si Daud gabe raja.+
39 Disi ma nasida saleleng tolu ari. Jala mangan minum ma nasida rap dohot si Daud, ai nungnga diparade halak Juda sipanganon di nasida.
40 Dohot do akka halak na jonok tu nasida paradehon sipanganon. Ro do muse halak Isasar, halak Zebulon, dohot halak Naptali mamboan sipanganon mamakke halode, unta, dohot lombu. Diboan nasida do godang topung, kue ara, kue kismis, anggur, miak, lombu, dohot biru-biru. Ai massai las do roha ni halak Israel.
Surat na di toru
^ Na nidokna dison, i ma dongan samarga.
^ Manang “hujur”.
^ Na nidokna dison, i ma dongan samarga.
^ Na nidokna dison, i ma dongan samarga.
^ Manang “Dang mardua roha”.
^ Manang “hujur”.
