4 Musa 30:1-16
30 Dung i makkatai ma si Musa tu akka pamimpin+ ni marga ni Israel. Didok ma, “Songon on ma paretta ni Jahowa:
2 Molo adong sahalak bawa mambahen janji+ tu Jahowa manang marsumpa+ lao marpattang mangulahon sada ulaon, dang boi sundatanna janjina i.+ Ikkon bahenonna do sude cara lao pasautton janjina i.+
3 “Molo adong sahalak borua na poso na tinggal di jabu ni bapakna dope, mambahen janji tu Jahowa manang marsumpa lao marpattang mangulahon sada ulaon,
4 jala molo dibege bapakna do ibana mambahen janji manang sumpa, alai dang diorai ibana, toktong do marlakku janjina i. Ikkon ulahononna ma sude na nidokna di janjina i.
5 Alai molo diorai bapakna do ibana dung dibege dibahen ibana janji manang sumpana i, dang marlakku be janjina i. Sesaon ni Jahowa do dosana, ai na diorai bapakna do ibana mambahen janji i.+
6 “Alai molo nungnga muli ibana, hape dibahen ibana janji manang sumpa, dang jolo dipikkiri ibana,
7 jala dibege suamina do janjina i, alai dang diorai ibana, toktong do marlakku janjina manang sumpana i.
8 Alai molo diorai suamina do ibana tikki dibege janji manang sumpana i, boi do disundati suamina janji manang sumpa na binahenna so jolo dipikkiri.+ Sesaon ni Jahowa do dosa ni borua i.
9 “Alai molo adong sahalak ina na mabalu manang borua na disirakkon mambahen janji, toktong do marlakku manang aha pe na nidokna di janjina.
10 “Alai molo adong sahalak borua mambahen janji, manang marsumpa lao marpattang mangulahon sada ulaon tikki di jabu ni suamina ibana,
11 jala tikki dibege suamina janjina i, setuju do ibana tu janji i jala dang diorai, toktong do marlakku janji manang sumpana i.
12 Alai tikki dibege suamina janji i, jala disundati suamina i do janji manang sumpana lao marpattang mangulahon sada ulaon, dang marlakku be sude na nidokna di janji i.+ Sesaon ni Jahowa do dosa ni borua i. Ai na disundati suamina do ibana mambahen janji.
13 Suamina do na marhak lao mangorai manang paloasson ibana mambahen janji manang sumpa lao marpattang mangulahon sada ulaon manang marjanji lao mangulahon sada ulaon.
14 Molo dang disundati suamina i janji ni istrina sian ari tu ari, on patuduhon setuju do suamina i tu sude na nidokna di janji manang sumpana i. Alana, dang diorai suamina ibana mambahen janjina tikki dibege ibana janjina i. Alani i, nungnga setuju suamina tu sude sumpa ni istrina i.
15 Alai molo disundati suamina do janji i di pudian ni ari, manang piga-piga ari dung dibege ibana janji ni istrina i, suamina i ma na mananggung akibat ni sala ni istrina.+
16 “Songon i ma paretta ni Jahowa tu si Musa taringot tu suami dohot istri, jala taringot tu sahalak ama dohot boruna na poso dope na tinggal di jabuna.”
