4 Musa 35:1-34
35 Makkatai ma muse Jahowa tu si Musa di Gurun Moab, na di topi ni Sunge Jordan+ di jonok ni kota Jeriko. Didok ma,
2 “Suru ma halak Israel mangalehon akka kota sian parbagianan ni nasida tu halak Lepi lao gabe inganan ni nasida tinggal.+ Jala ikkon lehonon ni nasida do muse akka inganan parmahanan na di sakaliling ni kota i.+
3 Disi ma halak Lepi tinggal, jala di inganan parmahanan i ma dibahen nasida akka binatang na dipiaro nasida, akka barang ni nasida, dohot sude binatang ni nasida na asing.
4 Ikkon dilehon nasida do inganan parmahanan i tu halak Lepi, bidangna 1.000 asta.* Dietong ma i sian pinggir ni tembok na di sakaliling ni kota i.
5 Di luar ni kota i, ikkon diukkur hamu do 2.000 asta tu sabola timur, 2.000 asta tu sabola selatan, 2.000 asta tu sabola barat, jala 2.000 asta tu sabola utara. Kota i ma na gabe di tonga-tonga. Jala akka i ma inganan parmahanan ni kota i.
6 “Ikkon lehononmuna do tu halak Lepi 42 kota tamba ni 6 kota parlinggoman.+ Tu kota parlinggoman i ma lari akka halak na mambunu.+
7 Godang ni kota na ikkon dilehon tu halak Lepi, i ma 48 kota dohot ma i inganan parmahanan ni kota i.+
8 Akka kota i dibuat sian kota parbagianan ni halak Israel.+ Molo godang do nasida sapunguan, godang ma dibuat sian nasida. Alai molo saotik do nasida sapunguan, saotik ma dibuat sian nasida.+ Ganup punguan ikkon mangalehon deba kota ni nasida tu halak Lepi mangihutton parbagianan na dijalo nasida.”
9 Didok Jahowa ma muse tu si Musa,
10 “Songon on ma dokkon tu halak Israel i, ‘Ikkon ditaripari hamu do Sunge Jordan lao tu luat Kanaan.+
11 Pillit hamu ma akka kota na cocok dihilala hamu gabe kota parlinggoman. Molo adong halak na so sengaja mambunu sasahalak, ikkon lari do ibana tu kota i.+
12 Akka kota i ma na gabe inganan parlinggoman ni halak na mambunu i sian keluarga ni na mate i na naeng mambalos ibana,*+ asa unang dipamate ibana andorang so diadili di jolo ni bangso i.+
13 I ma guna ni onom kota parlinggoman na dipillit hamu.
14 Pillit hamu ma tolu kota di sabola timur ni Sunge Jordan+ jala tolu kota di luat Kanaan+ lao gabe kota parlinggoman.
15 Gabe inganan parlinggoman ma onom kota i di halak Israel, halak na sian bangso na asing,+ dohot halak panoppang na rap tinggal dohot nasida. Molo adong sian nasida na so sengaja mambunu sasahalak, lari ma ibana tusi.+
16 “‘Alai molo adong halak na mangattuk sasahalak mamakke alat na sian bosi, jala mate do halak na diattuk i, pambunu do ibana. Ikkon dipamate do pambunu i.+
17 Molo diattuk ibana do sasahalak i mamakke batu na boi mambahen halak mate, jala mate do halak na diattuk i, pambunu do ibana. Ikkon dipamate do pambunu i.
18 Molo diattuk ibana do sasahalak i mamakke hau na boi mambahen halak mate, jala mate do halak na diattuk i, pambunu do ibana. Ikkon dipamate do pambunu i.
19 “‘Halak na marhak pamatehon pambunu i, i ma keluarga ni na mate i. Molo pajuppang nasida, boi do pamateon ni keluargana i pambunu i.
20 Molo dionjar ibana sasahalak ala sogo rohana, manang didanggurhon ibana manang aha ala naeng mangulahon na jahat, jala gabe mate sasahalak i,+
21 manang alani sogo ni rohana, diattuk ibana sasahalak mamakke tanganna, jala mate halak na diattuk i, ikkon dipamate do ibana. Ai pambunu do ibana. Molo pajuppang ibana dohot keluarga ni na mate i, pamateonna do ibana.
22 “‘Alai molo dang sengaja ibana mangonjar sasahalak i, manang dang ala na sogo rohana, manang didanggur ibana sasahalak alai dang naeng mangulahon na jahat ibana,+
23 jala molo didanggur ibana batu, hape dang diboto ibana adong disi sasahalak, jala dang na marmusu ibana tu sasahalak i, manang dang naeng mangulahon na jahat ibana tu sasahalak i, hape mate halak na hona batu i,
24 ikkon diihutton bangso i do akka aturan i tikki diadili nasida ibana dohot keluarga ni na mate na naeng mambalos ibana.+
25 Ikkon diselamatton bangso i do halak na mambunu i sian keluarga ni na mate na naeng mambalos i. Ikkon dipaulak do halak na mambunu i tu kota parlinggoman, ingananna lari hian. Ikkon disi do ibana tinggal sahat tu na mate sintua ni malim na dipillit mamakke miak na badia.*+
26 “‘Alai molo kaluar halak na mambunu i sian batas ni kota parlinggoman, ingananna lari i,
27 jala pajuppang ibana dohot halak na lao mambalos i di luar ni batas kota parlinggoman i, dung i dipamate ma ibana, dang marsala halak na mambalos i.
28 Alani i, ikkon toktong do ibana tinggal di kota parlinggoman i sahat tu na mate sintua ni malim. Alai molo dung mate sintua ni malim, boi ma ibana mulak tu hutana hian.+
29 Akka on ma aturan na ikkon pakkeonmuna dohot akka pinopparmuna tikki mangadili manang na didia pe hamu tinggal.
30 “‘Manang ise na pamatehon sasahalak, ikkon dipamate do ibana ala nungnga mambunu.+ Ikkon dipamate do ibana mangihutton hatorangan ni akka saksi.+ Alai molo holan sada do saksina, dang boi ibana dipamate.
31 Unang ma jalo tobusan ni sahalak pambunu na patut dipamate. Ai ikkon dipamate do ibana.+
32 Jala unang ma jalo tobusan ni halak na lari tu kota parlinggoman, i ma tobusan na dilehon asa boi ibana mulak tu hutana andorang so mate dope sintua ni malim.
33 “‘Unang bahen hamu ramun* tano ingananmuna tinggal. Ai gabe ramun do tano dibahen mudar.+ Jala dang boi tano i gabe badia molo so diusehon mudar ni halak na mangusehon mudar i tu tano i.+
34 Unang bahen hamu ramun tano ingananmuna tinggal, ai disi do Au tinggal. Au do Jahowa na maringanan di tonga-tonga ni halak Israel.’”+
Surat na di toru
^ 1 asta = 44,5 cm. Ida Lampiran B14.
^ Manang “sian halak na mambalosson mudar ni na mate i”.
^ I ma miak na dipakke lao mangalantik sasahalak lao mangulahon sada tugas.
