1 Samuel 4:1-22
4 Jala torus ma dipaboa si Samuel hata ni Debata tu sude halak Israel.
Di sada tikki, marporang ma halak Israel mangalo halak Palistim. Markemah ma nasida di labbung ni luat Ebeneser jala markemah ma halak Palistim di kota Apek.
2 Dung i, marbaris ma halak Palistim marporang mangalo halak Israel. Alai dang taralo ni halak Israel be halak Palistim jala gabe talu ma nasida. Adong ma hira-hira 4.000 halak Israel na mate di parporangan i.
3 Dung mulak halak Israel tu perkemahan, didok akka pangituai* ni halak Israel ma, “Boasa dipasombu Jahowa hita sadari on ditaluhon* halak Palistim?+ Beta ma taboan poti parpadanan ni Jahowa sian Silo.+ Ai molo taboan poti parpadanan i, paluaonna do hita sian musutta.”
4 Dung i disuru ma halak tu Silo. Disuru ma nasida mamboan poti parpadanan ni Jahowa, Pamimpin ni Akka Tentara,* na martahta di ginjang* ni akka kerubim.*+ Tikki diboan poti parpadanan ni Debata na sittong i, dohot do ro anak ni si Eli na dua i, i ma si Hopni dohot si Pinehas.+
5 Tikki sahat poti parpadanan ni Jahowa di perkemahan i, sude ma halak Israel marsurak, pola humutur tano on.
6 Tikki dibege halak Palistim soara ni halak Israel na marsurak i, didok nasida ma, “Boasa marsurak halak Heber i di perkemahan ni nasida?” Ujungna, diboto nasida ma naung diboan poti parpadanan ni Jahowa tu perkemahan i.
7 Gabe mabiar ma halak Palistim, jala didok nasida ma, “Nungnga ro Debata tu perkemahan i!”+ Didok nasida ma muse, “Mate nama hita. Dang hea dope masa na songon on!
8 Mate nama hita! Ise ma na boi paluahon hita sian Debata na massai gogo i? Tikki di padang gurun halak Israel, Ibana do Debata na mambahen marragam hasusaan tu halak Mesir lao pamatehon nasida.+
9 Hamu halak Palistim, barani ma hamu. Patudu ma na bawa do hamu, asa unang gabe hatoban ni halak Heber i hamu songon naung dibahen hamu tu nasida.+ Marporang ma hamu. Patudu ma na bawa do hamu!”
10 Marporang ma halak Palistim mangalo halak Israel jala ditaluhon ma halak Israel.+ Massai godang do na dipamate. Adong 30.000 tentara ni halak Israel na mardalan pat na dipamate. Alani i, marlarian ma halak Israel tu kemah ni nasida.
11 Dibuat halak Palistim do muse poti parpadanan ni Debata jala dipamate do anak ni si Eli na dua i, i ma si Hopni dohot si Pinehas.+
12 Adong ma sahalak bawa na lari sian parporangan i, halak Benjamin do ibana. Sahat ma ibana di Silo di ari i, maribak do abitna, jala martano-tano do uluna.+
13 Tikki sahat bawa i, hundul do si Eli paima-imahon di kursi na di topi ni dalan. Ai marsak do ibana mamikkiri poti parpadanan ni Debata na sittong i.+ Masuk ma bawa i tu kota jala dipaboa ma sude na masa i, gabe mangangguki ma sude pangisi ni kota i.
14 Tikki dibege si Eli soara ni na mangangguki i, didok ibana ma, “Soara ni aha do i?” Pittor didapotton bawa i ma si Eli jala dipaboa ma tu ibana sude na masa i.
15 (Nungnga marumur 98 taon si Eli jala dang boi be ibana marnida. Ai nungnga rambonon matana.)+
16 Dung i didok bawa i ma tu si Eli, “Na ro sian parporangan i do au! Na lari do au sian parporangan i.” Didok si Eli ma tu ibana, “Aha do na masa amang?”
17 Didok bawa na pasahatton barita i ma, “Lari do halak Israel sian halak Palistim jala talu do nasida.+ Mate do anakmu si Hopni dohot si Pinehas.+ Jala nungnga dibuat halak Palistim be poti parpadanan ni Debata na sittong.”+
18 Tikki dipaboa bawa i taringot tu poti parpadanan ni Debata na sittong i, balik ma si Eli sian kursina na di labbung ni gerbang i. Gabe ponggol ma rukkungna jala mate ma ibana. Ai mokmok do ibana jala nungnga matua. Saleleng 40 taon ma ibana gabe hakim ni halak Israel.
19 Hamil do tikki i istri ni si Pinehas, parumaen ni si Eli jala nungnga naeng partus ibana. Tikki dibege ibana naung dibuat poti parpadanan ni Debata na sittong i, jala nungnga mate simatuana dohot suamina, toppu ma ibana mangae jala partus.
20 Nungnga naeng mate ibana. Alani i, didok akka borua na jongjong di labbungna i ma, “Unang be marsak ho. Nungnga tubu anakmu.” Alai dang diparrohahon ibana be i* jala dang dialusi.
21 Dung i dibahen ibana ma goar ni anakna i si Ikabod.*+ Ai didok ibana do, “Nungnga mago hasangapon ni halak Israel.”+ Didok ibana pe songon i, ala nungnga diboan poti parpadanan ni Debata na sittong i jala nungnga mate simatuana dohot suamina.+
22 Didok ibana do, “Nungnga mago hasangapon ni halak Israel. Ai nungnga diboan poti parpadanan ni Debata na sittong i.”+
Surat na di toru
^ As. “Boasa ditaluhon Jahowa hita marhite”.
^ Manang “Sebaot”, lapatanna pamimpin ni akka suru-suruan na di banua ginjang.
^ Manang boi do “di holang-kolang”.
^ Manang “dang dilehon rohana”.
^ Lapatanna, “Didia do Hasangapon i?”
