1 Samuel 26:1-25
26 Di pudian ni ari, ro ma halak Sip+ mandapotton si Saul di Gibea.+ Didok nasida ma, “Martabuni do si Daud di Dolok Hakila na di jolo ni Yesyimon.”*+
2 Lao ma si Saul tu Gurun Sip mangalului si Daud. Diboan ibana do 3.000 tentarana na dipillit sian sude halak Israel.+
3 Markemah ma si Saul di topi ni dalan na di ginjang ni Dolok Hakila na di jolo ni Yesyimon. Tikki i, di gurun do si Daud jala dibege ibana ma naung ro si Saul tusi mangalului ibana.
4 Disuru si Daud ma mata-mata lao patakkasson na tutu do ro si Saul manang na dang.
5 Dung i, lao ma si Daud tu perkemahan i. Diida ibana ma kemah ni si Saul dohot si Abner,+ anak ni si Ner pamimpin ni tentara ni si Saul i. Modom do nasida di tikki i. Kemah ni si Saul i adong di tonga-tonga ni kemah ni akka tentarana.
6 Disukkun si Daud ma tu si Ahimelek halak Het i+ dohot tu si Abisai,+ abang ni si Joab, anak ni si Seruya,+ “Ise do na boi mandongani au turun tu perkemahan ni si Saul?” Didok si Abisai ma, “Au pe na mandongani ho turun tusi.”
7 Bornginna i, lao ma si Daud dohot si Abisai tu perkemahan i. Modom do si Saul di kemahna jala pattik do tombakna* di labbung ni uluna. Modom do nang si Abner dohot akka tentara ni si Saul di sakalilingna.
8 Jadi didok si Abisai ma tu si Daud, “Saonari nungnga dipasahat Debata be musum tu tanganmu.+ Loas ma asa hupattikkon ibana tu tano pakke tombak on. Holan sahali pe hupattikkon, dang pola dua hali.”
9 Alai didok si Daud ma tu si Abisai, “Sotung dibahen ho manang aha tu ibana. Ai mardosa+ do manang ise pe na mambahen na jahat tu halak na pinillit ni* Jahowa.”+
10 Didok si Daud ma muse, “Songon pastina Jahowa mangolu,* pamateon ni Jahowa+ do halak na mangulahon songon i. Molo dang, mate do i molo dung dapot tikkina,+ manang mate di parporangan ma ibana.+
11 Dang lomo roha ni Jahowa molo hubahen na jahat tu halak na pinillit ni* Jahowa!+ Alani i, tabuat ma tombak na di labbung ni uluna i dohot panginumanna i asa lao hita.”
12 Dibuat si Daud ma tombak dohot panginuman i sian labbung ni ulu ni si Saul. Dung i lao ma nasida. Alai dang adong na mangida nasida+ manang na mamboto nasida ro, ai dang adong nasida na dungo. Dibahen Jahowa do nasida sude renges modom.
13 Lao ma si Daud tu pussu ni dolok na di bariba ni perkemahan i. Dao do dolok i sian perkemahan ni si Saul.
14 Digora si Daud ma si Abner+ anak ni si Ner dohot akka tentara ni si Saul. Ninna ma, “O Abner, dibege ho do au?” Dialusi si Abner ma, “Ai ise do na manggorai i? Nga gabe dungo be raja i.”
15 Didok si Daud ma tu si Abner, “Ai dang tentara na barani ho? Dang adong na songon ho di Israel. Alai boasa dang dijaga ho tuanmi? Ro do sahalak tentara nakkin naeng pamatehon raja i.+
16 Dang denggan diulahon hamu tugasmuna. Songon pastina Jahowa mangolu, ikkon pamateon do hamu sude. Ai so dijaga hamu tuanmuna halak na pinillit ni* Jahowa.+ Saonari, ida hamu ma! Nungnga didia tombak ni raja dohot panginuman+ na di labbung ni uluna i?”
17 Diboto si Saul ma na soara ni si Daud do i, ninna ma, “Soaram do i Daud, anakku?”+ Dialusi si Daud ma, “Ido tuan. Soarakku do i.”
18 Didok si Daud ma muse, “Boasa sai dilelei ho au tuan?+ Aha huroa dibahen naposomon tu ho jala aha salakku?+
19 Ale rajanami, tangihon ma jo hata ni naposomon: Molo Jahowa do na manuru ho mangalo au, paloas ma au mangalehon pelean sipanganon* tu Ibana. Alai molo jolma do na manjujui ho,+ sai hona bura ma ibana di jolo ni Jahowa. Ai nungnga dipalao nasida au sian tonga-tonga ni naposo* ni Jahowa.+ Jala hira na didok nasida do songon on, ‘Lao ma ho, debata na asing ma somba!’
20 Unang ma pasombu mate naposomon* dao sian jolo ni Jahowa. Boasa pola lao raja ni Israel mangalului sada hutu,+ songon halak na mangalele pidong tombak di akka dolok?”
21 Didok si Saul ma, “Nungnga mardosa au.+ Mulak ma ho Daud, anakku. Dang bahenokku be na jahat tu ho, ai arga do ngolukku di ho+ sadari on. Tutu, haotoon do na huulahon i jala marsala situtu do au disi.”
22 Didok si Daud ma, “Dison do tombak ni raja i. Suru ma sahalak tentaram mangalap on.
23 Sai lehonon ni Jahowa do upa tu halak na mangulahon na sittong*+ dohot tu halak na setia. Nang pe nungnga dipasahat Jahowa ho tu tanganku sadari on, alai dang olo au mambahen na jahat tu halak na pinillit ni* Jahowa.+
24 Songon arga ni ngolu ni tuan di au sadari on, sai songon i ma arga ni ngolukku di jolo ni Jahowa. Sai anggiat ma dipalua Ibana au sian sude sitaonokku.”+
25 Didok si Saul ma tu si Daud, “Sai dipasu-pasu Debata ma ho Daud, anakku. Sai marhasil ma sude ulaonmu jala sai monang ma ho.”+ Dung i, lao ma si Daud manorusson pardalananna jala mulak ma si Saul tu jabuna.+
Surat na di toru
^ Manang boi do “gurun”.
^ Manang “hujurna”.
^ Sumpa on patuduhon pasti do ikkon saut janji on, songon pastina Debata mangolu.
^ As. “sian parbagianan”. Na nidokna dison, i ma naposona dohot tano na dilehon tu nasida.
^ Manang “pasombu use mudarhu tu tano”.
