1 Samuel 28:1-25
-
Lao ma si Saul mardatu tu En-dor (1-25)
28 Di sada tikki, dipapungu halak Palistim ma akka tentarana lao marporang mangalo halak Israel.+ Didok si Akis ma tu si Daud, “Nungnga diboto ho kan, ikkon lao do ho dohot tentaram mandongani au marporang.”+
2 Didok si Daud ma tu si Akis, “Diboto tuan do na lao bahenon ni naposomon.” Didok si Akis ma, “Alani i ma hupillit ho gabe pengawalhu* saleleng mangolu au.”+
3 Di tikki i, nungnga mate si Samuel. Sude do halak Israel mangandungi ibana jala dikubur do ibana di hutana di Rama.+ Jala nungnga dipalao si Saul akka datu dohot tukkang ramal sian Israel.+
4 Marpungu ma tentara ni halak Palistim jala markemah ma nasida di Sunem.+ Alani i, dipapungu si Saul ma sude tentara ni halak Israel jala markemah ma nasida di Gilboa.+
5 Tikki diida si Saul naung markemah tentara ni halak Palistim i, mabiar situtu ma ibana.+
6 Dipangido si Saul do tudu-tudu sian Jahowa,+ alai dang hea dialusi Jahowa ibana marhite nipi, marhite Urim,*+ nang marhite panurirang.*
7 Didok si Saul ma tu akka tentarana, “Lului hamu jo sahalak borua na boi makkatai tu halak na mate,+ asa lao au mandapotton ibana jala manukkun ibana.” Dialusi nasida ma, “Adong do sahalak datu borua di En-dor+ na boi makkatai tu halak na mate.”
8 Digatti si Saul ma abitna asa unang ditanda halak ibana. Tikki borngin, lao ma ibana dohot dua tentarana mandapotton borua i. Didok si Saul ma tu borua i, “Makkatai ma jo ho tu halak naung mate asa paboa tu au aha na lao masa.+ Jala jou ma jo halak na lao paboaokku tu ho.”
9 Didok borua i ma, “Boasa naeng joratonmu au? Na lomo do roham dipamate au?+ Takkas do diboto ho, nungnga dipalao si Saul akka datu dohot tukkang ramal sian Israel.”+
10 Marsumpa ma si Saul di bagasan goar ni Jahowa. Didok ibana ma tu borua i, “Songon pastina Jahowa mangolu,* dang na lao dihukum ho alani on!”
11 Didok borua i ma, “Ise do na lao jouokku?” Dialusi si Saul ma, “Jou ma jo si Samuel.”
12 Tikki diida borua i “si Samuel”,*+ marsurak ma ibana jala didok ma tu si Saul, “Boasa dioto-otoi ho au? Ai si Saul do hape ho!”
13 Didok Raja Saul ma tu borua i, “Unang ho mabiar. Ai aha do huroa diida ho?” Dialusi borua i ma, “Adong huida na songon debata kaluar sian tano.”
14 Disukkun si Saul ma, “Boha do diida ho rupana?” Dialusi borua i ma, “Bawa na matua do na kaluar i, jala mamakke rompi na ganjang.”+ Gabe diboto si Saul ma na “si Samuel” do i. Ujungna, marsomba ma si Saul.
15 Dung i, didok “si Samuel” ma tu si Saul, “Boasa disusai ho au? Boasa dijou ho au asa kaluar?” Didok si Saul ma, “Susa hian do au saonari. Nungnga ro halak Palistim mangalo au. Hape nungnga ditadikkon Debata au, jala dang olo be Ibana mangalusi au marhite panurirang manang marhite nipi.+ Alani i do hujou ho asa huboto aha na lao bahenokku.”+
16 Didok “si Samuel” ma, “Boasa disukkun ho dope au? Hape nungnga ditadikkon Jahowa ho+ jala nungnga gabe musum Ibana.
17 Pasauton ni Jahowa do naung pinaboana hian tu au. Buaton ni Jahowa ma harajaon i sian ho jala lehononna ma i tu naposom si Daud.+
18 Songon i ma na lao bahenon ni Jahowa tu ho sadari on. Ai dang dioloi ho hata ni Jahowa, jala dang dipamate ho sude halak Amalek i.+ Alani i ma gabe muruk Ibana tu ho.
19 Alani i, pasahaton ni Jahowa ma ho dohot halak Israel tu tangan ni halak Palistim.+ Jala marsogot rap nama hamu dohot au,+ ho dohot akka anakmu.*+ Pasahaton ni Jahowa ma akka tentara ni halak Israel tu tangan ni halak Palistim.”+
20 Pittor peak ma si Saul tu tano alani biarna mambege hata ni “si Samuel” i. Asing ni i, dang adong be gogona. Ai dang mangan ibana sadari saborngin.
21 Ro ma borua i mandapotton si Saul jala diida ibana ma nungnga busisaon si Saul. Didok borua i ma, “Nungnga dioloi naposomon hatam. Jala martaru hosa do au+ lao mangulahon i sude.
22 Saonari, tangihon ma naposomon tuan. Loas ma au paradehon roti di ho, asa adong allangonmu jala asa margogo ho mulak.”
23 Alai dang olo si Saul. Didok ibana do, “Dang olo au mangan.” Sai dielek-elek tentarana dohot borua i ma ibana, jala ujungna ditangihon ma nasida. Hehe ma ibana jala hundul di podoman.
24 Adong do anak ni lombu na mokmok appuna ni borua i. Pittor diseat* ibana ma i. Dibuat ibana ma muse topung lao mambahen roti na so marragi jala dipanggang ma i.
25 Dilehon borua i ma i sude tu si Saul dohot tu akka tentarana jala mangan ma nasida. Dung i mulak ma nasida di borngin i.+
Surat na di toru
^ As. “panjaga ni ulukku”.
^ Sumpa on patuduhon pasti do ikkon saut janji on, songon pastina Debata mangolu.
^ Suru-suruan na jahat na pasuman-suman si Samuel.
^ Lapatanna, mate nama nasida songon si Samuel.
^ As. “dipelehon”.
