5 Musa 13:1-18
-
Maradoppon halak na murtad (1-18)
13 “Molo adong panurirang* manang halak na paboahon na lao masa marhite nipi di tonga-tongamuna, dilehon ibana tu hamu sada tanda manang ramalan,
2 jala tutu do sude masa tanda dohot ramalan na nidokna i, dung i didok ibana, ‘Beta, taihutton ma debata na asing, debata na so ditanda hamu. Jala tasomba ma akka debata i,’
3 unang tangihon hamu hata ni panurirang manang siparnipi i.+ Ai na diuji+ Jahowa Debatamuna i do hamu lao mamboto na tutu do dihaholongi hamu Jahowa Debatamuna i sian nasa rohamuna dohot sian nasa ngolumuna+ manang dang.
4 Jahowa Debatamuna i do na ikkon diihutton hamu, jala ikkon dihabiari hamu do Ibana. Ikkon dioloi hamu do parettana jala ikkon ditangihon hamu do sude hatana. Ibana do na ikkon disomba hamu, jala ikkon toktong do hamu setia* tu Ibana.+
5 Alai anggo panurirang manang siparnipi i, ikkon pamateonmuna do ibana.+ Ai nungnga dijujui ibana halak mangalo Jahowa Debatamuna, na mamboan hamu kaluar sian Mesir jala na manobus hamu sian ingananmuna tikki dibahen gabe hatoban.* Ai naeng dibahen ibana do hamu manirpang sian dalan na ikkon diihutton hamu, i ma dalan naung diparettahon Jahowa. Ikkon pasidingonmuna do hajahaton sian tonga-tongamuna.+
6 “Molo adong sian keluargamuna, i ma anakmuna manang borumuna, manang istri na dihaholongi hamu, manang ale-alemuna, na sip-sip mangelek-elek hamu asa manomba akka debata na asing,+ i ma debata na so ditanda hamu dohot akka ompumuna,
7 debata ni akka bangso na di sakalilingmuna, na jonok tu hamu manang na dao sian hamu, sian ujung tu ujung ni luat i,
8 unang olo hamu mangihutton manang manangihon hatana.+ Unang asi rohamuna tu ibana manang gabe ditabunihon hamu ibana.
9 Alai ikkon pamateonmuna do ibana.+ Hamu ma na parjolo mandangguri ibana mamakke batu sappe mate. Dung i pe asa sude halak Israel mandangguri ibana mamakke batu.+
10 Ikkon didangguri hamu do ibana sappe mate.+ Ai nungnga dilului ibana dalan lao padaohon hamu sian Jahowa Debatamuna, na mamboan hamu kaluar sian Mesir, ingananmuna tikki dibahen gabe hatoban.*
11 Begeon ni sude halak Israel ma i jala mabiar ma nasida. Dang ulahonon ni nasida be ulaon na jahat sisongon i di tonga-tongamuna.+
12 “Molo adong dibege hamu barita di sada sian kota na dilehon ni Jahowa Debatamuna i tu hamu,
13 na adong akka halak na so marguna naeng mangaliluhon penduduk ni kota ni nasida, na manogihon nasida manomba akka debata na asing na so ditanda hamu,
14 ikkon dipatakkas hamu do barita i, jala ikkon manat do i dipareso hamu.+ Molo sittong do masa ulaon na dihagigihon Debata i,
15 ikkon pamateonmuna+ do sude penduduk ni kota i mamakke podang.+ Hancurhon ma kota i, rap dohot sude na adong disi, dohot ma i binatang na dipiaro nasida.
16 Ikkon papunguonmuna do sude barang ni nasida di lapangan ni kota i. Dung i, tutung ma kota i. Sude barang i gabe songon pelean situtungon tu Jahowa Debatamuna. Ikkon dipasombu do kota i hancur, jala dang boi be dibangun muse.
17 Dang boi buatonmuna manang aha pe sian akka naung ditottuhon lao dihancurhon,+ asa unang muruk be Jahowa, asa asi rohana tu hamu, jala asa dipatudu Ibana burju ni rohana tu hamu jala dibahen Ibana hamu lam godang songon na dijanjihon Ibana tu akka ompumuna.+
18 Ikkon dioloi hamu do* Jahowa Debatamuna. Ikkon ulahononmuna do sude paretta na hupaboa tu hamu sadari on. Molo dibahen hamu songon i, na mangulahon na sittong do hamu di jolo ni Jahowa Debatamuna i.+
Surat na di toru
^ Manang “marsitiopan”.
^ As. “sian jabu ni akka hatoban”.
^ As. “sian jabu ni akka hatoban”.
^ Manang “ditangihon hamu do soara ni”.
