4 Musa 22:1-41
22 Dung i, borhat ma halak Israel jala markemah ma nasida di Gurun Moab na di bariba ni Sunge Jordan, na di jolo ni kota Jeriko.+
2 Jadi dibege si Balas+ anak ni si Zippor ma sude na dibahen halak Israel tu halak Amori.
3 Gabe mabiar situtu ma halak Moab i alani godang ni halak Israel. Makkahitir ma nasida jala mandele alani bangso i.+
4 Alani i, didok halak Moab ma tu akka pamimpin ni halak Midian,+ “Bodduton ni bangso i nama sude luat na di sakalilingta, songon lombu na mamboddut duhut-duhut na di ladang.”
Di tikki i, si Balas anak ni si Zippor do na gabe raja ni Moab.
5 Disuru ibana ma piga-piga halak manjou si Bileam anak ni si Beor na tinggal di Petor+ huta hatubuanna, na jonok tu Sunge Euprat. Didok ibana ma, “Ida ma! Adong sada bangso na kaluar sian Mesir. Nungnga digohi nasida be luat* on.+ Nungnga massai jonok nasida markemah tu luatnami.
6 Alani i, ro ma jo ho. Burai ma jo bangso on,+ ai umgogo do nasida sian hami. Atik boha boi taluhonokku nasida, jala huusir sian luat on. Ai takkas do huboto, dapotan pasu-pasu do nasa na dipasu-pasu ho, jala hona bura do nasa na diburai ho.”
7 Jadi lao ma akka pamimpin ni halak Moab dohot Midian mandapotton si Bileam. Diboan nasida do hepeng lao upa ni si Bileam+ mamburai halak Israel. Jala dipasahat nasida ma hata ni si Balas i tu ibana.
8 Didok si Bileam ma tu nasida, “Dison ma jo hamu marborngin, asa hupaboa tu hamu songon dia didok Jahowa tu au.” Alani i, marborngin ma akka pamimpin ni halak Moab i di inganan ni si Bileam.
9 Dung i ro ma Debata* mandapotton si Bileam. Didok ma,+ “Akka ise do donganmi?”
10 Didok si Bileam ma tu Debata na sittong, “Akka halak na sinuru ni si Balas anak si Zippor raja ni Moab i do i. Disuru do nasida mandok tu au,
11 ‘Ida ma! Adong sada bangso na kaluar sian Mesir. Nungnga digohi nasida be luat* on. Alani i, ro ma jo ho. Burai ma jo bangso on.+ Atik boha boi taluhonokku nasida, jala huusir sian luat on.’”
12 Alai didok Debata ma tu si Bileam, “Unang olo ho lao rap dohot nasida. Jala unang burai bangso i. Ai nungnga hupasu-pasu nasida.”+
13 Manogotna i dungo ma si Bileam jala didok ma tu akka pejabat ni si Balas, “Mulak ma hamu tu hutamuna, ai dang diloas Jahowa au lao rap dohot hamu.”
14 Mulak ma akka pamimpin ni Moab i tu si Balas. Didok nasida ma, “Dang olo si Bileam ro rap dohot hami.”
15 Alai disuru si Balas ma muse ro akka pejabatna. Unggodang do nasida jala ussangap sian na parjolo i.
16 Dijuppangi nasida ma si Bileam jala didok ma, “Songon on ma hata ni si Balas anak ni si Zippor, ‘Tolong ma jo, ro ma ho. Sotung adong be na mangabbati ho lao ro.
17 Sangap situtu pe ho bahenonku jala huulahon pe manang aha na didok ho. Alani i tolong ma, ro ma jo ho, burai ma bangso on.’”
18 Alai dialusi si Bileam ma akka halak na disuru si Balas i, “Haru dilehon si Balas pe di au jabuna na gok perak dohot mas i, dang olo au mangalanggar paretta ni Jahowa Debatakku. Atik na gelleng pe paretta i manang na balga.+
19 Alai nang pe songon i, dison ma jo hamu marborngin asa huboto songon dia do didok Jahowa tu au.”+
20 Di borngin i ro ma Debata mandapotton* si Bileam, ninna ma, “Molo na mangalap ho do nasida ro, lao ma ho rap dohot nasida. Alai holan hata na hudok do na boi dohononmu.”+
21 Manogotna i dungo ma si Bileam. Diparade ibana ma halodena* jala borhat ma ibana rap dohot akka pejabat ni Moab.+
22 Massai muruk situtu ma Debata ala lao ibana. Tikki marhalode si Bileam dohot dua pangurupina na mandongani ibana, jongjong ma suru-suruan ni Jahowa di dalan lao mangabbati ibana.
23 Diida halode i ma suru-suruan ni Jahowa jongjong di dalan huhut maniop podang di tanganna. Gabe manirpang ma halode i tu ladang. Alai dipukkul si Bileam ma halodena i asa mulak muse tu dalanna hian.
24 Jongjong ma muse suru-suruan ni Jahowa i di dalan na soppit, di holang-kolang ni dua porlak anggur. Martembok na sian batu do sabola kiri dohot sabola kanan ni dalan i.
25 Tikki diida halode i suru-suruan ni Jahowa, gabe dihapitton ibana ma dirina tu dinding ni tembok i, hapit ma pat ni si Bileam tu tembok i. Ujungna, dipukkul si Bileam ma muse halode i.
26 Dung i, pinda ma muse suru-suruan ni Jahowa i tu jolo ni halode i. Jongjong ma ibana di dalan na soppit, na so adong dalan na boi mambahen manirpang tu kiri manang tu kanan.
27 Tikki diida halode i suru-suruan ni Jahowa, manukkap ma halode i hape hundul dope si Bileam di ginjangna. Gabe muruk situtu ma si Bileam jala sai dipukkul ibana ma halodena i pakke tukkotna.
28 Ujungna, dibahen Jahowa ma makkatai halode*+ ni si Bileam. Didok ma, “Ai aha huroha hubahen tu ho umbahen na dipukkuli ho au sappe tolu hali?”+
29 Dialusi si Bileam ma halodena i, “Ai diparmeam-meam ho do au. Autsugari adong podang di tanganku, nga hupamate ho!”
30 Didok halode i ma muse tu si Bileam, “Ai dang au halodem na sai toktong mamboan ho saleleng ni ngolum sahat tu saonari? Hea hubahen tu ho songon i saleleng on?” Dialusi si Bileam ma, “Daong nian.”
31 Dung i dibukka Jahowa ma mata ni si Bileam.+ Diida ibana ma suru-suruan ni Jahowa jongjong di dalan huhut maniop podang. Pittor marsinggang ma ibana.
32 Dung i didok suru-suruan ni Jahowa i ma tu ibana, “Nungnga tolu hali dipukkul ho halodemi. Boasa dibahen ho songon i tu halodemi? Ida ma, au do na ro mangabbat dalanmu. Ai maralo do na niulahonmon tu lomo ni rohakku.+
33 Nungnga tolu hali diida halodemi au, jala mangelak do ibana sian au.+ Autsugari dang mangelak ibana sian au, nungnga mate hian ho hubahen. Alai molo halodemi pasombuonku do mangolu.”
34 Didok si Bileam ma tu suru-suruan ni Jahowa i, “Nungnga mardosa be au. Ai dang huboto, tuan do hape na jongjong di dalan i lao manjuppangi au. Molo dang lomo roham hutorusson pardalanakkon, mulak pe au.”
35 Alai didok suru-suruan ni Jahowa i ma tu si Bileam, “Lao ma ho rap dohot nasida. Alai holan hata na hudok ma dokkon tu nasida.” Dung i lao ma si Bileam rap dohot akka pejabat ni si Balas.
36 Dung dibege si Balas naung ro si Bileam, pittor ro ma ibana mandapotton si Bileam tu kota Moab, di topi ni Rura Arnon, parbatasan ni kota i.
37 Didok si Balas ma tu si Bileam, “Nungnga husuru halak mangalap ho, alai boasa dang ro ho? Na dirippu ho do dang sanggup au mambahen ho gabe halak na sangap situtu?”+
38 Dialusi si Bileam ma si Balas, ninna ma, “Saonari nga dison be au tuan. Alai dang diloas au mandok manang aha pe, asing ni hata na dipaboa Debata tu au.”+
39 Lao ma si Bileam rap dohot si Balas, sahat ma nasida di Kiriat-huzzot.
40 Dipelehon si Balas ma lombu dohot biru-biru jala dikirim ma deba tu si Bileam dohot tu akka pejabat na rap dohot ibana.
41 Manogotna i, dialap si Balas ma si Bileam jala lao ma nasida tu Bamot-baal. Sian i, diida nasida ma bangso Israel.+
Surat na di toru
^ As. “tano”.
^ Ra marhite suru-suruan ni Debata manang marhite parnidaan.
^ As. “tano”.
^ Ra marhite suru-suruan ni Debata manang marhite parnidaan.
^ As. “halode boru-boru”.
^ As. “dibukka Jahowa ma baba ni halode boru-boru”.
