5 Musa 16:1-22
16 “Ingot hamu ma, bulan na rikkot do bulan Abib.* Rayahon hamu ma Paska tu Jahowa Debatamuna.+ Ai di bulan Abib do Jahowa Debatamuna mamboan hamu kaluar sian Mesir di tikki borngin.+
2 Lehon hamu ma hambing, biru-biru, manang lombumuna gabe peleanmuna.+ Lehon ma i gabe pelean Paska tu Jahowa Debatamuna+ di inganan na dipillit Jahowa lao pasangappon goarna.+
3 Allang hamu ma jagal i rap dohot roti na so marragi.+ Mulai sian ari i, dang boi allangonmuna manang aha pe na marragi saleleng pitu ari. Ikkon holan na so marragi do allangonmuna, dos songon tikki makkudus+ hamu kaluar sian Mesir. Molo diulahon hamu songon i, ingotonmuna ma hasusaan na ditaon hamu jala toktong ma ingotonmuna+ songon dia hamu diboan kaluar sian Mesir.
4 Dang boi adong ragi* di sude luatmuna saleleng pitu ari.+ Jala unang disisahon hamu lao tu manogot+ jagal na dipelehon di borngin di ari na parjolo i.
5 Dang boi dipelehon hamu pelean Paska i di inganan na asing, di akka kota na lao lehonon ni Jahowa Debatamuna i tu hamu.
6 Alai ikkon dipelehon hamu do i di inganan naung dipillit Jahowa Debatamuna lao pasangappon goarna. Ikkon dipelehon hamu do pelean Paska i di tikki borngin, disi bonom mataniari,+ i ma di tikki na sarupa tikki kaluar hamu sian Mesir.
7 Loppa hamu ma i jala allang+ di inganan na lao pilliton ni Jahowa Debatamuna.+ Dung manogot mulak ma hamu tu kemahmuna be.
8 Saleleng onom ari allang hamu ma roti na so marragi. Jala di ari na papituhon marpungu ma hamu lao manomba Jahowa Debatamuna. Dang boi hamu karejo di ari i.+
9 “Ikkon etongonmuna do pitu minggu. Etong hamu ma pitu minggu mulai sian na parjolo sahali disabi hamu barli* na di ladang.+
10 Dung i, bahen hamu ma Perayaan Dung Pitu Minggu tu Jahowa Debatamuna.+ Boan hamu ma pelean sian na nionjar ni rohamuna, hombar tu godang ni pasu-pasu na dilehon Jahowa Debatamuna tu hamu.+
11 Marlas ni roha ma hamu di jolo ni Jahowa Debatamuna, di inganan na dipillit Jahowa Debatamuna i lao pasangappon goarna.+ Marlas ni roha ma hamu rap dohot anakmuna, borumuna, sude hatobanmuna, halak Lepi na di kotamuna,* akka panoppang, halak na so marama,* dohot akka na mabalu na adong di tonga-tongamuna.
12 Ingot hamu ma, najolo gabe hatoban do hamu tikki di Mesir.+ Oloi jala ulahon hamu ma akka aturan on.
13 “Ikkon dirayahon hamu do Perayaan Pondok Daun*+ saleleng pitu ari, i ma tikki dipapungu hamu hasil panen sian inganan pardegean, dohot sian inganan pamoroan ni miak dohot anggurmuna.
14 Marlas ni roha ma hamu saleleng perayaan i+ rap dohot anakmuna, borumuna, sude hatobanmuna, halak Lepi, akka panoppang, halak na so marama, dohot akka ina na mabalu na adong di kotamuna.
15 Saleleng pitu ari, bahen hamu ma perayaan i+ lao pasangappon Jahowa Debatamuna di inganan na dipillit Jahowa. Ai pasu-pasuon ni Jahowa Debatamuna i do sude na lao dipanen hamu dohot sude ulaonmuna.+ Alani i, ikkon marlas ni roha do hamu.+
16 “Tolu hali di bagasan sataon ikkon ro do akka bawa tu jolo ni Jahowa Debatamuna di inganan na pinillitna i, i ma tikki Perayaan Roti na So Marragi,+ Perayaan Dung Pitu Minggu,+ dohot Perayaan Pondok Daun.+ Jala dang boi nasida ro tu jolo ni Jahowa molo dang diboan manang aha.
17 Ganup halak ikkon mamboan silehon-lehon hombar tu godang ni pasu-pasu na nilehon ni Jahowa Debatamuna tu hamu.+
18 “Pillit hamu ma akka hakim+ dohot akka pamimpin sian ganup marga di sude kota* na nilehon ni Jahowa Debatamuna tu hamu. Ikkon sittong do nasida mangadili bangso i.
19 Unang papeol hamu hukum tikki mangadili.+ Unang mamihak hamu tu manang ise pe,+ jala unang olo hamu disogok. Ai molo olo sasahalak disogok, gabe dang boi be diida ibana dia na sittong.+ Jala boi do gabe muba keputusan ni halak na sittong ala disogok.
20 Ihutton hamu ma dalan na tigor,+ asa boi hamu toktong mangolu jala asa boi dibuat hamu luat na lao lehonon ni Jahowa Debatamuna tu hamu.
21 “Unang suan hamu hau manang aha pe na dibahen gabe tiang sisombaon*+ di labbung ni langgatan na dibahen hamu tu Jahowa Debatamuna.
22 “Jala unang bahen hamu tugu sisombaon,+ ai sogo do roha ni Jahowa Debatamuna mangida i.
Surat na di toru
^ Ida Lampiran B15.
^ Manang “adonan na marragi”.
^ Suan-suanan na songon eme.
^ Manang “na so marama na so marina”.
^ As. “di gerbangmuna”.
^ As. “gerbangmuna”.
