4 Musa 17:1-13
-
Tukkot ni si Aron marbunga (1-13)
17 Didok Jahowa ma tu si Musa,
2 “Makkatai ma ho tu bangso Israel i. Jalo ma sian pamimpin ni ganup marga*+ sada tukkot. Sada tukkot ma sian ganup marga,* jadi 12 ma sude tukkot i. Jala surat ma goar ni ganup pamimpin di tukkotna be.
3 Surat ma goar ni si Aron di tukkot ni marga Lepi. Ai sada do tukkot tu ganup pamimpin ni marga.*
4 Sippan ma sude tukkot i di kemah parpunguan di jolo ni poti inganan ni Patik i,+ i ma inganakku na somal pataridahon dirikku tu hamu.+
5 Tukkot ni manang ise na martunas, ibana ma na hupillit.+ Songon i ma carana Au pasohon ungut-ungut ni halak Israel, asa unang marungut-ungut be nasida tu Au+ dohot tu hamu.”+
6 Makkatai ma si Musa tu halak Israel. Dilehon sude pamimpin ni halak Israel i ma tukkot tu si Musa. Sada ma tukkot sian pamimpin ni ganup marga. Jadi 12 ma sude tukkot i, jala dohot do disi tukkot ni si Aron.
7 Disippan si Musa ma sude tukkot i tu jolo ni Jahowa, di bagasan kemah inganan ni poti na marisi patik i.
8 Marsogotna i, masuk ma si Musa tu kemah inganan ni poti na marisi patik i. Diida ibana ma, nungnga martunas tukkot ni marga Lepi, i ma tukkot ni si Aron i. Nungnga marbunga tukkot i jala nungnga adong parbuena, i ma buah almond naung malamun.
9 Diboan si Musa ma sude tukkot i sian jolo ni Jahowa, jala diboan ma i tu jolo ni sude halak Israel asa diida nasida. Dung i, dibuat nasida ma tukkotna be.
10 Didok Jahowa ma tu si Musa, “Sippan ma tukkot ni si Aron+ di jolo ni poti inganan na marisi patik i. Sippan ma i gabe tanda parningotan+ tu akka pangalo i.+ Marhite i, dang marungut-ungut be nasida tu Au, asa unang mate nasida.”
11 Pittor diulahon si Musa ma i. Diulahon ibana do i dos songon na diparettahon Jahowa tu ibana.
12 Didok halak Israel ma tu si Musa, “Saonari, mate nama hami. Pasti mate nama hami. Pamateonna nama hami sude!
13 Manang ise na jonok tu tabernakel ni Jahowa ikkon mate do.+ Alani i, pamateonna nama hami sude?”+
Surat na di toru
^ As. “pamimpin sian pihak ni bapakna”.
^ As. “sian pihak ni bapakna”.
^ As. “pamimpin sian pihak ni bapakna”.
