4 Musa 21:1-35
21 Dung dibege Raja Arad,+ i ma halak Kanaan na maringanan di Negeb i, na mardalan halak Israel sian Atarim, ro ma ibana mangalo halak Israel jala ditakkup ibana do deba halak Israel i.
2 Marjanji ma halak Israel tu Jahowa, didok nasida ma, “Molo dipasahat Ho do tu tangannami bangso on, pasti boi do dihancurhon hami akka kota ni nasida.”
3 Ditangihon Jahowa do pangidoan ni halak Israel i. Dipasahat ma halak Kanaan i tu nasida. Dipamate nasida ma akka pangisi ni kota i jala dihancurhon nasida ma akka kotana. Alani i ma digoari nasida luat i Horma.*+
4 Sian Dolok Hor,+ mardalan ma nasida tu arah Laut Merah. Mardalan do nasida sian i asa unang lewat nasida sian huta Edom.+ Alani pardalanan i, gabe loja ma nasida.
5 Torus ma nasida marungut-ungut tu Debata dohot tu si Musa.+ Didok nasida ma, “Boasa pola boanonmuna hami kaluar sian Mesir? Asa pamateonmuna do hami di gurun on? So adong sipanganon dison, aek pe so adong.+ Jala nungnga magigi hami mangallang manna* na so marguna on.”+
6 Diparo Jahowa ma akka ulok na marbisa tu tonga-tonga ni bangso i. Dipargut ulok i ma bangso i jala godang ma na mate.+
7 Dijuppangi nasida ma si Musa. Didok ma, “Nungnga mardosa be hami. Ai nungnga marungut-ungut hami tu Jahowa dohot tu ho.+ Martangiang ma ho tu Jahowa asa dipalao Ibana akka ulok on sian hami.” Dung i, martangiang ma si Musa tu Debata humokkop bangso i.+
8 Didok Jahowa ma tu si Musa, “Bahen ma sada patung ni ulok na marbisa, jala bahen ma i di sada tiang. Molo adong halak na dipargut ulok, ikkon idaonna ma tusi asa toktong ibana mangolu.”
9 Pittor dibahen si Musa ma sada ulok sian tombaga,+ jala dibahen ma i tu sada tiang.+ Molo adong halak na dipargut ulok, diida ma tu ulok na sian tombaga i, gabe mangolu ma ibana.+
10 Dung i, borhat ma muse halak Israel, markemah ma nasida di Obot.+
11 Borhat ma muse nasida sian Obot, jala markemah di Iye-abarim,+ di gurun na di sabola timur, na di jolo ni Moab.
12 Sian i, borhat ma muse nasida jala markemah di Rura* Zered.+
13 Borhat ma muse nasida sian i, jala markemah ma nasida di luat na di Arnon.+ Di gurun do Arnon i jala luatna mulai sian parbatasan ni halak Amori. Jala gurun on do muse parbatasan tu luat ni halak Moab, i ma batas ni luat ni halak Moab tu halak Amori.
14 Alani i ma disurat di Bukku Parporangan ni Jahowa taringot tu “Waheb na di Supa dohot akka rura* na di Arnon,
15 jala marganjang do akka rura* i sahat tu Ar dohot tu parbatasan ni Moab”.
16 Dung i sahat ma nasida tu Beer.* Di sumur on do hea didok Jahowa songon on tu si Musa, “Papungu ma bangso i asa hulehon nasida minum.”
17 Laos di tikki i marende ma halak Israel. Songon on ma endena:
“Marbuhal-buhal ma aekmu ale sumur! Marende ma hamu alani aek i!
18 Sumur na dibahen akka pamimpin, na digali akka na sangap,Marhite tukkot ni harajaon ni nasida dohot tukkot ni nasida sandiri.”
Dung i, borhat ma nasida sian gurun i tu Matana.
19 Sian Matana tu Nahaliel, sian Nahaliel tu Bamot.+
20 Sian Bamot tu rura na di luat* Moab,+ na di ginjang ni Pisga,+ na di jolo ni Yesyimon.*+
21 Dung i, disuru halak Israel ma piga-piga halak mandapotton si Sihon raja ni halak Amori. Didok nasida ma,+
22 “Paloas ma hami mamolus sian luat ni tuan on. Dang pola lewat hami sian ladang manang porlak anggur. Dang pola huinum hami aek na sian sumur manang na didia pe di luatmon. Holan mardalan sian Dalan ni Raja* i pe hami, sappe tu na sae hubolus hami luat ni tuan on.”+
23 Alai dang dipaloas si Sihon halak Israel lewat sian luatna i. Gariada dipapungu ibana do sude tentarana. Lao ma nasida tu gurun mangalo halak Israel. Sahat ma nasida di Jahas, jala marporang ma nasida mangalo halak Israel.+
24 Alai talu ma ibana dibahen halak Israel. Dipamate ma akka tentarana i mamakke podang.+ Jala dibuat halak Israel ma luatna i,+ mulai sian Arnon+ sahat tu Jabok,+ luat na jonok tu luat ni halak Ammon. Ai sahat tu luat Jaser+ do na dibuat nasida, i ma parbatasan na tu luat ni halak Ammon.+
25 Dibuat halak Israel ma sude kota i jala tinggal ma nasida di kota ni halak Amori,+ di Hesbon, dohot di sude kota na di sakalilingna.
26 Di Hesbon i do inganan ni si Sihon raja ni halak Amori. Ibana do na hea marporang dohot raja ni Moab jala na mambuat sude luatna sahat tu Arnon.
27 Alani i do dibahen puisi on lao mangarehei,
“Ro ma hamu tu Hesbon.
Lok ma dipajongjong kota ni si Sihon jala lok ma dibahen togu.
28 Nungnga kaluar api sian Hesbon, api na marsigor-gor sian kota ni si Sihon.
Api na manutung huta Ar na di Moab, akka nappuna inganan na timbo* na di Arnon.
29 Marjea ma ho ale Moab! Hancurhononna nama ho, ale bangso na mardebatahon Kamos!+
Bahenonna ma akka anakmu gabe buronan, ditakkup si Sihon raja ni halak Amori i ma akka borum.
30 Tapanah ma nasida,Dihancurhon nama Hesbon sahat tu Dibon,+Tahancurhon ma ibana sahat tu Nopal,
Lok ma ditutung api sudena i sahat tu Medeba.”+
31 Dung i tinggal ma halak Israel di luat ni halak Amori.
32 Disuru si Musa ma piga-piga halak gabe mata-mata tu Jaser.+ Ditaluhon nasida ma akka kota na di sakalilingna. Jala diusir nasida ma halak Amori na adong disi.
33 Dung i marbalik ma nasida jala mardalan sian Dalan Basan. Ro ma si Og+ raja ni Basan rap dohot akka tentarana marporang mangalo nasida di Edrei.+
34 Didok Jahowa ma tu si Musa, “Unang pola mabiar ho tu ibana.+ Ai pasahatonku do ibana, sude tentarana, dohot luatna i tu tanganmu.+ Bahenonmu do tu ibana dos songon na dibahen ho tu si Sihon raja ni halak Amori na tinggal di Hesbon i.”+
35 Dipamate nasida ma ibana, akka anakna, dohot sude tentarana. Dang adong nanggo sahalak pe na dipasombu mangolu.+ Dung i, dibuat nasida ma luatna i.+
Surat na di toru
^ Lapatanna, “Dipapulik Lao Dihancurhon”.
^ As. “roti”.
^ Lapatanna, “Sumur”.
^ Manang boi do “gurun”.
^ As. “ladang”.
^ Na nidokna, i ma jalan raya.
