1 Samuel 23:1-29
23 Di sada tikki, adong ma na paboahon tu si Daud, “Nungnga ro halak Palistim marporang mangalo pangisi ni huta Keila.+ Dibuat halak Palistim do akka gandum naung dipapungu* nasida.”
2 Disukkun si Daud ma Jahowa,+ “Boi do au lao manaluhon halak Palistim?” Dialusi Jahowa ma, “Lao ma ho, taluhon ma halak Palistim. Jala palua ma halak Keila sian nasida.”
3 Alai didok akka tentara ni si Daud ma, “Haru di Juda on, nungnga mabiar hita.+ Lam boha ma molo lao hita tu Keila mangalo tentara ni halak Palistim!”+
4 Disukkun si Daud ma muse songon i tu Jahowa.+ Jala didok Jahowa ma tu ibana, “Lao ma ho tu Keila. Ai pasahatonku do halak Palistim tu tanganmu.”+
5 Dung i lao ma si Daud dohot akka tentarana tu Keila jala marporang ma nasida mangalo halak Palistim. Godang do halak Palistim na dipamate nasida jala dibuat nasida ma akka binatang na dipiaro ni halak Palistim. Songon i ma si Daud paluahon pangisi ni huta Keila.+
6 Tikki na ro i si Abiatar+ anak ni si Ahimelek i mandapotton si Daud di Keila, adong do diboan ibana epod.
7 Adong ma na mandok tu si Saul, “Nungnga masuk si Daud tu kota Keila.” Didok si Saul ma, “Nungnga dipasahat Debata ibana tu au.*+ Na manjorat dirina do ibana masuk tu kota i. Ai margerbang jala marpalang do kota i.”
8 Dipapungu si Saul ma sude tentarana lao marporang. Lao ma nasida tu Keila, naeng dihaliangi nasida ma kota i lao manaluhon si Daud dohot akka tentarana.
9 Dung diboto si Daud na naeng ro si Saul mangalo ibana, didok si Daud ma tu Malim Abiatar, “Boan ma epod i tuson.”+
10 Didok si Daud ma, “Ale Jahowa Debata ni Israel, nungnga dibege naposomon na naeng ro si Saul tu kota Keila on. Naeng pamateonna do sude pangisi ni kota on alani au.+
11 Pasahaton ni akka pamimpin* ni kota Keila on do au tu tangan ni si Saul? Tutu do naeng ro si Saul songon na binege ni naposomon? Ale Jahowa, Debata ni Israel, paboa ma tu naposomon.” Didok Jahowa ma tu ibana, “Tutu, naeng ro do ibana.”
12 Didok si Daud ma muse, “Pasahaton ni pamimpin ni kota on do hami tu tangan ni si Saul?” Dialusi Jahowa ma, “Ido. Pasahaton ni nasida do hamu.”
13 Pittor lao ma si Daud dohot akka tentarana sian kota Keila, godang ni nasida hira-hira 600 halak.+ Lao ma nasida tu inganan na aman jala marpinda-pinda do nasida sian sada inganan tu inganan na asing. Dung i, adong ma na paboahon tu si Saul naung lari si Daud sian Keila, gabe dang ro be si Saul tu kota i manakkup si Daud.
14 Jadi tinggal ma si Daud di Gurun Sip+ na di ginjang ni dolok na timbo. Jala maol do halak ro tusi. Sai dilului si Saul do si Daud,+ alai dang dipasahat Jahowa ibana tu tanganna.
15 Tikki di Gurun Sip na di Hores si Daud, diboto ibana ma na* sai dilului si Saul ibana lao pamateonna.
16 Didapotton si Jonatan anak ni si Saul ma si Daud tu Hores. Diurupi ibana ma asa lam pos roha ni si Daud tu Jahowa.+
17 Didok si Jonatan ma, “Unang ho mabiar. Dang na lao dapot ni bapakku ho. Ai takkas do diboto bapakku na lao gabe raja ni Israel ho.+ Jala diboto ibana do na toktong urupanku ho.”+
18 Dung i mambahen parjanjian ma nasida na dua+ di jolo ni Jahowa. Mulak ma si Jonatan tu hutana, alai tinggal do si Daud di Hores.
19 Di pudian ni ari, ro ma halak Sip mandapotton si Saul di Gibea.+ Didok nasida ma, “Martabuni do si Daud di jonok ni hutanami+ di Hores,+ di Dolok Hakila+ na di sabola selatan* ni Yesyimon.*+ Jala maol do dilului halak inganan i.
20 Ro ma ho rajanami, manang sadihari pe taho. Pasahatonnami do ibana tu tanganmu.”+
21 Didok si Saul ma tu nasida, “Sai dipasu-pasu Jahowa ma hamu ala asi do rohamuna tu au.
22 Attong lao ma hamu. Patakkas hamu ma didia ibana jala ise do na mangida ibana disi. Ai hubege, akkal hian do ibana.
23 Manat ma lului hamu ibana di sude inganan partabunianna. Paboa hamu ma muse tu au, jala boan hamu ma tanda na patuduhon na disi ibana. Dung i, lao pe au rap dohot hamu. Molo di luat i do ibana, ikkon luluakku do ibana nang pe di tonga-tonga ni marribu halak* Juda.”
24 Dung i parjolo ma nasida lao sian si Saul tu Sip.+ Di tikki i, di gurun na di Maon+ do si Daud dohot akka tentarana. Di Araba+ do gurun i di sabola selatan ni Yesyimon.
25 Ro ma si Saul dohot akka tentarana mangalului si Daud.+ Diboto si Daud ma i, gabe lao ma ibana martabuni tu dolok batu+ na di gurun Maon i. Dibege si Saul ma i, jala ro ma ibana mangalului si Daud tusi.
26 Dung i sahat ma si Saul tu dolok batu i. Jala di baribana i ma si Daud dohot akka tentarana. Pittor hatop ma lao si Daud mandao+ sian si Saul. Nang pe songon i, nungnga jonok be si Saul tu si Daud dohot tu akka tentarana.+
27 Alai adong ma halak na ro mandapotton si Saul. Didok ibana ma tu si Saul, “Hatop ma hamu tuan! Ai nungnga ro halak Palistim marporang mangalo hita!”
28 Gabe dang dilele si Saul be si Daud.+ Alai mulak ma ibana tu hutana mangalo halak Palistim. Alani i ma digoari inganan i Dolok Batu Parsirangan.
29 Dung i lao ma si Daud sian i tu En-gedi.+ Jala tinggal ma ibana disi, di sada inganan na maol dilului halak.
Surat na di toru
^ Manang “gandum sian inganan pardegean ni”.
^ As. “Nungnga digadis Debata ibana tu tanganku”.
^ Manang boi do “akka nappuna tano”.
^ Manang boi do “mabiar ma ibana ala”.
^ As. “di sabola kanan”.
^ Manang boi do “padang pasir; gurun”.
^ Manang “marga”.
