1 Raja-Raja 1:1-53
1 Tikki i nungnga matua hian Raja Daud.+ Sai ngalian do ibana nang pe nungnga marsalimut.
2 Didok akka parkarejona ma tu ibana, “Ale rajanami, loas ma hami mangalului sada anak boru* di ho, asa adong na manjaga jala mangurus ho. Lok ma modom ibana di labbungmu asa las dihilala ho.”
3 Lao ma nasida tu sude luat ni halak Israel mangalului anak boru na bagak. Dapot ni nasida ma si Abisag+ halak Sunem,+ jala diboan ma ibana tu jolo ni raja.
4 Bagak hian do anak boru i. Ibana ma na manjaga jala na mangurus raja i. Alai dang hea mangulahon seks raja i dohot ibana.
5 Tikki i, dibahen si Adonia+ anak ni si Haggit do sian nasa gogona asa lam marhuaso ibana. Didok ibana ma, “Au nama na gabe raja!” Disuru ibana ma asa diboan di ibana sada kareta porang, akka halak na marhoda, dohot 50 halak lao marlojong di jolona.+
6 Alai dang hea dipissang* bapakna si Adonia. Jala dang hea didok si Daud tu ibana, “Boasa dibahen ho songon i?” Adek ni si Absalom do si Adonia jala ganteng hian do ibana.
7 Dipangido si Adonia ma poda sian si Joab anak ni si Seruya dohot sian Malim Abiatar.+ Ujungna diurupi nasida ma si Adonia.+
8 Alai anggo Malim Sadok,+ si Benaya+ anak ni si Jehoyada, Panurirang* Natan,+ si Simei,+ si Rei, dohot akka tentara ni si Daud na gogo,+ dang olo nasida mangurupi si Adonia.
9 Dung i, dipelehon+ si Adonia ma biru-biru, lombu, dohot binatang na mokmok di labbung ni Batu Sohelet na jonok tu En-rogel. Ditogihon ibana ma asa ro tusi akka haha anggina, i ma akka anak ni raja i. Jala ditogihon ibana do sude parkarejo ni raja i na sian marga Juda.
10 Alai dang ditogihon ibana Panurirang Natan, si Benaya, akka tentara ni si Daud na gogo, dohot si Salomo.
11 Dung i didok si Natan+ ma tu si Bat-seba+ omak ni si Salomo,+ “Na so dibege ho do aha na masa? Nungnga gabe raja si Adonia+ anak ni si Haggit i, jala dang diboto si Daud tuanta i taringot i.
12 Saonari, molo naeng mangolu do ho dohot anakmu si Salomo,+ tangihon ma jo hatakkon.
13 Lao ma ho mandapotton Raja Daud jala dokkon ma tu ibana, ‘Nungnga marsumpa ho tuan, si Salomo anakki do na lao bahenonmu gabe raja manggattihon ho, jala ibana do na lao hundul di tahtami.+ Alai, boasa ma si Adonia na gabe raja?’
14 Tikki makkatai ho tu raja i, ro pe au tusi asa hudok muse songon na nidokmi tu raja i.”
15 Ro ma si Bat-seba manjuppangi raja i tu kamarna. Disi do si Abisag+ halak Sunem i manjaga raja. Ai nungnga matua hian raja i.
16 Marsomba ma si Bat-seba tu jolo ni raja i, jala didok raja ma, “Aha do naeng pangidoonmu sian au?”
17 Didok si Bat-seba ma, “Ale tuan, nungnga hea ho marsumpa tu au di jolo ni Jahowa Debatami, na lao bahenonmu do si Salomo anakki gabe raja manggattihon ho, jala ibana do na lao hundul di tahtami.+
18 Alai saonari, si Adonia do na gabe raja jala dang diboto tuan taringot i.+
19 Nungnga dipelehon si Adonia godang lombu jantan, binatang na mokmok, dohot biru-biru. Ditogihon ibana do asa ro tusi sude anak ni raja i, Malim Abiatar, dohot si Joab pamimpin ni tentarami.+ Alai dang ditogihon ibana si Salomo naposomi.+
20 Saonari, dipaima sude halak Israel do raja i paboahon manang ise na manggattihon ho hundul di tahtami.
21 Alai molo dang dipaboa raja i saonari, dokkonon ni nasida ma annon na berhianat au dohot anakku si Salomo molo dung mate ho.”*
22 Tikki makkatai dope si Bat-seba dohot raja i, ro ma Panurirang Natan tusi.+
23 Adong ma na paboahon tu raja i, “Ro Panurirang Natan.” Dung i masuk ma Panurirang Natan jala marsomba ma ibana tu jolo ni raja i.
24 Didok si Natan ma, “Ale rajanami, naung dipillit ho do si Adonia manggattihon ho gabe raja jala hundul di tahtami?+
25 Ai nungnga dipelehon+ si Adonia godang lombu jantan, binatang na mokmok, dohot biru-biru sadari on. Ditogihon ibana do asa ro tusi sude anak ni raja i, pamimpin ni tentarami, dohot Malim Abiatar.+ Mangan minum do nasida disi jala sai didok nasida do, ‘Sai ganjang ma umur ni Raja Adonia!’
26 Alai dang ditogihon ibana naposomon, Malim Sadok, si Benaya+ anak ni si Jehoyada, dohot si Salomo naposomi.
27 Naung dipaloas raja i do ibana mangulahon i? Hape so adong dope dipaboa ho tu naposomon ise na lao hundul di tahtami manggattihon ho gabe raja.”
28 Didok raja i ma, “Jou jolo si Bat-seba tuson.” Ro ma si Bat-seba tusi jala jongjong ma ibana di jolo ni raja.
29 Dung i didok raja i ma, “Songon pastina Jahowa mangolu,* na paluahon au sian sude hasusaakku,+
30 sadari on bahenokku ma anakmu si Salomo gabe raja manggattihon au. Jala bahenokku ma ibana hundul di tahtakki, songon sumpa naung hea hudok tu ho di jolo ni Jahowa Debata ni Israel.”
31 Dung i marsomba ma si Bat-seba tu jolo ni raja i, jala didok ibana ma, “Sai ganjang ma umur ni Raja Daud!”
32 Pittor didok Raja Daud ma, “Suru jo ro tuson Malim Sadok, Panurirang Natan, dohot si Benaya+ anak ni si Jehoyada.”+ Alani i, ro ma nasida tu jolo ni raja i.
33 Didok raja i ma tu nasida, “Parade hamu ma halodekku*+ lao hundulan ni anakku si Salomo. Boan hamu ma ibana tu Gihon+ rap dohot akka parkarejokku.
34 Ikkon dilantik*+ Malim Sadok dohot Panurirang Natan ma ibana disi gabe raja ni halak Israel. Dung i, ombus hamu ma tarompet na sian tanduk jala dokkon hamu ma, ‘Sai ganjang ma umur ni Raja Salomo!’+
35 Dongani hamu ma ibana mulak muse tuson, asa hundul ibana di tahtakku. Ibana ma na gabe raja manggattihon au, jala pillitokku ma ibana gabe pamimpin ni halak Israel dohot halak Juda.”
36 Laos didok si Benaya anak ni si Jehoyada ma, “Sai saut ma i!* Sai anggiat ma dipasaut Jahowa Debata ni tuanku i.
37 Sai didongani Jahowa ma si Salomo+ songon Ibana mandongani ho rajanami. Jala sai anggiat ma dibahen Debata umbalga harajaonna sian harajaon ni raja i.”+
38 Lao ma Malim Sadok, Panurirang Natan, si Benaya+ anak ni si Jehoyada, dohot sude pengawal ni raja*+ paradehon halode*+ ni Raja Daud lao hundulan ni si Salomo. Dung i lao ma nasida rap dohot si Salomo tu Gihon.+
39 Dibuat Malim Sadok ma tanduk na marisi miak+ sian kemah.*+ Diusehon ibana ma i tu ulu ni si Salomo lao mambahen ibana gabe raja.+ Dung i diombus nasida ma tarompet na sian tanduk, jala sude ma halak mandok, “Sai ganjang ma umur ni Raja Salomo!”
40 Dung i sude ma halak mangihutton si Salomo. Mardalan ma nasida huhut marsuling jala marsuraki, sappe humutur* tano on alani soara ni nasida.+
41 Tikki sae si Adonia mangan rap dohot sude halak na ditogihon ibana, dibege nasida ma soara na gaor i.+ Jala dibege si Joab ma soara ni tarompet na sian tanduk, gabe didok ibana ma, “Boasa gaor di kota? Aha na masa?”
42 Tikki makkatai dope si Joab, ro ma si Jonatan+ anak ni Malim Abiatar. Didok si Adonia ma, “Masuk ma ho. Mamboan barita na denggan do ho kan? Ai halak na burju do ho.”
43 Didok si Jonatan ma, “Dang barita na denggan na huboan. Ai nungnga dibahen Raja Daud si Salomo gabe raja.
44 Disuru raja do lao Malim Sadok, Panurirang Natan, si Benaya anak ni si Jehoyada, dohot sude pengawal ni raja* mandongani si Salomo. Jala disuru raja do nasida paradehon halode* ni raja lao hundulan ni si Salomo.+
45 Di Gihon, dilantik* Malim Sadok dohot Panurirang Natan ma si Salomo gabe raja. Dukkon i, mulak ma nasida tu kota, huhut marsuraki alani las ni rohana. Jala gabe gaor ma kota i. Soara i ma na binegemuna.
46 Saonari nungnga hundul be si Salomo di tahta ni raja.
47 Asing ni i, nungnga ro akka parkarejo ni raja patuduhon las ni rohana tu Raja Daud. Didok nasida do, ‘Ale tuan, sai anggiat ma dibahen Debatam tarbarita goar ni si Salomo lobi sian goar ni tuan. Jala anggiat ma dibahen Debata umbalga harajaon ni si Salomo sian harajaon ni tuan.’ Dukkon i, marsinggang ma raja di podomanna.
48 Jala didok ibana ma tu Debata, ‘Pinuji ma Jahowa Debata ni halak Israel. Ai sadari on, nungnga dipillit Ibana anakku lao hundul di tahtakku jala diloas Ibana do au asa sanga mangida i.’”
49 Mambege i, gabe mabiar ma sude halak na ro tu ulaon ni si Adonia i. Ditadikkon nasida ma inganan i jala lao ma nasida masiboan dalanna be.
50 Si Adonia pe gabe mabiar do tu si Salomo. Lao ma ibana tu tabernakel jala ditiop ibana ma akka tanduk ni langgatan.+
51 Adong ma halak na paboahon tu Raja Salomo, “Ale Raja Salomo, nungnga mabiar be si Adonia tu ho! Nungnga ditiop ibana be akka tanduk na di langgatan jala didok ibana do, ‘Aut olo ma nian raja i marsumpa tu au, paboa na so pamateonna au naposona on mamakke podang.’”
52 Didok si Salomo ma, “Molo setia do ibana, nanggo sada pe obukna dang na lao marurus tu tano. Alai molo dang,+ ikkon mate do ibana.”
53 Disuru Raja Salomo ma halak mangalap si Adonia sian langgatan i. Dung i, ro ma ibana tu jolo ni Raja Salomo jala marsomba ma ibana. Didok Raja Salomo ma, “Mulak ma ho tu jabum.”
Surat na di toru
^ Manang “anak boru na so hea mangulahon seks”.
^ Manang “disonggak; haccit rohana dibahen”.
^ As. “dung dipeakkon ho rap dohot akka ompum”. Puisi lao manggombarhon hamatean.
^ Sumpa on patuduhon pasti do ikkon saut janji on, songon pastina Debata mangolu.
^ Manang “halode boru-boru”. Di bahasa Heber, binatang on i ma hasil perkawinan ni halode jantan dohot hoda boru-boru.
^ Molo di bahasa Heber “Amen”.
^ Di bahasa Heber, binatang on i ma hasil perkawinan ni halode jantan dohot hoda boru-boru.
^ As. “akka halak Heret dohot halak Pleti”.
^ Olo do ra on kemah inganan ni poti parpadanan.
^ As. “bola”.
^ As. “akka halak Heret dohot halak Pleti”.
^ Di bahasa Heber, binatang on i ma hasil perkawinan ni halode jantan dohot hoda boru-boru.
