4 Musa 10:1-36
10 Dung i didok Jahowa ma tu si Musa,
2 “Bahen ma dua tarompet+ na ditopa sian perak. Pakke ma i lao manjou bangso i asa marpungu, manang tikki lao borhat.
3 Tikki diombus tarompet na dua i, marpungu ma sude halak Israel tu jolom di jolo ni pintu kemah parpunguan.+
4 Alai molo holan sada do tarompet i diombus, holan akka pamimpin ni na sasaribu halak ma na ro marpungu tu jolom.+
5 “Molo muba-uba soara ni tarompet i, ikkon borhat do rombongan na markemah di sabola timur.+
6 Molo makkuling muse tarompet i, jala muba-uba soarana, ikkon borhat do rombongan na markemah di sabola selatan.+ Ikkon songon i do soara ni tarompet i, molo naeng borhat sada sian rombongan na di perkemahan i.
7 “Tikki naeng dijou sude halak Israel i marpungu, ikkon diombus do tarompet i.+ Alai, dang boi bahenonna muba-uba soara ni tarompet i.
8 Ikkon akka anak ni si Aron, i ma akka malim i do na boi mangombus tarompet i.+ Marlakku do aturan cara mamakke tarompet on tu hamu dohot tu pinopparmuna saleleng ni lelengna.
9 “Molo adong musu na ro lao mangalo hamu di luatmuna i, ikkon diombus hamu do tarompet i lao manjou asa marporang.+ Dung i ingoton ni Jahowa Debatamuna i ma hamu jala paluaonna ma hamu sian musumuna.
10 “Jala tikki las rohamuna,+ i ma tikki mambahen akka perayaan+ manang di mula ni ganup bulan, ikkon diombus hamu do tarompet i. Ombus hamu ma i di jolo ni pelean situtungon+ dohot pelean pardamean.*+ Molo diulahon hamu i, ingotokku ma hamu. Ai Au do Jahowa Debatamuna.”+
11 Di ari na paduapuluhon, di bulan na paduahon,+ di taon na paduahon, naek ma ombun* i sian atas ni tabernakel,+ inganan ni poti na marisi patik i.
12 Borhat ma halak Israel sian Gurun Sinai mangihutton susunan naung ditottuhon.+ Dung i, so ma ombun i di Gurun Elaparan.+
13 On dope parjolo sahali nasida borhat mangihutton paretta na dipaboa Jahowa marhite si Musa.+
14 Rombongan na tolu marga na dipimpin marga Juda ma na parjolo borhat. Borhat ma nasida mangihutton punguan* ni nasida be. Si Nahason+ anak ni si Aminadab ma na mamimpin rombongan i.
15 Pamimpin ni marga Isasar, i ma si Netaneel+ anak ni si Zuar.
16 Pamimpin ni marga Zebulon, i ma si Eliab+ anak ni si Helon.
17 Dung dibongkar tabernakel i,+ borhat ma pinoppar ni si Gerson+ dohot pinoppar ni si Merari+ mangangkat tabernakel i.
18 Dung i borhat ma muse rombongan na tolu marga na dipimpin marga Ruben. Borhat ma nasida mangihutton punguan* ni nasida be. Si Elizur+ anak ni si Sedeur ma na mamimpin rombongan i.
19 Pamimpin ni marga Simeon, i ma si Selumiel+ anak ni si Zurisaddai.
20 Pamimpin ni marga Gad, i ma si Eliasap+ anak ni si Deuel.
21 Dung i, borhat ma muse pinoppar ni si Kohat na mangangkat akka barang na di inganan na badia i.+ Ai nungnga ikkon jongjong tabernakel i andorang so sahat nasida.
22 Borhat ma muse rombongan na tolu marga na dipimpin marga Epraim. Borhat ma nasida mangihutton punguanna* be. Si Elisama+ anak ni si Amihud ma na mamimpin rombongan i.
23 Pamimpin ni marga Manasse, i ma si Gamaliel+ anak ni si Pedazur.
24 Pamimpin ni marga Benjamin, i ma si Abidan+ anak ni si Gideoni.
25 Borhat ma muse rombongan na tolu marga na dipimpin marga Dan. Borhat ma nasida mangihutton punguan* ni nasida be. Nasida ma rombongan na parpudi sian sude rombongan na di perkemahan i. Si Ahieser+ anak ni si Amisaddai ma pamimpin ni rombongan i.
26 Pamimpin ni marga Aser, i ma si Pagiel+ anak ni si Okran.
27 Pamimpin ni marga Naptali, i ma si Ahira+ anak ni si Enan.
28 On ma susunan na diihutton halak Israel dohot punguan* ni nasida tikki borhat nasida.+
29 Makkatai ma si Musa tu si Hobab anak ni simatuana, i ma si Reguel*+ halak Midian i, ninna ma, “Borhat nama hami tu inganan na dijanjihon Jahowa lao lehononna tu hami.+ Dohot ma hamu, ihutton hamu ma hami.+ Burju pe hami tu hamu. Ai nungnga marjanji Jahowa lao mangalehon akka na denggan tu halak Israel.”+
30 Alai didok ibana ma, “Dang dohot au. Mulak nama au tu hutakku mandapotton keluargakku.”
31 Didok si Musa ma, “Tolong ma jo, unang tinggalhon hami. Ai ho do na mamboto didia hami boi markemah di gurun on. Ho do na boi patudu dalan* tu hami.
32 Molo rap ho dohot hami,+ sai na bagionnami do tu ho akka pasu-pasu na dilehon Jahowa tu hami.”
33 Borhat ma nasida sian dolok na pinillit ni Jahowa i.+ Mardalan ma nasida saleleng tolu ari lao mangalului inganan lao maradi.+ Saleleng di pardalanan i, di jolo ni nasida do dibahen poti+ parpadanan ni Jahowa.
34 Tikki mardalan nasida arian, di atas ni nasida do ombun+ ni Jahowa i manogu-nogu nasida.
35 Manang na sadihari pe diboan poti parpadanan i, didok si Musa do, “Hehe ma Ho ale Jahowa,+ bahen ma marserak sude musum. Jala bahen ma lari sude halak na marsogo ni roha tu Ho sian jolom.”
36 Tikki dipeakkon poti parpadanan i, didok si Musa do, “Ale Jahowa, ro ma Ho tu halak Israel na marribu-ribu na so taretong godangna i.”+
Surat na di toru
^ Di bahasa Heber, ombun na nidokna dison, i ma ombun na bentukna songon tiang.
^ As. “pasukan”.
^ As. “pasukan”.
^ As. “pasukanna”.
^ As. “pasukan”.
^ As. “pasukan”.
^ Na nidokna, i ma si Jetro.
^ As. “na gabe mata”.
