2 Samuel 23:1-39
23 On ma hata ni si Daud na parpudi:+
“Hata ni si Daud anak ni si Isai,+Hata ni bawa na dipatimbo,+
Halak na pinillit+ ni Debata ni si Jakkob,Parende na tabo soarana mangendehon akka ende+ ni halak Israel.
2 Makkatai do au marhite tondi parbadia ni Jahowa.+Di dilakku do hatana i.+
3 Makkatai ma Debata ni Israel.Didok Dolok Batu ni Israel+ ma tu au,
‘Molo sittong do sasahalak mamaretta,+Mamaretta di bagasan biar mida Debata,+
4 Dos ma i songon mataniari na marsinondang tikki manogot,+Tikki ias langit manogotna i.
Dos ma i songon mataniari na marsinondang dung sae udan,Na mambahen martumbur suan-suanan di tano on.’+
5 Dos songon i ma akka pinopparhu* di jolo ni Debata.
Ai nungnga dibahen Ibana parjanjian na saleleng ni lelengna tu au,+Denggan do diatur Ibana saluhutna jala dang muba parjanjian i.
Sai na pasautonna do parjanjian i,Ai parjanjian i do na paluahon au jala na mambahen au marlas ni roha.+
6 Alai anggo halak na so hasea, dos do i songon suga-suga na ikkon dibolokkon+Ai dang boi tiopon ni tangan ni jolma nasida.
7 Molo naeng tiopon ni sasahalak nasida,Ikkon boanonna do sinjata na sian bosi dohot tombak,*
Jala ikkon tutungon do nasida di ingananna i sahat tu na habis.”
8 Akka on ma goar ni tentara ni si Daud na gogo:+ si Josep-basebet halak Takemon. Ibana do na mamimpin tolu tentara ni si Daud na gogo.+ Hea do dipamate ibana 800 halak mamakke tombak tikki marporang.
9 Dukkon ibana, i ma si Eleasar+ anak ni si Dodo+ anak ni si Ahohi. Di sada tikki marpungu ma halak Palistim naeng mangalo halak Israel. Adong do tolu tentara na gogo mandongani si Daud mangalo halak Palistim i. Si Eleasar ma sahalak sian nasida. Di tikki i, lari do halak Israel.
10 Alai dang olo si Eleasar lari, torus do dialo ibana halak Palistim, sappe marjogal nama tanganna maniop podang i.+ Alani i, gabe monang* ma dibahen Jahowa halak Israel di ari i.+ Dung i, ro ma muse halak Israel i lao mambuat akka barang ni halak Palistim na ditaluhon i.
11 Dukkon ibana, i ma si Samma anak ni si Age halak Harari. Di sada tikki marpungu ma halak Palistim di Lehi lao mangalo halak Israel. Disi adong do ladang kacang merah. Tikki i, lari do halak Israel sian halak Palistim.
12 Alai jongjong ma ibana di tonga-tonga ni ladang i lao mampartahatton ladang i. Jala torus ma dialo ibana halak Palistim i. Ujungna, monang* ma halak Israel dibahen Jahowa.+
13 Tikki musim panen, lao ma 3 sian 30 pamimpin ni tentara ni Israel mandapotton si Daud tu Gua Adullam.+ Tikki i, nungnga markemah halak Palistim di Rura Repaim.+
14 Di inganan partabunianna+ do si Daud jala di Betlehem do perkemahan ni tentara ni halak Palistim.
15 Dung i, didok si Daud ma, “Autsugari ma boi huinum aek na sian sumur na di labbung ni gerbang ni Betlehem i!”
16 Pittor lao ma tolu tentara ni si Daud na gogo i. Dibolus nasida ma perkemahan ni halak Palistim. Dung i, dibuat nasida ma aek na sian sumur na di labbung ni gerbang ni Betlehem i. Diboan nasida ma aek i tu si Daud. Alai dang olo si Daud manginum i. Diusehon ibana ma aek i tu tano di jolo ni Jahowa.+
17 Jala didok ibana ma, “Ale Jahowa, dang tarinum au aek on! Songon na manginum mudar+ ni halak on do au molo huinum i. Ai nungnga pola martaru hosa nasida lao mambuat aek on!” Alani i, dang olo si Daud manginum aek i. Akka i ma na diulahon tolu tentara ni si Daud na gogo i.
18 Adong do muse tolu nai tentara ni si Daud na gogo. Si Abisai+ abang ni si Joab anak ni si Seruya+ ma pamimpin ni nasida. Hea do dipamate si Abisai 300 halak mamakke tombakna. Jala tarbarita do ibana songon tolu tentara ni si Daud na gogo na parjolo i.+
19 Ibana do pamimpin ni tolu tentara ni si Daud na asing na gogo i jala ibana do na ussangap sian nasida. Alai dang unjago ibana sian tolu tentara ni si Daud na gogo na parjolo i.
20 Adong ma muse sahalak tentara na barani.* Goarna si Benaya,+ anak ni si Jehoyada. Godang do na dibahen ibana di Kabseel+ lao patuduhon habaranionna. Dipamate ibana do dua anak ni si Ariel halak Moab i. Turun do ibana tu sumur tikki musim salju jala dipamate ibana do sada singa.+
21 Hea do dibunu si Benaya sada bawa halak Mesir pardaging na balga. Adong do tombak ni halak Mesir i. Alai tikki dialo si Benaya ibana mamakke tukkotna, dirampas si Benaya ma tombakna i jala dipamate ma halak Mesir i mamakke tombakna.
22 Akka i ma na diulahon si Benaya anak ni si Jehoyada. Jala tarbarita do ibana songon tolu tentara ni si Daud na gogo na parjolo i.
23 Ussangap do si Benaya sian na 30 halak i. Alai dang unjago ibana sian tolu tentara ni si Daud na gogo na parjolo i. Nang pe songon i, dipillit do ibana gabe pamimpin ni pengawal ni si Daud.
24 Dohot do si Asahel+ anggi ni si Joab i tu na 30 halak i: si Elihanan anak ni si Dodo na sian Betlehem,+
25 si Samma halak Harod, si Elika halak Harod,
26 si Heles+ halak Bet-palet,* si Ira+ anak ni si Ikes halak Tekoa,
27 si Abi-eser+ halak Anatot,+ si Mebunnai halak Husa,
28 si Salmon halak Ahohi, si Maharai+ halak Netopa,
29 si Heleb anak ni si Baana halak Netopa, si Ittai anak ni si Ribai na sian Gibea huta ni halak Benjamin,
30 si Benaya+ halak Piraton, si Hidai na sian huta na jonok tu akka sunge* na di Gaas,+
31 si Abi-albon halak Arbati, si Asmapet halak Bahurim,
32 si Eliaba halak Salabim, akka anak ni si Jasen, si Jonatan,
33 si Samma halak Harari, si Ahiam anak ni si Sarar halak Harari,
34 si Elipelet anak ni si Ahasbai anak ni halak Maakat, si Eliam anak ni si Ahitopel+ halak Gilo,
35 si Hesrai halak Karmel, si Paarai halak Arbi,
36 si Igal anak ni si Natan na sian Zoba, si Bani halak Gad,
37 si Selek halak Ammon, si Naharai halak Beerot, siboan sinjata ni si Joab anak ni si Seruya,
38 si Ira halak Itri, si Gareb halak Itri,+
39 dohot si Uria+ halak Het. Sudena 37 halak.
Surat na di toru
^ As. “jabukku”.
^ Manang “hujur”.
^ Manang “gabe malua”.
^ Manang “malua”.
^ As. “anak ni halak na barani”.
^ Manang “halak Palti”.
